Search form

Zer int

Kunnafoni

Kira Zeremi ye Zuda mara mɔgɔw ka tɔɔrɔko le fɔ fana i ko kira tɔw. K'u bena tɔɔrɔ u ka kojuguw n'u ka josɔnko kama. Nga Zeremi tun be to ka jama ladi k'u ka sɔn u juguw ta ma. O le kosɔn, jama tun be Zeremi jati janfamɔgɔ ye. U y'a tɔɔrɔ kosɔbɛ. Nga, a ye koo minw fɔ a ka kirayakuma na, o koow kɛra a ɲana, ani jama ɲana fana. Nabukodonozɔri ka kɛlɛdenw nana Zeruzalɛmu dugu minɛ, ka Alabatoso ci. Zuda mara masacɛ ni mɔgɔ caaman minɛna ka taga jamana wɛrɛ la.

Ala ye kitiko kuma min fɔ jama koo la ko Zeremi k'o fɔ u ye, o kuma nin y'a hakili ɲagami. Masaba ka kuma tun b'a kɔnɔ i ko tasuma, a tun te se ka je o kan n'a m'a fɔ. Nga tuma dɔ, a ka kuma tun te juguman ye. A ye jama ka kɔsegiko fɔ ka bɔ jamana wɛrɛ ka na. K'u bena sigi hɛrɛ la, ani ko loon dɔ, bɛɛn bena sɔrɔ Ala ni adamadenw cɛ. A ko:

«O loonw tɛmɛnin kɔ, ne bena bɛɛn min kɛ

ni Isirayɛlidenw ye, o filɛ.

Ne bena n ka sariya don u kɔnɔ,

ne ben'a sɛbɛ u dusu kan.

Ne bena kɛ u ka Ala ye,

u bena kɛ ne ka mɔgɔw ye.

Ne Masaba le ko ten.» (31.33)

Kobaba minw fɔra kitabu nin kɔnɔ

Ala be Zeremi wele 1.1-19

Ala bena Zuda mara mɔgɔw ɲaa gwan 2.1—26.24

Zeremi ni kira galontigɛlaw ka koo 27.1—29.32

Ala be segi n'a ka jama ye 30.1—33.26

Zeremi ka baara 34.1—38.28

Zeruzalɛmu dugu ciko 39.1—42.22

Zeremi be taga Ezipiti jamana na 43.1—44.30

Ala be kuma Baruki fɛ 45.1-5

Masaba be siya wɛrɛw jalaki 46.1—51.64

Zeruzalɛmu ciko be ɲafɔ tugu 52.1-34

ALA KA KUMA

© 2008 Alliance Biblique du Burkina Faso

More Info | Version Index