Search form

Zon 3

Zonasi be Ninivukaw waaju

1Masaba kumana Zonasi fɛ tugu ko: 2«Wili ka taga Ninivu, duguba nin, ne bena kuma min fɔ i ye, i k'o lase u ma.»

3O tuma na, Zonasi wilila ka taga Ninivu ka kɛɲɛ ni Masaba ka kuma fɔcogo ye. Ninivu tun ye duguba ye kosɔbɛ. Mɔgɔ tun be tile saba taama le kɛ ka se k'a cɛɛ tigɛ. 4- Zonasi bolibolila a kɔnɔ tile kelen ka to ka wango la ko: «A tora tile bi naani Ninivu be halaki.» 5Dugu mɔgɔw lara Ala la, u ye wango la ko mɔgɔw ka suun don. U ye dusukasifani don. K'a ta fɛntigiw ma fɔɔ ka ta'a bila fantanw na. 6O kibaru sera Ninivu masacɛ ma tuma min na, a wilila ka bɔ a ka masasigilan kan k'a ka fani bɔ ka dusukasifani don ka taga sigi bugurigwɛ kɔnɔ, 7k'a fɔ Ninivukaw ye ko: «Fɛɛn si man kan ka dumuni kɛ, walima ka minni kɛ, mɔgɔ fara begɛnw kan, masacɛ n'a ka dakɔrɔsigiw le ko ten. Mɔgɔ man kan ka taga ni begɛnw ye u dɛndɛyɔrɔ la. 8Mɔgɔw, ni begɛnw ka kan ka dusukasifani don ka Ala daali kosɔbɛ. Mɔgɔ kelen kelen bɛɛ ka nimisa ka faran a ka sirajugu n'a ka kɛwalijuguw la. 9N'a sɔrɔ Ala dusu bena suma, a be makari an na k'a ka ŋaniya tanin dabila, o la an tena halaki.»

10Ala y'a ye k'u b'o kɛra tiɲɛ na, k'u be u ka kɛwalijuguw dabilara, o la, a tun ko a bena kojugu min kɛ u la, a makarila, a m'o kɛ tugu.

ALA KA KUMA

© 2008 Alliance Biblique du Burkina Faso

More Info | Version Index