Search form

Zer 8

1«O waati la, ne Masaba le ko ten: ‹Zuda mara masacɛw n'a ɲamɔgɔw, ni sarakalasebagaw, ni kiraw, ani Zeruzalɛmukaw kolow bena wɔgɔbɛ ka bɔ o ka kaburuw kɔnɔ. 2O kolow bena yɛrɛkɛ tile kɔrɔ, ni kalo, ani lolow. Minw koo tun diyara u ye, u ye minw bato, ka tugu u kɔ ka to k'u ɲininga, ani k'u bato. Kolo nunu tena cɛ ka don kaburu kɔnɔ tugu, u bena kɛ nɔgɔ ye dugukolo kan. 3Ne ye siyajugu nin gwɛn ka taga yɔrɔ minw na, saya koo bena diya u tɔɔ bɛɛ ye o yɔrɔ la ka tɛmɛ ɲanamanya kan. Ne Masaba, Setigi le ko ten.›

Kɔnɔw b'u ɲaga yɔrɔ ɲini

4«A fɔ u ye ko ne Masaba ko:

‹Ni mɔgɔ benna, a te wili wa?

Ni mɔgɔ filil'a ka sira la, a te segi kɔ wa?

5Mun na siya nin murutinin be?

Mun na Zeruzalɛmukaw be tagara n'u ka murutili ye ɲa?

U be tagara ɲa n'u ka josɔnko ye.

U t'a fɛ ka segi ne ma.

6Ne ye n tulo malɔ ka mɛnni kɛ,

u te kuma bɛrɛ fɔ.

Mɔgɔ si t'a ka juguya dabilara

k'a fɔ ko: Ne ye mun le kɛ ten?

U kelen kelen bɛɛ b'u ka boliboli la,

i ko soo min be tagara kɛlɛkɛyɔrɔ la.

7Cankoli ka kan ka tɛmɛ waati min na,

a yɛrɛ b'o lɔn.

Tubanin ani naganagani, ani kunangwɛ

b'u segiwaati lɔn u layɔrɔw la.

Nga ne ka mɔgɔw te ne Masaba ka sariya lɔn.›

Lɔnnikɛlaw bena maloya

8«Aw be se k'a fɔ cogo di ko:

‹An ye lɔnnikɛlaw ye,

Masaba ka sariya b'an fɛ.›

K'a sɔrɔ sariya karamɔgɔw y'a yɛlɛma ka galon le sɛbɛn.

9Lɔnnikɛlaw maloyara,

u sirannin lo, u minɛna.

U te Masaba ka kuma jati.

U ka lɔnniya be min sa?

Kiraw ni sarakalasebagaw ka filiko

10- «O kama, ne bena u ka musow di mɔgɔ wɛrɛw ma,

k'u ka forow di tigi wɛrɛw ma.

Bari, denmisɛn fara mɔgɔkɔrɔba kan,

u bɛɛ b'u ka tɔnɔ dɔrɔn le ɲinina.

Kiraw ni sarakalasebagaw bɛɛ be namara le kɛ.

11- U ma u sɔbɛ don ne ka mɔgɔw ka tɔɔrɔko la.

U tora k'a fɔ ko: ‹Hɛrɛ o hɛrɛ.›

K'a sɔrɔ hɛrɛ te yen.

Masaba ka dimi

12«O tun ka ɲi ka maloya u ka kɛwalijuguw kosɔn,

nga u ma maloya hali dɔɔni.

O kama, u bena kɛ halakininw cɛma,

u bena u yɛrɛ sɔrɔ duguma,

tuma min na u ɲaa bena gwan.»

Masaba le ko ten.

13Masaba ko:

«Ne b'a fɛ k'u koo ban.

Deen si te *ɛrɛzɛnsun kan,

deen si te torosun kan.

Hali u furaburuw fɔnsɔnfɔnsɔnna.

Ne b'u di mɔgɔw ma minw bena u dɔndɔn.

(Jama be kumana)

14«Mun na an be sigi ka to?

An ka ɲɔgɔn lajɛn k'an ka dugu barikamanw sɛgɛrɛ

waasa ka sa yen!

Bari, Masaba an ka Ala le y'an to saya bolo,

a be bagaji dira an ma minji ye.

Bari an y'a hakɛ ta.

15An be hɛrɛ laɲini, nga fewu.

An be nɔgɔya laɲini,

nga jatigɛ be na.

16U ka soow mankan be mɛnna

Dan mara faan fɛ.

U ka soo cɛmanw kasikan fɛ,

dugukolo bɛɛ be yɛrɛyɛrɛla.

U be nana jamana halakiyɔrɔ,

n'a kɔnɔfɛnw bɛɛ,

ni dugu n'a kɔnɔ mɔgɔw bɛɛ.»

17Masaba ko:

«Ne be saa farimanw cira aw kama,

mɔgɔ ka namara te se minw kɔrɔ.

U bena aw cin.»

Zeremi ka dusukasiko

18Ne dusu kasira kosɔbɛ,

fura t'a la,

fɔɔ ne jigi tigɛra.

19Ne ka mɔgɔw kasikan be bɔra k'u to fɔɔ yɔrɔjan.

U ko: «Masaba te *Siyɔn dugu kɔnɔ tugu wa?

Dugu masacɛ te yen tugu wa?»

(Ala be kumana)

Mun na mɔgɔ nunu be ne dusu dimi

n'u ka josɔnko ye?

Joo minw ye siya wɛrɛw ta ye.

(Zeremi be kumana)

20Sumantigɛ waati tɛmɛna,

tilemana banna,

halibi an do ma bɔ bolo la fɔlɔ.

21Ne ka mɔgɔw ka tɔɔrɔ kosɔn,

ne barika banna.

Ne dusu kasinin lo.

Siranya be n na.

22Fura si te sɔrɔ Galaadi mara la tugu wa?

Furakɛla si te yen wa?

Mun na ne ka mɔgɔw ka diminɔ te ban?

23Ni ne kungolo tun fanin be jii la,

ni n ɲaji tun ka ca kosɔbɛ,

ne tun bena kasi, suu fara tile kan,

n ka mɔgɔ saninw kosɔn.

ALA KA KUMA

© 2008 Alliance Biblique du Burkina Faso

More Info | Version Index