Search form

Zud 7

Asirikaw be Betuli datugu

1O dugusagwɛ, Olofɛrine y'a fɔ a ka kɛlɛdenw bɛɛ ye ani jama min tun nan'a dɛmɛyɔrɔ, k'u ka wili ka sira minɛ ka taga Betuli faan fɛ, k'u dɔw ka to kuluyɔrɔ tɛmɛsiraw kan, ka Isirayɛlidenw kɛlɛ. 2O loon na, mɔgɔ minw bɛɛ tun ka kɛnɛ, olu bɛɛ wilila ka sira minɛ. Kɛlɛden sennatigi mɔgɔ waa kɛmɛ ni bi wolonwula (170 000), ni sotigi waa tan ni fila (12 000). Minanw, ni minw tun be janto u la, olu niin t'a la. Jama tun ka ca kosɔbɛ. 3U tagara sigi kɛnɛyɔrɔ la Betuli gɛrɛfɛ, u tun ka surun jii bɔyɔrɔ la. U yɛrɛkɛra ka taga jamana faan dɔ fɛ k'a ta Dotayimu fɔɔ Bɛlibayimu, faan dɔ wɛrɛ fɛ, k'a ta Betuli fɔɔ Kiyamɔn, min be Zizireyɛli gɛrɛfɛ.

4Tuma min na Isirayɛlidenw y'a ye k'u ka ca fɔɔ k'a dama tɛmɛ, u hakili ɲagamina kosɔbɛ, u tora k'a fɔ ɲɔgɔn ye ko: «Sisan u bena dugukolo yɔrɔ bɛɛ halaki. Kulujanw wo, kɔkɛnɛw wo, tintinw wo, yɔrɔ si tena se u ka kɛwali kɔrɔ.» 5U kelen kelen bɛɛ y'u ka kɛlɛkɛminanw ta ka tasuma mana u ka sangasow kunna. O kɔ, u tora ka ɲɔgɔn falen kɔlɔsili la o suu la. 6Tile filanan loon, Olofɛrine ko a ka sotigiw bɛɛ ka bɔ ka taga lɔ Betuli Isirayɛlidenw ɲakɔrɔ. 7A tagara tɛmɛyɔrɔw cogoya filɛ minw be yɛlɛ ka taga u ka dugu kɔnɔ, ka munumunu ka taga u ka jii bɔyɔrɔw filɛ. U ye kɛlɛden dɔw to yen k'u ka to ka kɔlɔsili kɛ. Ale yɛrɛ segir'a ka mɔgɔw fɛ. 8Edɔmuw ɲamɔgɔw bɛɛ, ni mowabu kɛlɛdenw kuntigiw, ani kɔgɔjida la kɛlɛkuntigiw gwɛrɛl'a la k'a fɔ a ye ko: 9«An tigi, n'i be sɔn ka mɛnni kɛ dɔɔni anw fɛ, i ka kɛlɛdenw si tena faga. 10Isirayɛliden nunu jigi t'u ka tamanw kan. U be kulu minw kan, u jigi be olu jaɲa le kan. Bari ka yɛlɛ ka se u ka kuluw kunna, o man nɔgɔ. 11Ayiwa, sisan an tigi, kana tilen ka taga u kama, o la, i ka mɔgɔ si tena faga. 12To i ka sigiyɔrɔ la, e n'i ka kɛlɛdenw bɛɛ. I ka baarakɛlaw ka to ka jii bɔyɔrɔw kɔlɔsi kulu jukɔrɔ. 13Bari Betulikaw be jii bɔ o yɔrɔ le la. Minnɔgɔ bena u barika ban, u bena u ka dugu don i bolo. Anw n'an ka mɔgɔw, anw bena bila tɔw ɲa ka yɛlɛ kuluw kunna minw yɔrɔ ka surun, ka to yen janko mɔgɔ si kana se ka bɔ dugu kɔnɔ. 14U bɛɛ bena sa kɔngɔ bolo, cɛɛ fara musow kan, ni denmisɛnw. Sanni an ka se u ma ni murujan ye, u bena ben ka sa u ka dugu forobayɔrɔw la. 15I bena u sara ka juguya, bari u murutila, u ma sɔn ka na bɛɛn ɲini i fɛ.»

