Search form

Zer 37

Masacɛ Sedesiyasi be Zeremi ɲininga

1- Babilɔni masacɛ Nabukodonozɔri ye Zoziyasi deen Sedesiyasi sigi masaya la Zuda mara kunna, Yoyakimu dencɛ Koniyawuo nɔɔ na. 2Ale, n'a ka dakɔrɔsigiw, ni jamanadenw tun te mɛnni kɛ Masaba ka kuma na kira Zeremi fɛ.

3Masacɛ Sedesiyasi ye Selemiya deen Yewukali ni Sefaniya, sarakalasebaga Maaziya deen ci, k'u ka ta'a fɔ kira Zeremi ye ko: «Masaba an ka Ala daali an ye.» 4O y'a sɔrɔ u tun ma Zeremi datugu kaso la fɔlɔ, a tun be yaalayaala mɔgɔw cɛma.

5O waati la, Ezipiti masacɛ ka kɛlɛbolo bɔra Ezipiti jamana na. Babilɔnika minw tun nana Zeruzalɛmu datugu, olu y'o mɛn minkɛ, u bɔr'a kɔrɔ. 6Masaba kumana kira Zeremi fɛ ko: 7«Ne Masaba, Isirayɛli ka Ala ko aw k'a fɔ Zuda mara masacɛ ye, min y'aw ci ka na ne ɲininga, ko: ‹Ezipiti masacɛ ka kɛlɛbolo min bɔra Ezipiti jamana na k'u be na aw dɛmɛ, olu be kɔsegira u ka jamana na, Ezipiti. 8Babilɔnikaw bena segi ka na dugu nin kɛlɛ, k'a minɛ, k'a jɛni.› 9Ne Masaba ko: ‹Aw kan'aw yɛrɛ nigɛ k'a miiri ko Babilɔnikaw bena taga k'aw to ten, bari u te na taga! 10Hali n'aw sera aw kɛlɛɲɔgɔn Babilɔnika nunu kɔrɔ, k'u tɔɔ to mɔgɔ mandiminin damani ye, olu bena wili u ka fanibuguw kɔnɔ ka na dugu nin jɛni.› »

A be fɔra ko Zeremi ye janfaci ye

11Babilɔnikaw ka kɛlɛbolo tun wilila ka bɔ Zeruzalɛmu tuma min na Ezipiti masacɛ ka kɛlɛbolo kosɔn, 12Zeremi bɔra Zeruzalɛmu ko a be taga Bɛnzamɛn mara la, janko k'a niyɔrɔ minɛ fɛɛn tilanta dɔ la a ka mɔgɔw cɛma. 13A tagara se Bɛnzamɛn ka daa la. Daa kɔlɔsibagaw ɲamɔgɔ dɔ tun be o yɔrɔ la, min tɔgɔ ko Yiriya, Ananiya deen Selemiya deen tun lo. Ale ye kira Zeremi minɛ k'a fɔ ko: «I be farala Babilɔnikaw kan kɛ!» 14Zeremi y'a fɔ ko: «Tiɲɛ tɛ, ne te farala Babilɔnikaw kan dɛ!» Nga Yiriya ma sɔn ka mɛnni kɛ Zeremi fɛ. A y'a minɛ ka taga n'a ye ɲamɔgɔw fɛ. 15Olu dimina Zeremi kɔrɔ kosɔbɛ, u y'a bugɔ ka ta'a datugu sɛbɛnnikɛla Yonatan ka soo kɔnɔ, u ye yɔrɔ min kɛ kasobon ye. 16U ye Zeremi datugu ten kaso la, dugukolo jukɔrɔbon dɔ la. A tora yen fɔɔ waatijan.

Sedesiyasi be dɛn ka Zeremi ye

17Masacɛ Sedesiyasi ye mɔgɔ bila ka taga Zeremi bɔ ka na n'a ye. Masacɛ y'a ɲininga dogo la a ka soo kɔnɔ ko: «Yala, Masaba ye fɛɛn dɔ fɔ wa?» Zeremi y'a jaabi ko: «Ɔnhɔn.» O kɔ, a ko: «Masaba bena e don Babilɔni masacɛ bolo.» 18Zeremi tilara k'a fɔ a ye ko: «Ne ye kojugu jumɛn le kɛ ele n'i ka dakɔrɔsigiw ni jama na, ni aw ye ne don kaso la? 19Kira minw tun b'a fɔra aw ye ko Babilɔni masacɛ tena se aw ma, ani jamana ma, olu be min? 20Masacɛ, ne matigi, sisan, sabali, mɛnni kɛ ne fɛ, ne ka daalili lamɛn. Kana ne bila ka taga Yonatan sɛbɛnnikɛla ka soo tugu, n'o tɛ, ne bena sa yen.»

21Masacɛ Sedesiyasi ye sira di k'u ka Zeremi mara kɔlɔsilikɛbagaw ka luu kɔnɔ, ka to ka burukala kelen d'a ma ka bɔ burujɛnibagaw fɛ loon o loon fɔɔ ni dumuni dɛsɛra dugu kɔnɔ waati min na. A kɛra ten, Zeremi tora kɔlɔsilikɛbagaw ka luu kɔnɔ.

ALA KA KUMA

© 2008 Alliance Biblique du Burkina Faso

More Info | Version Index