Search form

Zer 6

Zeruzalɛmu halakiko

1«Bɛnzamɛn kɔmɔgɔw,

aw ye boli ka bɔ Zeruzalɛmu kɔnɔ!

Aw ka buru fiyɛ Tekowa,

ka taamasiɲɛ dɔ wili sanfɛ ka lɔ Bɛtikɛrɛmu kunna!

Bari bɔnɛ bena bɔ kɔgɔdugu ɲafan fɛ,

halakiliba lo.

2Ee! *Siyɔn, duguɲuman nin,

a ta cɛnna.

3Masacɛ dɔw be nan'a kama n'u ka kɛlɛdenw ye.

U y'u ka fanibuguw lɔ k'a lamini.

Bɛɛ be sigi a sagolayɔrɔ la.

4«Aw k'aw yɛrɛ labɛn a kama!

Aw ye wili an ka ta'a kɛlɛ tilegwan fɛ!

Ee! An kunna man di,

tile be banna kelen,

dibi be donna!

5Aw ye wili an ka ta'a kɛlɛ sufɛ,

k'a ka bonɲumanw ci!»

6Masaba, Setigi b'a fɔra ko:

«Aw ka yiriw tigɛ ka yɛlɛyɔrɔw dilan Zeruzalɛmu kama.

Dugu lo min ka kan ni ɲagwan ye,

tɔɲɔli dɔrɔn lo b'a kɔnɔ.

7Jii be bɔ jibɔyɔrɔ la cogo min na,

a ka juguya be kɛ ten.

Fariya ni cɛnni dama kibaru le be mɛn a faan bɛɛ la.

Tuma bɛɛ ne ɲaa be tɔɔrɔ ni jolidaw le ye.

8Zeruzalɛmu, sɔn ladili ma,

n'o tɛ, ne bena n kɔɔ di i ma,

k'i kɛ kasiyɔrɔ ye,

mɔgɔ te se ka sigi yɔrɔ min na.»

Tulogwɛlɛnw halakiko

9Masaba, Setigi ko:

«Isirayɛli tɔɔ min tora, u bena olu fɛfɛ

i ko mɔgɔ be *ɛrɛzɛn fɛfɛ cogo min na

a tigɛtuma na.

I bolo bɔ tugu ka fɛfɛli kɛ

i ko mɔgɔ min be ɛrɛzɛn fɛfɛ.»

(Zeremi be kumana)

10Ne ka kan ka kuma jɔn le fɛ k'a lasɔmi?

Jɔn be sɔn ka ne lamɛn?

U tulo gwerennin lo,

u te se ka mɛnni kɛ.

U be yɛlɛ Masaba ka kuma na,

a nigɛ dɔɔni yɛrɛ t'u la.

11Masaba ka dimi be ne dusu la haali,

ne te sera k'a muɲu tugu.

(Ala be kumana)

«O dimi bɔ denmisɛnw na bɔlɔn kɔnɔ,

ani kanbelenw ka jɛnkulu la.

Cɛɛw ni musow bena minɛ a la,

cɛkɔrɔbaw, sijantigiw bena minɛ a la.

12- U ka soow, u ka forow n'u ka musow bena kɛ mɔgɔ wɛrɛw ta ye,

tuma min na n bena n bolo wili jamanadenw kama.

Ne Masaba le ko ten.

13Denmisɛn ni mɔgɔkɔrɔbaw bɛɛ b'u ka tɔnɔ dɔrɔn le ɲinina.

Kiraw ni sarakalasebagaw bɛɛ be namara le kɛ.

14- U ma u dɔgɔ don ne ka mɔgɔw ka tɔɔrɔko la.

U tora k'a fɔ ko: ‹Hɛrɛ o hɛrɛ.›

K'a sɔrɔ hɛrɛ te yen.

15O tun ka ɲi ka maloya u ka kɛwalijuguw kosɔn,

nga u ma maloya haali dɔɔni,

u te maloya lɔn tugu.

O kama, u bena kɛ halakininw cɛma,

u bena u yɛrɛ sɔrɔ duguma,

tuma min na ne bena u ɲaa gwan.»

