Search form

Zud 13

Zuditi be Olofɛrine faga

1Suu kora tuma min na, a ka baarakɛlaw teliyara ka taga. Bagowasi tora kɛnɛma ka faniso daa tugu. Mɔgɔ minw nana dumuni kɛyɔrɔ la, a y'a kɛ olu bɔra u matigi fɛ ka taga. U tagara la, bɛɛ tun sigɛnna bari u tun ye minni kɛ k'a dama tɛmɛ. 2Zuditi kelen tora faniso kɔnɔ ni Olofɛrine ye, a lanin tun be tɛtɛtɛ a ka dilan kan, bari a tun fara duvɛn na k'a dama tɛmɛ. 3Zuditi y'a fɔ a ka jɔnmuso ye ko a ka lɔ kɛnɛma, a ka sibon daa la k'a kɔnɔ, yanni a b'a yɛrɛ labɛn ka bɔ. Ko a b'a fɛ ka bɔ ka taga dalili kɛ i n'a fɔ a be to k'a kɛ cogo min na loon o loon. A y'o ɲɔgɔn fɔ Bagowasi fana ye.

4Bɛɛ bɔra yen, mɔgɔbaba fara tɔw kan, u si ma to sibon kɔnɔ. Zuditi lɔnin tun be Olofɛrine ka dilan gɛrɛfɛ. A ye Ala dali a yɛrɛ kɔnɔ ko: «Matigi, Setigi Ala, sisan i ka barika don ne ka kɛwaliw la, ne be min kɛra janko Zeruzalɛmu ka boɲa sɔrɔ. 5Nin ye waatiɲuman ye, i janto i ka mɔgɔw la, ka ne ka kolatigɛnin ɲa janko k'an juguw ɲɔɲɔ, minw wilila an kama.» 6O kɔ, a gwɛrɛla dilan na, kuun layɔrɔ faan fɛ, Olofɛrine kuun gɛrɛfɛ, k'a ka murujan ta. 7A gwɛrɛla tugu ka Olofɛrine kunsigi minɛ k'a fɔ ko: «Matigi, Isirayɛli ka Ala, ne jaa gwɛlɛya bii!» 8A y'a kaan tigɛ ni murujan ye siɲɛ fila n'a barika bɛɛ ye, k'a kuun bɔ. 9O kɔ, a y'a suu kolonkolon ka bɔ dilan kan, ka sanke bɔ dilan tutunanw na, ka sɔrɔ ka bɔ joona ka Olofɛrine kuun di a ka baarakɛmuso ma. 10Ale y'a don a ka bɔɔrɔ kɔnɔ. U bɔra ɲɔgɔn fɛ i n'a fɔ u tun be deli k'a kɛ cogo min na, ka taga Ala daliyɔrɔ la. U y'u juguw ka sigiyɔrɔ cɛtigɛ ka munumunu dingɛyɔrɔ la ka taga yɛlɛ kulu kan, Betuli be min kan, ka se dugu donda la.

Zuditi be segi Betuli

11Zuditi tora yɔrɔjan k'a fɔ daa kɔlɔsibagaw ye ko: «Aw ye daa yɛlɛ! Ala, an ka Ala be n'an ye! Halibi a b'a fɛ k'a ka sebagaya yira Isirayɛli jamana kɔnɔ, k'a ka fanga yira an juguw la. A y'o le kɛ bii yɛrɛ.»

12A ka dugumɔgɔw y'a kumakan mɛn tuma min na, u teliyara ka jigi ka taga u ka dugu donda faan fɛ, u ye dugu cɛkɔrɔbaw wele. 13Bɛɛ girinna, denmisɛn fara mɔgɔkɔrɔbaw kan, bari u ma se ka l'a la ko a nana. U ye daa yɛlɛ ka muso fila nunu kunbɛn. U ye tasuma mana janko u ka se ka yeli kɛ ka ɲa, u y'u lamini. 14Zuditi y'a kaan kɔrɔta k'a fɔ u ye ko: «Aw ye Ala tanu! Aw k'a tanu! Aw ye Ala tanu, ale min sɔnna ka makari Isirayɛlidenw na. A y'an juguw ɲɔɲɔ ne barika la bii suu nin na.»

15O kɔ, a ye kungolo nin bɔ bɔɔrɔ kɔnɔ k'a yira u la k'a fɔ u ye ko: «Asiri kɛlɛmasa Olofɛrine kungolo filɛ nin ye, n'a tun lanin be sanke min jukɔrɔ, a fanin duvɛn na. Matigi y'a faga muso barika la. 16Ne b'a fɔ Matigi kosɔn, min ye ne mara n ka kokɛta la, ne sera ka Olofɛrine nigɛ n ka cɛɲa barika la, o kɛr'a halaki sababu ye. A ma se ka hakɛ kɛ ni ne ye, ka ne nɔgɔ ka maloya lase ne ma.» 17Jama bɛɛ kabakoyara kosɔbɛ, u birila ka Ala bato k'a fɔ ni kaan kelen ye ko: «An b'i fo, an ka Ala, e min y'i ka jama juguw halaki bii.» 18Oziyasi y'a fɔ Zuditi ye ko: «N denmuso, Fɛɛn bɛɛ kuntigi Ala le y'i ta ɲa ka tɛmɛ musow bɛɛ kan dugukolo kan! Matigi Ala ka tanu, ale min ye sankolo ni dugukolo dan, n'a y'i bila sira ka taga an juguw ɲamɔgɔ kuun tigɛ. 19Tiɲɛ na, i ye jigi min sɔrɔ, o koo tena bɔ mɔgɔw kɔnɔ, u hakili bena to Ala ka sebagaya nin na tuma bɛɛ. 20Ala k'a kɛ i tɔgɔ ka bɔ tuma bɛɛ! A ka koɲuman kɛ i ye, bari i ma i nii jati fɛɛn ye, an ka siya ka maloya kosɔn. I ye tilenninya kɛ an ka Ala ɲakɔrɔ, k'an ka makosa bali.» Jama bɛɛ ko: «Amiina, amiina!»

ALA KA KUMA

© 2008 Alliance Biblique du Burkina Faso

More Info | Version Index