Search form

Daniyɛli, girɛkikan na 1

Azariya ka tanulikan

24Ananiya ni Azariya ni Mikayɛli nunu mɔgɔ saba tora ka taama tasuma nin kɔnɔ ka to ka Matigi Ala tanu ani ka barika la a ye.a 25Azariya lɔra tasuma cɛma ka Ala dali. A y'a fɔ ko:

26«Matigi, foli ni tanuli y'i ta ye, an faaw ka Ala. Boɲa ka la i tɔgɔ kan waati bɛɛ. 27Bari, i be koo minw kɛ, a bɛɛ tilennin lo. I ka kɛwaliw bɛɛ bɛnnin lo, e ka sira tilennin lo. I ka kitiw tilennin lo. 28Tiɲɛ na, i ka koo tilennin lo. I ye ɲagwan minw bɛɛ la an kan, ani an faaw ka dugu senuman Zeruzalɛmu kan, o tilennin lo, o fana bɛnna an ka kojuguw sara ma. 29An ye kojugu kɛ, bari an faranna i la, o ye kojugu ye an ye min kɛ. An ka kokɛtaw si ma ɲa. 30An ma i ka fɔtaw bato, an ma sɔn k'u kɛ. I ko an ka min kɛ an ka nafa kosɔn, an ma o kɛ. 31I ye koo minw bɛɛ la an kunna, i ye koo minw bɛɛ kɛ an na, o ka kan n'an ye tiɲɛ na. 32E y'an don an juguw bolo, minw te siran e Ala ɲa. Mɔgɔmurutininw lo, u ka koo ka go haali. E y'an don masa tilenbali bolo, min ka juguya ɲɔgɔn te sɔrɔ dugukolo kan. 33Bii do, an te se k'an daa yɛlɛ, maloya ni dɔgɔya le kɛra i batobagaw n'i ka baarakɛlaw niyɔrɔ ye. 34I tɔgɔ boɲa filɛ, i kana an to an juguw bolo kudayi. Bɛɛn min b'an cɛ, i kan'a to o be cɛn. 35I ka makari an na i teri Ibrayima kama, n'i ka baarakɛla Isiyaka, an'i ka mɔgɔɲuman Isirayɛli kama. 36E tun y'a fɔ olu le ye ko i bena u kɔmɔgɔw caya i n'a fɔ lolow ani kɔgɔji daa la cɛncɛn. 37Matigi, an tɔɔ dɔgɔyara ka tɛmɛ siyaw bɛɛ kan. An kɛra dɔgɔyafɛn ye bii, dugukolo faan bɛɛ la an ka kojuguw kama. 38Ɲamɔgɔ te an fɛ bii bii nin na tugu, kira te yen, kuntigi te yen, saraka jɛnitaw te se ka bɔ, saraka wɛrɛ fana tɛ se ka bɔ, ani suman ta fana, wusulan te se ka jɛni. An tɛ se ka na n'an ka suman deen fɔlɔw ye k'u d'i ma waasa k'i ka nɛɛma sɔrɔ. 39O bɛɛ n'a ta, an ka yɛrɛmajigi, n'an ka hakili yɛlɛma kosɔn, e ka makari an na ka sɔn an na i n'a fɔ sagajigi ni tura jɛnitaw, 40E ka sɔn an ka saraka nin na bii, i n'a fɔ saga caaman caaman tulɔninw. A to an ka se ka tugu i kɔ. Bari, mɔgɔ minw b'u jigi la i kan, maloya te olu sɔrɔ. 41Sisan, an bena tugu i kɔ n'an dusu bɛɛ ye, ka siran i ɲa, 42k'i dali. Kana an maloya, hinɛ an na i ka makariba kosɔn. 43Kabako kɛ k'an kisi. Boɲa la i tɔgɔ kan, Matigi! 44Minw b'i ka baarakɛlaw tɔɔrɔ, maloya ka kɛ olu ta ye. U ka sebagaya nagasi, k'u ka fanga cɛn, k'u maloya. 45U k'a lɔn ko e kelenpe le ye Matigi Ala ye, boɲa be min kan dugukolo faan bɛɛ.»

Daniyɛli tericɛ saba be Ala tanu

46Masacɛ ka mɔgɔ minw tun y'u fili dibi kɔnɔ, olu kɔni tun b'a la ka to ka dɔ fara tasuma kan dɔrɔn, u tun be manan donn'a la, ni tulunɔgɔ, ni binmurumuru, ani lɔgɔ. 47Tasuma manana ka wili dibi sanfɛ fɔɔ ka se mɛtɛrɛ mugan ni naani. 48Babilɔnika minw tun be dibi gɛrɛfɛ, tasuma yɛrɛkɛra ka olu jɛni. 49Matigi ka mɛlɛkɛ tun jigira dibi kɔnɔ Azariya n'a tɔɲɔgɔnw ye, ka tasuma fiyɛ ka bɔ kɛnɛma, 50ka dibi kɔnɔna sumaya i n'a fɔ dugutilama fɔɲɔ. Tasuma ma se u ma fewu. A m'u tɔɔrɔ cogo si la, a ma foyi kɛ u la.

51O tuma na, kanbelen saba nunu y'u kaan kɛ kelen ye k'a daminɛ ka dɔnkili la, ka Ala fo k'a tanu dibi kɔnɔ k'a fɔ ko:

52«Tanuli ka kɛ i ta ye, Matigi an faaw ka Ala.

I ka kan ni foli ni boɲa ye waati bɛɛ!

I tɔgɔɲuman ka kan ni tanuli ni boɲa ye.

A ka kan ni foli ni nɔɔrɔ ye tuma bɛɛ!

