Search form

Tal 5

I yɛrɛ kɔlɔsi kakalamuso la

1N deen, n ka lɔnniyakuma lamɛn,

i tulo malɔ ne ka hakilitigiyakuma na,

2janko i be kɛ lɔnnikɛla ye.

O la, i ka kuma fɔtaw bena kɛ hakilitigi ta ye.

3Bari kakalamuso dalakuma ka di i ko lii.

A ka fɔta nugunin be i ko tulu.

4Nga a ka koo laban ka kunan kosɔbɛ.

A ka fari i ko muru daa fila.

5A be taga ni mɔgɔ ye saya yɔrɔ la.

A be se lahara.

6A be sii sɔrɔ sira min kan, a t'o ta ka ye.

A be tunu sira kan, n'a te bɔ o kala ma.

7Sisan ne deenw, aw ye mɛnni kɛ.

Aw kana ne dalakuma bila fewu.

8Aw yɔrɔ ka jaɲa musokolon na,

aw kana gwɛrɛ a ka soo daa la,

9janko aw barika kana yɛlɛma mɔgɔ wɛrɛ fɛ,

aw sii tile kana don mɔgɔ hinɛbali bolo.

10Lonan dɔw kana aw bololafɛnw kɛ u yɛrɛ ta ye.

Aw ka baara nafa kana kɛ mɔgɔ wɛrɛ ta ye,

11janko aw kana to ka ŋunan a laban na,

aw fanga n'aw barika banwaati la.

12O tuma na sa, aw ben'a fɔ ko:

«A kɛra di ladili tun man di ne ye?

A kɛra di ne ma sɔn mɔgɔw ka ladiliw ma?

13Mun na ne ma mɛnni kɛ n kalanbagaw fɛ?

Mun na ne ma n tulo malɔ n kalanbagaw fɛ?

14Fɔɔ a tora dɔɔni dɔrɔn ne ta be cɛn pewu,

jama cɛma.»

Nisɔndiya n'i kanbelentuma muso ye

15I yɛrɛ ka jii marayɔrɔ jii min.

Jii min be bɔ i ka kɔlɔn kɔnɔ, o min.a

16I ka jii bɔyɔrɔ jii ka kan ka bɔn kɛnɛma wa?

I ka kɔɔ jii ka kan ka bɔn forobayɔrɔ la wa?

17A ka kɛ i kelenpe ta ye,

lonan niin t'a la.

18I ka jii bɔyɔrɔ ka barika sɔrɔ.

E nisɔndiya n'i kanbelentuma muso ye.

19A cɛɛ ka ɲi i ko minan,

a fari k'i wasa waati bɛɛ.

A ka kanuya k'i minɛ tuma bɛɛ.

20N deen, mun na e b'i ɲaa bɔ kakalamuso fɛ?

Mun na i be muso wɛrɛ siin mɔmɔ?

21Tiɲɛ na, Masaba ɲaa be mɔgɔ ka kɛwaliw la.

A b'a taamacogo bɛɛ kɔlɔsi.

22Mɔgɔjugu ka kɛwalijuguw be kɛ a yɛrɛ ma sababu ye.

A ka kojugu be kɛ a dɛrɛfɛn ye.

23A be sa kolɔnbaliya kosɔn.

A be tunu a ka nalomanya dama tɛmɛnin fɛ.

ALA KA KUMA

© 2008 Alliance Biblique du Burkina Faso

More Info | Version Index