Masaba le ko ten.

16- Masaba ko:

«Aw ye lɔ siraw kan ka filɛli kɛ.

Aw ka ɲiningali kɛ sirakɔrɔw koo la.

Aw ye siraɲuman ɲini k'ale taama,

aw bena lafiya sɔrɔ.

Nga u y'a fɔ ko: ‹An tena ale ta.›

17Ne ye kɔlɔsilikɛbagaw bila aw ye k'aw lasɔmi:

Aw k'aw tulo malɔ buru fiyɛkan na!

Nga aw y'a fɔ ko: ‹An tena an tulo malɔ.›

18O kama, aw siya wɛrɛw k'aw tulo malɔ.

Jama, aw k'a lɔn fɛɛn min bena u sɔrɔ.

19Diɲɛ mɔgɔw bɛɛ k'a mɛn:

Ne bena bɔnɛ lase siya nin ma

u ka miirijuguw kosɔn.

Bari u ma sɔn ka mɛnni kɛ ne ka kuma la,

u banna ne ka sariya la.

20Ne bena mun kɛ n'o ka wusulanw ye?

Minw bɔra Saba jamana la,

ani yiri kasadiman min be bɔ jamanajan la.

Aw ka saraka jɛnitaw man di ne ye fewu,

aw ka sarakaw te n dusu diya.»

21O kama, Masaba ko:

«N bena sentalonfɛnw bila u ɲa,

faaw n'u deenw bena talon o la ɲɔgɔn fɛ,

ni sigiɲɔgɔnmanw ani terimanw.

U bena halaki.»

Halakilikɛla be sira kan

22Masaba ko:

«Siya dɔ natɔ filɛ nin ye

ka bɔ kɔgɔdugu ɲafan fɛ.

Siyaba lo, u wilila ka bɔ diɲɛ daan na.

23Kalaw ni tamanw b'u bolo,

u ka fari, u te hinɛ fewu.

U mankan be i ko jiba ta,

u yɛlɛnin be soow kan.

U jɛnnin be i ko mɔgɔ kelen,

u labɛnnin lo ka na e *Siyɔn kɛlɛ.»

(Jama be kumana)

24An y'o kibaru mɛn,

an fari bɛɛ fagara.

Dusukasi y'an sɔrɔ,

an be tɔɔrɔla i ko tintɔ.

25Aw kana bɔ ka taga kongo la,

aw kana taga siraw kan dɛ.

Bari muruw be aw juguw fɛ,

mɔgɔw jaa be tigɛ faan bɛɛ.

(Ala be kumana)

26«Ne ka mɔgɔw, aw ka dusukasifani don aw kanna,

ka kolonkolon bugurigwɛ kɔnɔ.

Aw ka sanga kɛ i ko mɔgɔ min dencɛ kelen le sara.

Aw ye kasi kosɔbɛ

bari yanni dɔɔni an halakibagaw bena na».

Isirayɛli ye nigɛ tɔnɔtan ye

(Ala be kumana)

27«Zeremi, ne y'i kɛ i ko nigɛ sɛgɛsɛgɛbaga,

i ka ne ka mɔgɔw sɛgɛsɛgɛ,

waasa k'u ka kɛwaliw lɔn.»

(Zeremi be kumana)

28U bɛɛ kɛra mɔgɔmurutininw yɛrɛ le ye,

u be galon la mɔgɔ kan k'a tɔgɔ cɛn.

U dusu be i ko zira, ani nigɛ,

u bɛɛ ye cɛnnikɛlaw ye.

29Numu ka tafiyɛnan be nigɛ fiyɛra

waasa k'a gwan k'a nɔgɔ bɔ.

Numucɛ be nigɛ yelen ko a b'a nɔgɔ bɔ,

a ka baara be kɛ gwansan,

a nɔgɔ tena bɔ ka ye.

30U tɔgɔ le ko Warigwɛ nafabali.

Bari, u kɛra nafabaliw ye Masaba fɛ.

ALA KA KUMA

© 2008 Alliance Biblique du Burkina Faso

More Info | Version Index