Search form

Zud 6

1Jama ye mankan dabila tuma min na, kɛlɛkuntigiw ka jɛnkulu lamini na, Asiri kɛlɛmasa Olofɛrine y'a fɔ Akiyɔri ye jama bɛɛ ɲana, mowabuw fara siya wɛrɛw kan, ko: 2«E Akiyɔri ye jɔn ye do, ani Isirayɛlidenw ye aw minw san, aw ye jɔn ye, ni aw be kirayakuma nin ɲɔgɔn fɔ an ɲana bii? Ko an man kan ka Isirayɛlidenw kɛlɛ, bari u ka Ala bena u tanga. Batofɛn wɛrɛ be yen tugu ni Nabukodonozɔri tɛ wa? Ale lo ben'a ka barikatigiw ci k'u halaki ka bɔ dugukolo kan, u ka Ala tena u kisi. 3Nga anw, Nabukodonozɔri ka baarakɛlaw, an bena se u kɔrɔ yɔrɔnin kelen, u tena se an ka sotigiw kɔrɔ. 4Bari an bena u ɲanaman jɛni, u ka kuluw bena fa u joli la, u ka kɛnɛyɔrɔw bena fa u suuw la. U tena se ka lɔ an ɲa. U bena sa cogojugu la, masacɛ Nabukodonozɔri min ye dugukolo bɛɛ matigi ye, ale ko ten. Bari a kumana, a ka kuma tena kɛ kuma gwansan ye. 5E Akiyɔri, amoni wariɲinila, e ye kuma nin fɔ i ka murutilon na. K'a ta bii ma, i tena ne ɲada ye tugu ni ne ma n dimi bɔ siya nin na, bolibagatɔ minw bɔra Ezipiti. 6Ni ne kɔsegira tuma min na, ne ka kɛlɛdenw ka murujanjanw, ni ne ka kɛlɛkuntigiw ka tamanw bena i sɔgɔ i gɛrɛn na, i bena sɔrɔ mɔgɔmandimininw cɛma ka sa. 7Sisan ne ka mɔgɔw bena taga n'i ye kuluyɔrɔ la, k'i to o yɔrɔ dugu dɔ la. 8I bena to yen ka waati kɔnɔ, i bena halaki ni Isirayɛliden nunu ye. 9I lanin b'a la ko an tena se k'u minɛ minkɛ, kana i ɲaa sisi. Ne kumana, ne ka kuma si tena to kɛbali.»

10Olofɛrine y'a fɔ a ka mɔgɔw ye minw tun b'a ka faniso kɔnɔ k'u ka Akiyɔri minɛ ka taga n'a ye Betuli k'a don Isirayɛlidenw bolo. 11A ka mɔgɔw y'a minɛ ka bɔ n'a ye u ka sigiyɔrɔ la ka taga n'a ye kɛnɛyɔrɔ faan fɛ. U bɔra o yɔrɔ la ka taga kuluyɔrɔ la ka taga se jii bɔyɔrɔ dɔw gɛrɛfɛ, Betuli jukɔrɔ.

12Dugu kɔlɔsilikɛbagaw y'u ye tuma min na, k'u to kulu kunna, u y'u ka kɛlɛkɛminanw ta ka bɔ dugu kɔnɔ. Bɛrɛbonnanw tun b'u bɛɛ bolo. U tora k'u bon ni bɛrɛw ye. U y'u bali ka yɛlɛ. 13Asirikaw dɛnna ka jigi fɔɔ kulu jukɔrɔ. U ye Akiyɔri siri k'a to o yɔrɔ la, ka sɔrɔ ka segi ka taga u matigi fɛ. 14Isirayɛlidenw bɔra u ka dugu kɔnɔ ka jigi ka taga se Akiyɔri ma. U y'a foni ka taga n'a ye Betuli k'a yira u ka dugu ɲamɔgɔw la. 15O waati la, dugu ɲamɔgɔw tun ye Simeyɔn kɔmɔgɔ Mika deen Oziyasi ye, ni Otiniyɛli deen Kabirisi, ani Mɛlikiyɛli deen Karimisi. 16U ye dugu cɛkɔrɔbaw bɛɛ wele. Kanbelenw ni musow bɛɛ girinna ka taga o ɲɔgɔnye la. U ye Akiyɔri bila mɔgɔw bɛɛ cɛma, koo min kɛra, Oziyasi y'a ɲininga o la. 17Olofɛrine n'a ladibagaw tun ye min fɔ u ka ɲɔgɔnye la, a y'o fɔ u ye. Asirikaw ka ɲamɔgɔw ye kuma minw bɛɛ fɔ, ani Olofɛrine ka dabayakumaw bɛɛ Isirayɛlidenw kosɔn, a y'o fɔ. 18Jama y'u kunbiri gwan ka Ala bato. U y'u kaan kɔrɔta kosɔbɛ k'a dali ko: 19«E Matigi, Sankolotigi Ala, i k'u ka ɲadonya filɛ! Makari an na, an ka siya ka dɔgɔyako filɛ! An y'i ta ye, i k'an cogo filɛ bii.» 20O kɔ, u ye Akiyɔri hakili sigi ani k'a fo kosɔbɛ. 21Oziyasi bɔra jama yɔrɔ la ka taga n'a ye a ka soo, ka dumuniba labɛn ale ni cɛkɔrɔbaw ye. U ye Isirayɛli ka Ala dali o suu bɛɛ kɔnɔ, ko a k'u dɛmɛ.

ALA KA KUMA

© 2008 Alliance Biblique du Burkina Faso

More Info | Version Index