Search form

Zon 2

Zonasi be Ala daali

1- O tuma na, Masaba ye jigɛba dɔ bila ka taga Zonasi kunu. A ye tile saba ni suu saba kɛ jigɛ nin kɔnɔ. 2K'a to jigɛ nin kɔnɔ, a ye Masaba, a ka Ala daali. 3A ko:

«Ka ne to dusukasi la,

ne be kule Masaba nɔɔ fɛ,

a be n jaabi.

Ka ne to lahara,

ne ye weleli kɛ, i ye ne lamɛn.

4I ye ne fili dingɛba kɔnɔ kɔgɔji cɛma,

ne jigira fɔɔ a jukɔrɔ.

Ne tora jii kɔnɔ,

i ka jii n'a ka mankanw bɛɛ be woyora ne kan.

5Fɔɔ ne b'a fɔ ko

ne gwɛnna ka bɔ i ɲakɔrɔ.

O bɛɛ n'a ta,

ne b'a fɛ ka e batoso ye tugu.

6Jii ye ne kunun fɔɔ ne ninakili be ɲini ka lɔ,

dingɛba kɔnɔ jii ye ne tunu.

Kala melekenin be ne kuun na.

7Ne jigira fɔɔ kuluw jukɔrɔ,

dugukolo datugunin bena to ne la tuma bɛɛ.

Nga, ka ne to dingɛba kɔnɔ,

e ye ne kisi,

Masaba, n ka Ala.

8Ne ninakili degunna tuma min na

fɔɔ a tun be ɲini ka lɔ,

ne hakili jigira, ne y'a fɔ ko: ‹Masaba.›

E fana ye n kaan mɛn

k'i to e batoso kɔnɔ.

9Mɔgɔ minw b'u jigi la joow kan,

o fɛɛn fufafu nunu kan,

olu te i ka dɛmɛ sɔrɔ.a

10Ne kɔni, ne bena i tanu ni dɔnkili ye,

ne bena saraka bɔ i ye.

Ni ne ye dajuru ta e ye koo minw na, ne bena olu kɛ.

Kisili be bɔ e Masaba le fɛ.»

11O tuma na, Masaba ye sira di jigɛ ma ko a ka Zonasi fɔɔnɔ. O yɔrɔnin bɛɛ, jigɛ tagar'a fɔɔnɔ k'a bila dugukolo kan.

ALA KA KUMA

© 2008 Alliance Biblique du Burkina Faso

More Info | Version Index