53Tanuli ka kɛ i ta ye, i batoso kɔnɔ,

e ka nɔɔrɔ be yɔrɔ min na.

Tanuli ni boɲa ka kɛ i ta ye tuma bɛɛ!

54Tanuli ka kɛ i ta ye,

ele min be yeli kɛ fɔɔ dingɛ juu la

k'i siginin to *serubɛnw sanfɛ.

Foli ni boɲa ye i ta ye tuma bɛɛ!

55Tanuli ka kɛ i ta ye,

k'i to masasigilan kan.

Batoli ni boɲa ka kɛ i ta ye tuma bɛɛ!

56Tanuli ka kɛ i ta ye sankolo la,

batoli ni boɲa ka kɛ i ta ye tuma bɛɛ!

57«Matigi ka danfɛnw bɛɛ, aw ka Matigi tanu!

Aw k'a bato, ka barika la a ye tuma bɛɛ!

58Sankolo ka Matigi tanu!

Sankolo k'a bato, ka barika la a ye tuma bɛɛ!

59Matigi ka mɛlɛkɛw, aw ka Matigi tanu!

Aw k'a bato, ka barika la a ye tuma bɛɛ!

60Sanfɛji ka Matigi tanu!

Sanfɛji k'a bato, ka barika la a ye tuma bɛɛ!

61Matigi ka kɛlɛdenw bɛɛ, aw k'a tanu!

Aw k'a bato, ka barika la a ye tuma bɛɛ!

62Tile ni kalo ka Matigi tanu!

Tile ni kalo k'a bato, ka barika la a ye tuma bɛɛ!

63Lolow ka Matigi tanu!

Lolow k'a bato, ka barika la a ye tuma bɛɛ!

64Sanji bɛɛ, ani komiji ka Matigi tanu!

Aw k'a bato, ka barika la a ye tuma bɛɛ!

65Fɔɲɔ bɛɛ ka Matigi tanu!

Aw k'a bato, ka barika la a ye tuma bɛɛ!

66Tasuma ni funteni ka Matigi tanu!

Aw k'a bato, ka barika la a ye tuma bɛɛ!

67Nɛnɛ ni funteni ka Matigi tanu!

Aw k'a bato, ka barika la a ye tuma bɛɛ!

68Kɔmiji ni sankaba ka Matigi tanu!

Aw k'a bato, ka barika la a ye tuma bɛɛ!

69Suu ni tile ka Matigi tanu!

Aw k'a bato, ka barika la a ye tuma bɛɛ!

70Yeelen ni dibi ka Matigi tanu!

Aw k'a bato, ka barika la a ye tuma bɛɛ!

71Sanbɛrɛ ni nɛnɛ ka Matigi tanu!

Aw k'a bato, ka barika la a ye tuma bɛɛ!

72Jii siminin ni *sanji siminin ka Matigi tanu!

Aw k'a bato, ka barika la a ye tuma bɛɛ!

73Sanmanamana ni sankaba ka Matigi tanu!

Aw k'a bato, ka barika la a ye tuma bɛɛ!

74Dugukolo ka Matigi tanu!

I k'a bato, ka barika la a ye tuma bɛɛ!

75Kuluw ni tintinw ka Matigi tanu!

Aw k'a bato, ka barika la a ye tuma bɛɛ!

76Dugukolo kan yiriw bɛɛ ka Matigi tanu!

Aw k'a bato, ka barika la a ye tuma bɛɛ!

77Kɔgɔji ni bajiw bɛɛ ka Matigi tanu!

Aw k'a bato, ka barika la a ye tuma bɛɛ!

78Jii bɔyɔrɔw ka Matigi tanu!

Aw k'a bato, ka barika la a ye tuma bɛɛ!

79Jigɛbabaw ni jikɔnɔfɛnw bɛɛ ka Matigi tanu!

Aw k'a bato, ka barika la a ye tuma bɛɛ!

80Kɔnɔw bɛɛ ka Matigi tanu!

Aw k'a bato, ka barika la a ye tuma bɛɛ!

81Kongosogow ni begɛnw ka Matigi tanu!

Aw k'a bato, ka barika la a ye tuma bɛɛ!

82Adamadenw, aw ka Matigi tanu!

Aw k'a bato, ka barika la a ye tuma bɛɛ!

83Isirayɛlidenw, aw ka Matigi tanu!

Aw k'a bato, ka barika la a ye tuma bɛɛ!

84Sarakalasebagaw, aw ka Matigi tanu!

Aw k'a bato, ka barika la a ye tuma bɛɛ!

85Matigi ka baarakɛlaw, aw ka Matigi tanu!

Aw k'a bato, ka barika la a ye tuma bɛɛ!

86Mɔgɔtilenninw, aw ka Matigi tanu!

Aw k'a bato, ka barika la a ye tuma bɛɛ!

87Aw mɔgɔɲuman minw majiginin lo, aw ka Matigi tanu!

Aw k'a bato, ka barika la a ye tuma bɛɛ!

88Ananiya, ni Azariya ani Mikayɛli, aw ka Matigi tanu!

Aw k'a bato, ka barika la a ye tuma bɛɛ!

Bari, a y'an kisi jahanama ma,

a y'an bɔsi saya la.

A y'an bɔsi ka bɔ dibi kɔnɔ,

a y'an bɔ tasumaba kɔnɔ.

89Aw ka barika la Matigi ye, bari a ka koo ka di.

A be makari waati bɛɛ.

90Matigi batobagaw bɛɛ, aw ka Matigi Ala tanu!

Ale min be batofɛnw bɛɛ sanfɛ.

Aw k'a tanu, k'a waleɲuman lɔn,

bari a be makari waati bɛɛ!»

ALA KA KUMA

© 2008 Alliance Biblique du Burkina Faso

More Info | Version Index