Search form

Zud 4

Isirayɛlidenw b'u yɛrɛ labɛnna kɛlɛ kama

1Asiri masacɛ Nabukodonozɔri ka kɛlɛmasa Olofɛrine ye koo minw bɛɛ kɛ siyaw la, k'u ka josow kɔnɔ minanw cɛ ka joso nunu halaki cogo min na, Zude mara Isirayɛlidenw y'o mɛn. 2U jaa tigɛra kosɔbɛ a kosɔn, u hakili ɲagaminin tun lo Zeruzalɛmu, n'u ka Ala batoso ka koo la. 3Bari u bɔra jɔnya la ka na, a ma mɛn fɔlɔ. U bɛɛ sera ka lajɛn, ka Alabatosoba kɔnɔ minanw, n'a sarakabɔyɔrɔ ni soo nin yɛrɛ saniya u nɔgɔnin kɔ, o fana ma mɛn. 4O la, u ye mɔgɔw ci Samari mara bɛɛ la, ani Kona mara la, ni Bɛtorɔn mara la, ani Abɛlimayimu mara, ni Zeriko mara faan bɛɛ la, ani fɔɔ Koba, ni Ayisɔri ani Salɛmu kɛnɛ na. 5U ye kɛlɛdenw sigi kulujanjanw bɛɛ kunna k'o yɔrɔ dugudenninw bɛɛ kɛ dugu barikamanw ye, k'u makoyafɛn dɔw bila yen ka kɛ ɲasigifɛn ye, bari u ka sumanw tun tigɛra, a ma mɛn fɔlɔ.

6Zowakimu min tun ye sarakalasebagaw kuntigiba ye Zeruzalɛmu o waati la, ale ye sɛbɛ ci Betulikaw ni Betomɛsitayimukaw ma, dugu min be Ɛsiderelɔn gɛrɛfɛ. A yɔrɔ man jan ni Dotayimu gɛrɛfɛ kɛnɛ ye. 7A y'a fɔ u ye ko u ka kuluyɔrɔ siraw kɔlɔsi, bari o le ye tɛmɛyɔrɔ ye ka don Zude mara la. O yɔrɔ fana tun ka dɔgɔ, mɔgɔ caaman te se ka tɛmɛ ɲɔgɔn fɛ ni mɔgɔ fila fila dama tɛ, o la, u baliko ka nɔgɔ. 8Sarakalasebagaw kuntigiba Zowakimu ni Isirayɛli jama bɛɛ ka cɛkɔrɔbaw ka jɛnkulu, minw tun be Zeruzalɛmu, olu ye min fɔ Isirayɛlidenw ye, u y'o kɛ.

9Isirayɛlidenw bɛɛ ye Ala dali ni sɔbɛ ye, ani ka suun don n'u sɔbɛ ye. 10Cɛɛw n'u ka musow, n'u ka denmisɛnw, n'u ka begɛnw, ni lonanw bɛɛ, minw siginin b'u fɛ, ni jama ka baarakɛlaw n'u ka jɔɔnw ye dusukasifani don. 11Zeruzalɛmukaw, cɛɛ fara musow kan, ni denmisɛnw bɛɛ birila duguma Alabatosoba ɲafɛ ka bugurigwɛ kɛ u kuun na, ka dusukasifani don Matigi ɲakɔrɔ. 12U ye dusukasifani meleke sarakabɔyɔrɔ la ka Matigi dali kosɔbɛ ni dusu kelen ye janko a kan'a to u juguw b'u ka denmisɛnw minɛ, k'u ka musow bɔsi, k'u faso duguw halaki, k'ale Ala ka batoso nɔgɔ, min ben'a kɛ siya wɛrɛw be yɛlɛ u ma. 13Matigi y'u kaan mɛn k'u ka tɔɔrɔ ye. Jama tora suun na Zeruzalɛmu kɔnɔ tile caaman, Matigi Setigi batoso ɲafɛ. U ye suun don Zude mara tɔɔ bɛɛ kɔnɔ fana. 14Sarakalasebagaw kuntigiba Zowakimu ni sarakalasebagaw bɛɛ ye dusukasifaniw don, ka lɔ Matigi ɲakɔrɔ ni minw tun be baara la Alabatosoba kɔnɔ, ka saraka jɛnita bɔ, min be to ka bɔ tuma bɛɛ, ani k'u ka dajuru sara sarakaw, ni jama ka yɛrɛsago la sarakaw di Ala ma. 15U ye bugurigwɛ kɛ u kunnafaniw kan, u tun be Matigi dalila n'u barika bɛɛ ye janko a ka Isirayɛlidenw bɛɛ dɛmɛ.

ALA KA KUMA

© 2008 Alliance Biblique du Burkina Faso

More Info | Version Index