Search form

Zud 16

Zuditi ka dɔnkili

1Zuditi ko:

«Aw ye dɔnkili la ne ka Ala ye ni dundunw ye,

aw ye nigɛw gosi ɲɔgɔn na ka Matigi makiri!

Aw k'a tanu ni dɔnkili ye,

aw k'a boɲa, ka dɛmɛ ɲini a fɛ!

2Bari Matigi ye Ala ye, min be kɛlɛ ban.

A ye ne bɔsi n juguw bolo,

a ye ne bɔ n kɔgwɛnbagaw bolo.

A ye ne ɲuman segi a ka sigiyɔrɔ la,

a ka mɔgɔw cɛma.

3Asiri kɛlɛdenw bɔra kɔgɔdugu ɲafan fɛ kuluyɔrɔ la ka na,

u tun ka ca haali, u daa te se ka lɔn!

O jamaba nin ye kɔɔw datugu,

u ka sotigiw ye kuluw fa.

4Asirika nunu tun y'a fɔ k'u bena an ka mara jɛni,

k'an ka kanbelenw halaki ni murujan ye,

k'an ka denɲɛninw fili duguma,

k'an ka denmisɛnw minɛ ka taga u bila jɔnya la,

k'an ka sunguruw minɛ ka taga n'u ye.

5Matigi Setigi sera k'u bali muso le barika la.

6Kanbelen kɛnɛkɛnɛw ma u ka cɛfari bugɔ k'a ben.

Barikatigiw m'a faga.

Mɔgɔjanjanw m'a kɛlɛ.

Merari denmuso Zuditi le ser'a kɔrɔ

a ka cɛɲa barika la.

7A y'a ka firiyafani bɔ

janko ka Isirayɛlidenw bɔ u ka tɔɔrɔ la.

A ye tulu kasadiman mɔ a ɲada la,

8a ye masirifɛn biri a kuun na,

a ye faniɲuman don, mɔgɔ nigɛ ta.

9A ka sanbara ye kɛlɛmasa ɲanamini,

a ka cɛɲa y'a dusu minɛ.

A y'a kaan tigɛ ni murujan ye.

10Pɛrɛsiw yɛrɛyɛrɛl'a ka jagwɛlɛya kosɔn,

Mɛdiw hakili ɲagamin'a ka dusugwɛlɛya kosɔn.

11O la, an ka mɔgɔ maloyaninw ye kɛlɛ kulekan ci,

Asirikaw siranna.

An ka mɔgɔ barikabanninw kulera,

Asirikaw jaa tigɛra.

U y'u kaan kɔrɔta,

Asirikaw hakili ɲagamina.

12U tun be minw jati jitɔw ye,

olu y'u sɔgɔ.

U mandimina fɔɔ u tun be ɲini ka sa,

u bolila i n'a fɔ siranbagatɔw.

U tora ne ka Matigi ka kɛlɛ la.

13Ne b'a fɛ ka dɔnkilikura la n ka Ala ye.

Matigi, i ka bon, i ka ɲi kosɔbɛ.

Ele ye barikatigi kabakoman le ye!

Fɛɛn si te se ka lɔ i ɲa.

14I ka danfɛnw bɛɛ ka kan ka baara kɛ i ye,

e kumana dɔrɔn, u danna,

e y'i ka Nii ci, a y'u lalaga.

Mɔgɔ si te se ka ban i kumakan na.

15Kuluw bena yɛrɛyɛrɛ ka bɔ u sigiyɔrɔ la

ka ben jii kɔnɔ,

farakuruw bena yeelen

i ko liɲaga i ɲakɔrɔ.

Nga minw be siran i ɲa,

i be makari olu la.

16Bari sarakaw bɛɛ ka dɔgɔ,

u si te se ka diya Matigi ye.

Sarakasogo tuluman minw be jɛni sarakabɔyɔrɔ la,

olu barika ka dɔgɔ,

Matigi te se k'u jati fɛɛn ye.

Nga min be siran Matigi ɲa,

ale ye mɔgɔbaba ye tuma bɛɛ.

17Siya minw be wili an ka mɔgɔw kama,

bɔnɛ ye olu ta ye!

Matigi Setigi ben'a mɔnɛ bɔ kitilon na.

A ben'a kɛ tasuma ni tumuw b'u dumu,

u bena kasi dimi fɛ tuma bɛɛ.»

18U sera Zeruzalɛmu tuma min na, u ye Ala bato. Jama y'u yɛrɛ saniya, o kɔ, u ye saraka jɛnitaw bɔ, k'u yɛrɛsago la sarakaw ni fɛɛn wɛrɛw di. 19Jama tun ye Olofɛrine bololafɛn minw di Zuditi ma, a y'o bɛɛ di Ala ma k'o to Alabatosoba kɔnɔ. A tun ye sanke min ta Olofɛrine ka sibon kɔnɔ, a y'o di Matigi ma a niyɔrɔ ye. 20Jama bɛɛ tora ka nisɔndiya Alabatosoba ɲafɛ Zeruzalɛmu kalo saba, Zuditi tora n'u ye.

Zuditi sii laban

21O loonw tɛmɛnin kɔ, mɔgɔ kelen kelen bɛɛ segir'a ka soo. Zuditi ye Betuli sira minɛ ka taga to a ka sigiyɔrɔ la. A tɔgɔ bɔr'a ka tile la jamana faan bɛɛ la. 22Mɔgɔ caaman tun b'a fɛ k'a furu, nga a ma sɔn ka furu mɔgɔ si ma a sii kɔnɔ kabini a cɛɛ Manase sara ka ta'a faaw fɛ. 23A kɔrɔla ni boɲaba ye, a tor'a cɛɛ ka soo kɔnɔ fɔɔ ka saan kɛmɛ ni duuru sɔrɔ. A y'a ka baarakɛmuso hɔrɔnya sanni a ka sa Betuli. U y'a suu don a cɛɛ Manase ka kaburu kɔnɔ. 24Isirayɛlidenw y'a sanga kɛ tile wolonwula kɔnɔ. Sanni a be sa, a tun y'a ka nafolo tilan a cɛɛ Manase ka mɔgɔw n'a yɛrɛ ka mɔgɔw cɛ.

25Mɔgɔ si ma cogo ɲini ka siranya bila Isirayɛlidenw na tugu Zuditi ka tile la, ani waatijan kɔnɔ a sanin kɔ.

ALA KA KUMA

© 2008 Alliance Biblique du Burkina Faso

More Info | Version Index