Search form

Cɛf 12

Efarayimu kɔmɔgɔw be Zɛfite kɛlɛ

1O kɔ, Efarayimu kɔmɔgɔw ye ɲɔgɔn lajɛn ka taga Zurudɛn baji tigɛ ka se Safɔn. U y'a fɔ Zɛfite ye ko: «Mun na e tagara amoniw kɛlɛ n'i ma an wele, an be taga ɲɔgɔn fɛ? An bena i n'i ka soo jɛni ɲɔgɔn fɛ.» 2Zɛfite y'a fɔ u ye ko: «Kɛlɛba tun wilila ne ni n ka jama, ani amoniw cɛ. Ne y'aw wele, aw ma sɔn ka na ne bɔsi. 3Ne y'a ye tuma min na aw tun te nana ka ne dɛmɛ, ne ye n yɛrɛ nii di, ka taga amoniw kɛlɛ. Masaba farala ne kan, ne sera u kɔrɔ. Mun na aw nana ne kɛlɛyɔrɔ la bii?» 4Zɛfite ye Galaadikaw lajɛn ka Efarayimu kɔmɔgɔw kɛlɛ. Galaadikaw sera Efarayimu kɔmɔgɔw kɔrɔ, Efarayimu kɔmɔgɔw tun y'a fɔ ko: «Galaadikaw, aw bolila ka bɔ anw fɛ ka na sigi Manase kɔmɔgɔw cɛma.» 5Galaadikaw tagara Zurudɛn baji tigɛyɔrɔ datugu. Ni Efarayimu kɔmɔgɔ dɔ bolila ka na se k'a fɔ ko u k'ale to a be tɛmɛ, u b'a ɲininga ko a ye Efarayimu kɔmɔgɔw dɔ ye wa. N'o tigi y'a fɔ ko ayi, 6o tuma na u b'a fɔ a ye ko a k'a fɔ ko Sibolɛti, o tigi t'a fɔ ka ɲa, bari a tun te se k'o fɔ, Galaadikaw tun b'a minɛ k'a kaan tigɛ Zurudɛn baji tigɛyɔrɔ la. Efarayimu kɔmɔgɔw mɔgɔ waa bi naani ni fila (42 000) le sara o waati la.

7Zɛfite kɛra Isirayɛlidenw ka ɲamɔgɔ ye saan wɔɔrɔ kɔnɔ. O kɔ, Galaadika Zɛfite sara, u y'a suu don Galaadi mara dugu dɔ kɔnɔ.

Cɛfari Ibisan ni Elɔn ani Abidɔn ka koo

8Zɛfite tɛmɛnin kɔ, Bɛtilehɛmuka Ibisan kɛra ɲamɔgɔ ye Isirayɛlidenw kunna. 9A ye dencɛ bi saba sɔrɔ, ni denmuso bi saba. A ye olu minɛ k'o di mɔgɔw ma furu la minw te a ka fadenyabolo mɔgɔw ye, ka sunguru bi saba minɛ minw te a ka fadenyabolo la, ka n'o di a dencɛw ma. A kɛra ɲamɔgɔ ye Isirayɛlidenw kunna saan wolonwula kɔnɔ. 10O kɔ, a sara, u y'a suu don Bɛtilehɛmu.

11Ale fana tɛmɛnin kɔ, Zabulɔn kɔmɔgɔ Elɔn kɛra ɲamɔgɔ ye Isirayɛlidenw kunna saan tan kɔnɔ. 12O kɔ, a sara, u y'a suu don Zabulɔn kɔmɔgɔw ka mara kɔnɔ dugu dɔ la min tɔgɔ ko Elɔn.

13Ale tɛmɛnin kɔ, Ilɛli dencɛ Abidɔn ka bɔ Pireyatɔn kɛra ɲamɔgɔ ye Isirayɛlidenw kunna. 14Ale dencɛw tun ye mɔgɔ bi naani ye, a mamadencɛmanw tun ye mɔgɔ bi saba. Olu tun be to ka yɛlɛ faliden bi wolonwula kan. A kɛra ɲamɔgɔ ye Isirayɛlidenw kunna saan seegi kɔnɔ. 15O kɔ, Ilɛli dencɛ Abidɔn ka bɔ Pireyatɔn sara. U y'a suu don Pireyatɔn, Efarayimu kɔmɔgɔw ka mara la, amalɛkiw ka kuluyɔrɔ la.

ALA KA KUMA

© 2008 Alliance Biblique du Burkina Faso

More Info | Version Index