Search form

Eza 52

Zeruzalɛmu, wili

1- Wili, *Siyɔn,

wili joona ka barika don i yɛrɛ la.

Zeruzalɛmu, dugu senuman,

wili k'i ka faniɲumanw don.

Bari, kɛnɛkɛnɛbaliw ni mɔgɔ minw saniyanin tɛ,

olu tena don i kɔnɔ tugu.

2Zeruzalɛmu, wili ka buguri furan k'a bɔ i yɛrɛ la

ka sigi i nɔɔ na.

Siyɔn, jɔnya juru min b'i kaan na, wili k'o foni.

3Tiɲɛ na, Masaba y'a fɔ a ka jama ye ko:

«Mɔgɔ ma wari bɔ k'aw san k'aw kɛ jɔɔnw ye,

wari fana tena bɔ k'aw hɔrɔnya.»

4Matigi, Masaba y'a fɔ tugu ko:

«Ne ka jama ka koo daminɛ na,

u tun tagara Ezipiti ka sigi yen.

A laban na, Asirikaw y'u minɛ k'u tɔɔrɔ.

5- Sisan ne be mun lo sɔrɔ o la?

Ne ka jama minɛna gwansan,

foyi ma sara.

U kuntigiw be pɛrɛnna setigiya la.

Ne Masaba le ko ten.

Ne tɔgɔ fana cɛnnin lo tuma bɛɛ.

6O kama, ne ka jama bena n tɔgɔ lɔn.

O loon na, u ben'a lɔn ko ne le be kumana.

Tiɲɛ na, ne lo.»

Masaba kɔsegiko Zeruzalɛmu

7- Ciden min be nana kibaru diman fɔ,

ale yenin be mɔgɔ nisɔndiya,

min be hɛrɛkuma wango la,

min be kibaru diman fɔ ka kisili wango la,

min b'a fɔ *Siyɔn ye ko:

«I ka Ala ye masa ye!»

8Dugu kɔlɔsibagaw be pɛrɛnna,

u be pɛrɛnna ɲɔgɔn fɛ nisɔndiya la.

Bari, olu yɛrɛ ɲaa be Masaba kɔsegitɔ la Siyɔn.

9Zeruzalɛmu tomow, aw ka nisɔndiyapɛrɛnkan bɔ ɲɔgɔn fɛ.

Bari, Masaba ben'a ka jama dusu saalo,

a bena Zeruzalɛmu kunmabɔ.

10Masaba y'a bolo barikaman yira

siyaw bɛɛ ɲana.

Masaba bena an kisi cogo min na,

diɲɛ danyɔrɔ mɔgɔw bɛɛ bena o ye.

Aw ye bɔ Babilɔni

11- Aw ye bɔ! Aw ye bɔ! Aw ye bɔ Babilɔni.

Aw kana maga fɛɛn nɔgɔnin si la.

Masaba batominanw be aw minw bolo,

aw ye bɔ a kɔnɔ, k'aw yɛrɛ saniya.

12Aw ka bɔko tena kɛ kɔrɔtɔko ye,

aw tena taga i ko bolibagaw.

Sabu, aw ka ɲabila ye Masaba le ye,

aw ka kɔbila ye Isirayɛli ka Ala ye.

Masaba ka baarakɛla ka koo (dɔnkili naaninan)

13Masaba ko:

«Ayiwa, ne ka baarakɛla ka koo bena taga ɲa,

a bena boɲa sɔrɔ kosɔbɛ!

14Mɔgɔ caaman kabakoyar'a halakikojugu kosɔn.

Adamadenya tun te lɔn a la tugu,

a tun te lɔn tugu ko cɛɛ lo.

15- A kɛra ten, siya caaman bena kabakoya a kosɔn.

Fɔtaw tena sɔrɔ masaw fɛ.

Bari min ma deli ka lakali u ye,

u bena o ye.

U ma deli ka min mɛn,

u bena o faamu.»

ALA KA KUMA

© 2008 Alliance Biblique du Burkina Faso

More Info | Version Index