Search form

Eza 30

Min man di Ala ye

1Masaba ko:

«Bɔnɛ ye mɔgɔmurutininw ta ye!

U be koow latigɛ minw te ne sago ye.

U be bɛn ni mɔgɔ dɔw ye

k'a sɔrɔ o miiriya ma bɔ ne fɛ.

U b'a la ka kojugu fara kojugu kan dɔrɔn.

2U be taga Ezipiti jamana la,

hali u te ne ɲininga.

U b'u yɛrɛ kalifa Ezipiti masacɛ ma,

u b'u yɛrɛ dogo Ezipiti suma la.

3Ezipiti masacɛ ka dɛmɛ bena yɛlɛma

ka kɛ maloya ye aw fɛ.

Aw be dogo Ezipiti suma min kɔrɔ,

o bena kɛ aw dɔgɔyako ye.

4Aw ɲamɔgɔw sera ka ban *Tanisi,

aw ka lasigidenw donna Anɛsi.

5Bɛɛ bena maloya o siya nin kosɔn,

bari mɔgɔw lo minw te se ka mɔgɔ mako ɲa.

U tena se k'u dɛmɛ,

u tena nafa sɔrɔ u fɛ

ni maloya ani dɔgɔya dama tɛ.»

6Kirayakuma min fɔra worodugu ɲafan begɛnw kosɔn:

U be nafolow la faliw kɔɔ la,

ka fɛnsɔbɛw la ɲɔgɔmɛw kɔɔ la,

ka dusukasiyɔrɔ cɛtigɛ,

kamanagwan jamana, jamana janin,

jaracɛ ni jaramuso ka jamana,

fɔnfɔnni, ani sogojugu kabakoman ka jamana na,

ka taga jamana kɔnɔ min tena se ka foyi ɲa aw ye.

7Ezipiti ka dɛmɛ tena foyi ɲa,

fuu lo.

O kama, ne b'a wele ko kɔgɔji kɔnɔ fɛnjuguf min te bɔ a nɔɔ na.

8Sisan, taga o sɛbɛn u ɲana walaka kan,

a sɛbɛn sɛbɛ dɔ kɔnɔ fana,

loon nataw la, o ka kɛ seereya ye tuma bɛɛ.

Mɔgɔ murutininw ka koo

9Nunu ye mɔgɔmurutininw le ye,

namaramɔgɔw lo.

Deen minw lo, u te sɔn Masaba ka ladili ma.

10U b'a fɔ kiraw ye ko:

«Tɔnɔ t'a la tugu aw ka yelifɛnw ye.»

U t'a fɛ u be tiɲɛ fɔ u ye.

U b'a fɛ ka kuma diman dɔrɔn mɛn,

kuma min te tiɲɛ ye.

11Aw ka sira bila, aw ka bɔ sira kan.

Aw kana Isirayɛli ka Ala ka koo fɔ an ye tugu.

12Ayiwa, o kama, Isirayɛli ka Ala ko:

«Aw banna nin kuma nin ma minkɛ,

k'aw jigi la ɲɔgɔntɔɔrɔ ni namara kan,

13o le y'a to, o kojugu nin bena kɛ

aw fɛ i ko kogojan min cira.

Yanni dɔɔni, yɔrɔnin kelen,

a be ben.

14A bena mugumugu i ko u ye bɔgɔdaga min ci,

fura t'a la.

Hali tɛgɛnɛkolon tena sɔrɔ a la

min be se ka tasuma bɔ gwada la,

walima ka jii soli dalan kɔnɔ.»

Ka kɔsegi Ala ma

15Ayiwa, Matigi, Masaba, Isirayɛli ka Ala ko:

«Ka kɔsegi ne ma, ka to yɔrɔ kelen,

o le bena aw kisi.

K'aw hakili sigi, ani k'aw jigi la ne kan,

o le bena fanga d'aw ma.

Nga aw ma sɔn o la.

16Aw b'a fɔ ko:

‹Fewu, an bena boli ni soow ye.›

O la, aw bena boli cɔ!

Aw ko: ‹An bena yɛlɛ soo telimanw kan.›

O la, aw gwɛnbagaw fana bena teliya!

17Aw mɔgɔ waa kelen bena boli

jugu kelen ɲafɛ,

jugu mɔgɔ duuru mana aw bagabaga,

aw bɛɛ bena boli.

Fɔɔ aw tɔɔ bena to i ko yiri kelen min tora kulu kan,

i ko taamasiɲɛ, tintin sanfɛ.»

