Search form

Mise 5

Kisibaga bɔdugu

1- Masaba ko:

«Ele Bɛtilehɛmu Efarata,

ele min ka dɔgɔ Zuda mara duguw cɛma,

mɔgɔ dɔ bena bɔ ele la

min bena Isirayɛli mara ne tɔgɔ la.

A buruju bɔyɔrɔ ka jan,

fɔɔ fɔlɔfɔlɔ mɔgɔw la.»

2O kama, Ala ben'a ka mɔgɔw bila a bolo kɔfɛ

fɔɔ tuma min na, muso min ka kan ka deen wolo,

ale ka deen sɔrɔ.

O tuma na, a badenw tɔɔ min bena to sii la,

olu bena kɔsegi ka na fara Isirayɛliden tɔw kan.

3A bena to a ka jama kunna

k'a mara ni Masaba ka fanga ye,

i ko begɛndɛndɛbaga.

Masaba, a ka Ala ka boɲa ɲɔgɔn bena to a kan.

U bena sigi lafiya la,

bari a tɔgɔ bena bɔ fɔɔ ka se diɲɛ daan na.

4Ale lo bena na ni hɛrɛ ye.

Ni Asirikaw nana don an ka jamana kɔnɔ,

k'an ka yɔrɔ barikamanw minɛ,

an bena kuntigiw ci k'u kɛlɛ.

An bena ɲamɔgɔ caaman ci k'u kɛlɛ.

5- U bena Asiri jamana mara ni murujan ye,

u bena u ka murujanjanw bɔ ka Nɛmurɔdib ka jamana mara.

Ni Asirikaw nana don an ka jamana kɔnɔ k'a minɛ,

an bena bɔ u bolo.

Isirayɛlidenw tɔɔ ka koo

6O tuma na, Yakuba ka soo tɔɔ bena kɛ siya caaman cɛma

i ko komiji, min be bɔ Masaba fɛ,

i ko sanji, min be ben biin kan.

A be jigi adamaden seko t'a la,

a te foyi fɛ ka bɔ adamaden fɛ.

7O tuma na, Yakuba ka soo tɔɔ bena kɛ siya wɛrɛw cɛma,

a bena kɛ jamaba cɛma

i ko jara be kongosogow cɛma cogo min na,

i ko jara kanbelen, sagakulu cɛma.

A mana tɛmɛ yɔrɔ o yɔrɔ,

a be minɛni kɛ, k'a faranfaran

mɔgɔ si te se k'a bɔsi a la.

8Wili e kɛlɛbagaw kama,

e juguw bɛɛ ban ka bɔ yen!

Joow halakiko

9Masaba ko:

«Loon dɔ bena se,

ne bena aw ka soow bɛɛ sii tunu,

n bena aw ka wotorow bɛɛ yɛrɛkɛ.

10Ne bena aw ka jamana dugubabaw halaki,

n bena aw ka dugu barikamanw ci.

11Ne bena subagaya daa faga aw fɛ,

lagwɛlikɛlaw tena kɛ aw fɛ tugu.

12Ne bena aw ka joow ni jokabakuruw halaki ka bɔ aw bolo,

aw tena aw kunbiri gwan aw yɛrɛ ka dilanfɛnw kɔrɔ tugu.

13Ne bena aw ka *Asera jaaw bɔn,

k'aw ka duguw ci.

14Dimikojugu ni fariya fɛ,

siya minw ma sɔn ka mɛnni kɛ ne fɛ,

ne bena n mɔnɛ bɔ olu la.»

ALA KA KUMA

© 2008 Alliance Biblique du Burkina Faso

More Info | Version Index