16U ka kuma diyara Olofɛrine n'a ka kɛlɛkuntigiw ye, u ye min fɔ, a k'u k'o kɛ. 17Asirikaw mɔgɔ waa duuru (5 000) farala amoniw kan, u bɔra u sigiyɔrɔ la ka taga kɔkɛnɛ na ka taga u ka mɔgɔ dɔw sigi Isirayɛlidenw ka jii bɔyɔrɔw la. 18Edɔmuw ni amoniw tagara sigi kuluyɔrɔ la Dotayimu gɛrɛfɛ. U y'u ka mɔgɔ dɔw ci worodugu ɲafan fɛ ni kɔrɔn fɛ Egerɛbɛli gɛrɛfɛ, min ka surun Kusi, Mɔkimuri kɔɔ daa la. Asiri kɛlɛden tɔw sigira kɛnɛyɔrɔ la ka dugukolo bɛɛ datugu. U ka fanisow n'u ka minanw ye yɔrɔba ta, mɔgɔ nunu tun ka ca kosɔbɛ. 19Isirayɛlidenw ye Matigi, u ka Ala dali kosɔbɛ bari u fari faganin tun lo. U juguw bɛɛ tun y'u lamini, fɔɔ boliyɔrɔ tun te yen. 20Asiri kɛlɛdenw bɛɛ, u ka sennatigiw n'u ka kɛlɛkɛwotorow ani u ka sotigiw tora u lamini na tile bi saba ni naani kɔnɔ.

Oziyasi be Betulikaw jaa gwɛlɛya

Betulikaw y'u ka jii maranin bɛɛ ban. 21Jidingɛw jara, jii minta tun te yen tugu ni mɔgɔ be se ka jii min a sago la, hali loon kelen kɔnɔ, bari u tun bɛ jii tilantilan dɔɔni dɔɔni u kelen kelen bɛɛ cɛ. 22U ka denmisɛnw barika nana ban, musow ni kanbelenw ani sunguruw sigɛnna kosɔbɛ minnɔgɔ bolo fɔɔ u be bɔ ka ben dugu forobayɔrɔw la ni dugu dondaw la. Fanga si tun t'u la tugu. 23Jama bɛɛ, kanbelenw ni musow, ani denmisɛnw, bɛɛ ye ɲɔgɔn lajɛn Oziyasi ni dugu ɲamɔgɔw fɛ. U kulera kosɔbɛ k'a fɔ cɛkɔrɔbaw bɛɛ ɲana ko: 24«Ala le bena tiɲɛ fɔ aw ni anw cɛ! Bari tile fila nin na aw ye kojuguba kɛ an na, sabu aw ma sɔn ka bɛɛn ɲini Asirikaw fɛ. 25Sisan mɔgɔ si te yen k'an dɛmɛ! Ala y'an don u bolo, an bɛɛ bena sa u ɲana, minnɔgɔ tɔɔrɔ kosɔn. 26O la sisan, aw ka Olofɛrine n'a ka kɛlɛdenw wele ka dugu don u bolo, u ka se k'a nafolo cɛ. 27Bari an ka kɛ u ta ye, o ka fisa an ka sa minnɔgɔ bolo. An bena kɛ jɔɔnw ye, nga an bena to nii na, an ka denmisɛnw tena sa an ɲana, an musow n'an ka denmisɛnw nii tena bɔ an ɲana. 28Sankolo ni dugukolo kama, ni an ka Ala tɔgɔ la, an faaw ka Matigi, ale min b'a dimi bɔ an na ka kɛɲɛ n'an ka filikow, ani an faaw ka hakɛ ye, an b'a ɲini aw fɛ ale kosɔn ko aw ka koo kɛ bii ka kɛɲɛ n'an ka fɔta ye.»c

29U bɛɛ lajɛnnin daminɛna ka ŋunuŋunu kosɔbɛ, u y'u kaan kɔrɔta ka Matigi dali. 30Oziyasi y'a fɔ u ye ko: «N balimaw, aw k'aw jaa gwɛlɛya! An ka muɲu tile duuru kɔnɔ tugu. O tile duuru kɔnɔ, Matigi, an ka Ala bena makari an na, a tena an fili pewu. 31Nga ni o loon nunu tɛmɛna ni dɛmɛ ma sɔrɔ, aw ye min ɲini, n ben'o kɛ.»

32A ye jama labila k'u ka taga u ka kɛlɛkɛyɔrɔw la. U tagara u ka dugu laminikogo kan, n'a sangasow la, ka musow ni denmisɛnw bila ka taga u ka soow kɔnɔ. Dugu mɔgɔw fari tun faganin be kosɔbɛ.

ALA KA KUMA

© 2008 Alliance Biblique du Burkina Faso

More Info | Version Index