Masaba bena makari

18O bɛɛ n'a ta, Masaba be waati dɔ le kɔnɔna k'aw dɛmɛ,

a bena wili ka makari aw la.

Bari, Masaba Ala tilennin lo.

Mɔgɔ minw bɛɛ b'u jigi la a kan,

olu dagamuna!

19Ee! *Siyɔnkaw, aw minw be Zeruzalɛmu kɔnɔ,

aw tena kasi tugu.

N'aw kulera Masaba nɔfɛ,

a bena aw dɛmɛ.

Aw kulekan mɛntɔ, aw jaabitɔ.

20Matigi bena dumuni d'aw ma dusukasi waati la,

ka jii d'aw ma sɛgɛn waati la.

Aw kalanbaga ten'a yɛrɛ dogo aw la tugu,

aw ɲaa ben'a ye.

21N'aw ka kan ka taga kinibolo,

walima numanbolo fɛ tuma min na,

aw bena mɛnni kɛ aw kɔfɛ ko:

«Sira ye nin ye, aw k'a minɛ.»

22O tuma na, aw ka joo minw mɔnna ni warigwɛ ye,

n'aw ka jaa minw mɔnna ni sanu ye,

aw bena o jati fɛnnɔgɔnin ye.

Aw bena u fili i ko fɛɛn nɔgɔnin,

k'a fɔ u ma ko: «Aw ye tunu ka bɔ yan.»

Sanji nako

23Aw bena fɛɛn minw dan dugukolo la,

Matigi bena sanji jigi u kan.

Dugukolo bena dumunifɛn min di, o bena caya,

barika bena sɔrɔ a la.

O waati la, aw ka begɛnw dɛndɛyɔrɔ bena boɲa.

24Misi ni fali minw bena to ka dugukolo baara,

olu bena biin kɔgɔlaman le ɲimi,

u ye min jɛnsɛn.

25Soo barikamanw benlon na,

fagali caaman tuma na,

jisiraw bena kɛ kulujanjanw

ni tintinbabaw bɛɛ kan.

26Masaba ben'a ka jama ka jolidaw furakɛ tuma min na,

a bena fura don u ka yɔrɔ mandimininw na loon min na,

kalo bena yeelen bɔ i ko tile o loon na.

Dɔ bena fara tile barika kan fɔɔ siɲɛ wolonwula,

i ko tile wolonwula yeelen faranin ɲɔgɔn kan!

Asirikaw tɔɔrɔko

27A filɛ, Masaba be nana ka bɔ fɔɔ yɔrɔjan!

A dimininba lo!

A dusu wilila kosɔbɛ!

A kumacogo b'a ka dimi yira!

A ka kuma be i ko tasuma!

28A dafiɲɛ be i ko baji min fara ka bɔ,

n'a be yɛlɛ ka se fɔɔ mɔgɔ kaan na!

A be jamanaw yuguyugu kosɔbɛ k'u halaki,

ka fɛɛn dɔ don siyaw daa la i ko karafe.

U t'a fɛ ka taga yɔrɔ min na,

a be taga n'o ye o yɔrɔ le la.

29Aw bena dɔnkili la

i ko u be ɲanagwɛdɔnkili la sufɛ cogo min na.

Aw nisɔn bena diya

i ko file be fiyɛra mɔgɔ minw ye,

u yɛlɛtɔ Masaba ka kulu kan

Ala yɔrɔ la, Isirayɛli tangabaga.

30Masaba ben'a kanba bɔ.

A ben'a bolo kɛ ka bugɔli kɛ.

A ben'a ka dimi yira ni tasumaba ye,

ni sanjiba, ani sanbɛrɛ ye.

31Asirikaw bena siran kosɔbɛ Masaba kumakan kosɔn,

a bena u bugɔ ni daku ye.

32Masaba ka bere ɲaa kelen kelen bɛɛ bena jigi u kan

ka kɛɲɛ ni dundun kaan ye,

ni gɔniw.

Ale yɛrɛ ben'a bolo lafoni u kɛlɛwaati la.

33Tasuma manayɔrɔ labɛnna a mɛnna,

a labɛnna masacɛ kama.

Yɔrɔba le labɛnna, a fana ka dun.

Lɔgɔ caaman labɛnna yen.

Masaba dafiɲɛ ben'a mana ka kɛ tasumaba ye.

ALA KA KUMA

© 2008 Alliance Biblique du Burkina Faso

More Info | Version Index