Search form

Tal 18

1Yɛrɛnafaɲinibaga le be sigi a kelen,

n'i ko i b'a ladi, a be dimi.

2Hakilitigiya man di naloman ye.

Ka se k'a kɔnɔnata fɔ, o le ka d'a ye.

3Juguya be na ni lɛɛbu ye.

Yɛrɛdɔgɔya be na ni maloya ye.

4Mɔgɔ dalakuma ye jiba ye.

Lɔnniya bɔyɔrɔ ye kɔɔ le ye.

5- Ka fara kojugukɛla kan,

ka mɔgɔtilennin jalaki kiti la,

o ma ɲi!

6Naloman dalakuma be na ni kɛlɛ ye.

A ka fɔta be na ni bugɔli ye.

7Naloman daa b'a mako sa.

A daa le ye a yɛrɛ minɛjan ye.

8Nafigi ka kuma be i ko nigɛladumuni,

dumuni diman.

9Mɔgɔ min b'a fari faga a ka baara la,

o ni cɛnnikɛla bɛɛ ye kelen ye.

10Masaba ye dogoyɔrɔ barikaman ye.

Mɔgɔtilennin be boli ka taga yen ka kisi.

11Nafolotigi ka nafolo be a fɛ i ko dugu barikaman.

A ka miiri la, a be i ko kogojan, min b'a lamini.

12Yɛrɛboɲa be na ni cɛnni ye.

Yɛrɛmajigi kɔfɛ ye kunkɔrɔta ye.

13Mɔgɔ min be kuma jaabi k'a sɔrɔ a m'a mɛn ka ɲa,

o tigi ye naloman ye.

A ta ye maloya ye.

14Mɔgɔ hakilisiginin be se bana kɔrɔ.

Nga min hakili cɛnna,

jɔn be se k'ale dɛmɛ?

15Hakilitigi be lɔnniya sɔrɔ.

Lɔnnikɛla b'a tulo malɔ lɔnniyakuma na.

16Bonyafɛn be kɛ sababu ye mɔgɔ te degun.

A b'a tigi dɛmɛ ka se mɔgɔbabaw fɛ.

17Kititigɛyɔrɔ la, mɔgɔ min be kɔn ka kuma,

ale ta bɔnin be tiɲɛ ma,

fɔɔ n'a kɛlɛkɛɲɔgɔn nana kuma tuma min na.

18Kalabon be sɔsɔli ban.

A be setigiw faran ka bɔ ɲɔgɔn na.

19U donna balima min gasi la,

ka gwɛrɛ ale la,

o ka gwɛlɛ ka tɛmɛ ka don dugu barikaman kɔnɔ.

Ka dugu barikaman minɛ,

o ka nɔgɔ ni o sɔsɔli banni ye.

20Mɔgɔ be dumuni kɛ a dalakuma sababu la.

A be balo a ka fɔta barika la.

21Saya ni sii be sɔrɔ adamaden ka kuma sababu la.

Kuma ka di min ye,

o tigi ben'a tɔnɔ sɔrɔ.

22Mɔgɔ min mana muso sɔrɔ,

o tigi ye hɛrɛ sɔrɔ.

O ye Masaba ka dɛmɛ ye a fɛ.

23Dɛsɛbagatɔ be daalili kɛ ni yɛrɛmajigi ye,

nafolotigi b'a jaabi ni kumagwɛlɛn ye.

24Mɔgɔ teriw be se ka na ni bɔnɛ ye.

Nga terisɔbɛ be se ka fisaya ni baden ye.

ALA KA KUMA

© 2008 Alliance Biblique du Burkina Faso

More Info | Version Index