Search form

Kok int

Kunnafoni

Isirayɛlidenw ye saan bi naani yaalayaala min kɛ kongokolon kɔnɔ, Sinayi kulu ni Kanaan jamana furancɛ la, kitabu nin be o waati koo le yira. O waati la, u ye Isirayɛlidenw mɔgɔda jati siɲɛ fila. O la, dɔw b'a wele ko Nɔnburuw. O kɔrɔ ko jatili.

Kitabu nin tilantilannin lo yɔrɔ saba. Isirayɛlidenw mɔgɔda jatiko fɔra a yɔrɔ fɔlɔ kɔnɔ (1.1—10.10), ni sarakalasebagaw ka baara, olu minw ye Levi ka somɔgɔw ye. Hɔrɔnya ɲanagwɛ min kɛra sisi kabakoman dɔ jigira Ala batoyɔrɔ kan, o fana koo fɔra yen.

Kitabu yɔrɔ filanan kɔnɔ (10.11—21.20), Isirayɛli jama bɔko Sinayi kulu kɔrɔ ka Kanaan jamana sɛgɛrɛ, o koo fɔnin be yen. Gwɛlɛya caaman sɔrɔla. Jama fari fagara tuma dɔ, ka muruti, ka to ka dajukɔrɔkuma fɔ Ala, n'a ka baarakɛla Musa ma. U ye mɔgɔw ci ka taga Kanaan jamana yaala k'a yɔrɔ jati minɛ. Jamanaɲuman lo, nga, Isirayɛlidenw be siran ka taga yen. O la, Ala y'u bila munumunu na saan bi naani, kongokolon kɔnɔ.

Kitabu yɔrɔ sabanan kɔnɔ (21.21—36.13), Isirayɛlidenw sera Zurudɛn baji kɔrɔn fɛ, k'o yɔrɔ masacɛ Siyɔn ni Ɔgi kɛlɛ ka se u kɔrɔ. Mowabu masacɛ be kira Balamu ci ko a ka Isirayɛli jama danga. Nga Balamu y'o koo kɛ i ko Ala tun b'o fɛ cogo min na: a ye duba kɛ jama ye. K'u t'o yɔrɔ la, u ye jama mɔgɔda jati tugu. Zozuwe wolomana ka kɛ Musa nɔtabaga ye. Ala tora ka kuma ni Musa ye ka sarakaw ka sariya dɔw koo fɔ a ye, ka jamana daan tɛmɛtɛmɛyɔrɔ fɔ.

Kitabu nin b'a yira ko Ala le ye Isirayɛli jama woloma. O bɛɛ n'a ta, jama fari be faga, a be muruti Ala n'a ka baarakɛla ma. Ala te o si jati, a be to a ka kantigiya la, ka to k'u tanga, k'u dɛmɛ ka se u juguw kɔrɔ, i ko kira Balamu b'a fɔra cogo min na ko:

«Ala ma minw kɛ dangadenw ye,

ne be se ka olu danga cogo di?

Masaba ma minw bagabaga,

ne bena se k'o tigiw bagabaga cogo di?

Jɔn be se ka Yakuba kɔmɔgɔw daa jati?

U ka ca i ko cɛncɛn.

Jɔn be se ka Isirayɛlidenw tilan naaninan yɛrɛ jati?

Mɔgɔtilenninw be sa cogo min na, a to ne ka sa ten.

Ne labancogo ka kɛ i n'a fɔ olu ta!» (23.8,10)

Kitabu nin tilancogo

Jama mɔgɔda be jati 1.1—4.49

Sariya dɔw, ni sarakalasebagaw kalifako 5.1—8.26

Hɔrɔnya ɲanagwɛ kɛko 9.1—10.10

Jama be wili ka Kanaan jamana sɛgɛrɛ 10.11—21.35

Isirayɛli jama be se Mowabuw ka mara la 22.1—32.42

Isirayɛli jama ye taama min kɛ ka bɔ Ezipiti jamana na fɔɔ Zurudɛn baji daa la 33.1-49

Ala ka ladili dɔw 33.50—36.13

ALA KA KUMA

© 2008 Alliance Biblique du Burkina Faso

More Info | Version Index