Search form

Zud 14

Akiyɔri be sɔn Isirayɛli ka Ala ma

1Zuditi y'a fɔ u ye ko: «Aw ye mɛnni kɛ ne fɛ, n balimaw. Aw ye kungolo nin minɛ k'a dulon an ka dugu laminikogo sanfɛ. 2Sɔgɔmada joona, tilekun bɔtuma na, aw kelen kelen bɛɛ k'aw ka kɛlɛkɛminanw ta. Mɔgɔ minw bɛɛ ka kɛnɛ, olu ka bɔ dugu kɔnɔ, ka mɔgɔ dɔ woloma ka kɛ u ɲamɔgɔ ye. U k'a kɛ i n'a fɔ u be jigira ka taga kɛnɛyɔrɔ la, Asirikaw ka kɛlɛdenw kɔlɔsilikɛbagaw faan fɛ. Nga aw kana jigi. 3U bena u ka minanw ta ka taga u ka sigiyɔrɔ la, ka Asiri kɛlɛdenw ɲamɔgɔw kunun, olu bena boli ka taga Olofɛrine ka faniso la, nga u ten'a sɔrɔ yen. Siranya bena u minɛ, u bena boli aw ɲa ka taga fɔɔ yɔrɔjan. 4Aw ni Isirayɛli jamanadenw bena tugu u kɔ k'u faga u ka sira kan. 5Nga sanni aw k'o kɛ, aw ka amonicɛ Akiyɔri wele ka na ne fɛ, janko mɔgɔ min ye Isirayɛlidenw dɔgɔya, k'a ci an ma i n'a fɔ a be tagara fagayɔrɔ la, a ka se k'o tigi kungolo ye k'a lɔn.» 6U tagara Akiyɔri wele Oziyasi ka soo kɔnɔ. A sera tuma min na, a ye Olofɛrine kuun ye mɔgɔ dɔ bolo jama cɛma, a kirinna ka bɔ ka ben a daa kan. 7U y'a wili tuma min na, a birila Zuditi seen kɔrɔ, k'a ɲaa biri duguma, k'a fɔ ko: «I ka tanu Zuda mara soow bɛɛ kɔnɔ, ani siyaw bɛɛ cɛma. Minw mana i koo mɛn, u hakili bɛ ɲagami. 8Sisan, i ye koo min bɛɛ kɛ tile fila nin na, i k'o bɛɛ fɔ ne ye.» Zuditi tun ye koo min bɛɛ kɛ kabini a bɔtuma na u fɛ fɔɔ ka na se o waati ma, a y'o bɛɛ ɲafɔ a ye jama ɲana. 9A tilara kuma na tuma min na, jama y'u kaan kɔrɔta k'a tanu, ka mankanba kɛ dugu kɔnɔ nisɔndiya la. 10Isirayɛli ka Ala ye koo min bɛɛ kɛ, Akiyɔri y'o ye tuma min na, a y'a jigi la Ala kan kosɔbɛ. U y'a kɛnɛkɛnɛ, a tora Isirayɛlidenw fɛ ka jati u dɔ ye fɔɔ ka na se bii ma.

Isirayɛli be se u kɛlɛɲɔgɔnw kɔrɔ

11O dugusagwɛ sɔgɔmada joona, u ye Olofɛrine kungolo dulon dugu laminikogo la. U kelen kelen bɛɛ y'a ka kɛlɛkɛminanw ta, bɛɛ bɔra jɛnkulu jɛnkulu, ka taga kulu jigijigiyɔrɔw faan fɛ. 12Asiri kɛlɛdenw y'u ye tuma min na, u ye cira bila ka taga o fɔ u kuntigiw ye, olu tagara o fɔ u kuntigiw bɛɛ ye. 13Olu tagara Olofɛrine ka faniso la k'a fɔ Olofɛrine ka koow ɲanabɔbaga Bagowasi ye ko: «An matigi kunun! Jɔɔng nunu y'u jaa gwɛlɛya ka jigi ka na k'u be kɛlɛ kɛ n'an ye. U b'a fɛ u bɛɛ ka halaki hali kelen kana to!» 14Bagowasi donna faniso kɔnɔ k'a tigɛ gosi sibon daa la. A tun be miiri ko Olofɛrine lanin be ni Zuditi ye. 15Nga mɔgɔ si m'a jaabi minkɛ, a ye fani nin jɛngɛ ka don boon kɔnɔ. A ye Olofɛrine suu filinin ye dilan kɔrɔ sigilan kan, a kuun tun tigɛra ka bɔ yen. 16Bagowasi kulera kosɔbɛ, ka kasi, ka ŋunan, ka pɛrɛn, k'a ka faniw faran. 17Zuditi tun be la faniso min kɔnɔ, a donna yen, a m'a ye. A bolila ka taga jama yɔrɔ la ka kule ko: 18«Jɔɔn nunu y'an namara! Eburumuso kelen dama le ye masacɛ Nabukodonozɔri ka soo bɛɛ maloya! Olofɛrine suu bɛ duguma, a kuun tigɛra ka bɔ yen!» 19Asiri kɛlɛdenw ɲamɔgɔw y'o kuma mɛn tuma min na, u y'u ka forocaw faranfaran. U hakili ɲagamina kosɔbɛ, u mankan n'u kulekan bɔra fɔɔ ka se kɛlɛdenw sigiyɔrɔ bɛɛ la.

ALA KA KUMA

© 2008 Alliance Biblique du Burkina Faso

More Info | Version Index