Search form

Tal 8

Lɔnniya ka weleli

1- Lɔnniya le te weleli kɛra wa?

Hakilitigiya kumakan le te bɔra wa?

2A be kuluw kan sirada la.

A be sira kunbɛnyɔrɔw la.

3A be dugu dondaw la,

a be o yɔrɔ la, a be pɛrɛnna ko:

4«Ne be aw adamadenw le welela.

Ne kaan be aw mɔgɔw le ma.

5Kolɔnbaliw ka cekuya dege.

Nalomanw ka hakilitigiya ɲini.

6Aw ka mɛnni kɛ, kuma nafaman be n fɛ k'a fɔ.

Ne dalakuma ye kuma tilenninw ye.

7Bari, ne daa be tiɲɛ le fɔ.

Kumajugufɔ man di ne ye.

8Kuma minw be bɔ ne daa la,

o bɛɛ tilennin lo.

Galon t'a la, juguman t'a la.

9U gwɛnin lo hakilitigi fɛ.

U tilennin lo kolɔnbaga fɛ.

10Aw ka sɔn ne ka ladiliw ma

ka tɛmɛ warigwɛ kan.

Aw ka sɔn lɔnniya ma

ka tɛmɛ sanu yɛrɛyɛrɛ kan.

11Bari, lɔnniya ka fisa ni kɔnɔkisɛ ye.

I diyanafɛnw si te se ka suma n'a ye.

Lɔnniya b'a yɛrɛ yira

12«Ne lɔnniya taamaɲɔgɔn ye yɛrɛkɔlɔsi le ye.

Ne ye hakilitigiya sɔrɔ.

13Ka siran Masaba ɲa,

o kɔrɔ ko i ka kojugu goya i yɛrɛ ye.

Yɛrɛboɲa, yada, kojugu, dajugu,

olu koo ka go ne ye.

14Ladili ni jatiminɛ ye ne ta ye,

hakilitigiya ni fanga ye ne ta ye.

15Ne barika la, masaw b'u ka kuntigiya kɛ,

ɲamɔgɔw be sariya tilenninw sigi ne le barika la.

16Ne barika la, faamaw b'u ka fangatigiya kɛ,

ni mɔgɔbabaw, ani kititigɛlaw.

17Ne be n kanubagaw kanu.

Minw be ne yɔrɔ ɲini, olu be ne ye.

18Nafolo ni kunkɔrɔta be ne fɛ.

Fɛnɲuman mɛntaw, ni sɔrɔ be ne fɛ.

19Nafa min be ne la, o ka fisa ni sanu ye,

haali sanu yɛrɛyɛrɛ.

Tɔnɔ min be ne la,

o ka fisa ni warigwɛ ɲanaman ye.

20Ne be tilenninyasira le kan,

ne ka sira ye hɔrɔnyasira le ye.

21Ne be n kanubagaw kɛ fɛntigiw ye.

Ne b'u ka soo nafolo caya.

22- Ne kɛra Masaba ka fɛɛn dannin fɔlɔ ye.

A ye ne dan a ka fɛɛn fɔlɔw ɲa.

23Ne be yen kabini fɔlɔfɔlɔ,

ne be yen kabini dugukolo dantuma na.

24Ne tun be yen, o y'a sɔrɔ kɔgɔji ma kɛ fɔlɔ.

Sanni jii bɔyɔrɔw ka sɔrɔ, ne tun be yen.

25Yanni kuluw ka bɔ,

ne tun be yen.

Sanni tintinw ka sɔrɔ,

o y'a sɔrɔ ne wolola.

26Sanni Masaba ka dugukolo ni kongokɔnɔna dan,

yanni a ka buguri dan, n tun be yen.

27A ye sankolo yɛrɛkɛ tuma min na,

ne tun be yen.

A ye kɔgɔji daan bɔ tuma min na,

ne tun be yen.

28A ye sankabaw kuru ɲɔgɔn kan tuma min na,

ne tun be yen.

A y'a kɛ kɔgɔji tun be bɔra a bɔyɔrɔ la

ni fanga ye tuma min na, ne tun be yen.

29A ye daan bɔ kɔgɔji ye tuma min na,

janko jii kana tɛmɛ o kan, ne tun be yen.

Dugukolo juu sigituma na fana, ne tun be yen.

30Ne tun b'a kɔrɔ baaraɲamɔgɔya la.

Ne tun b'a diyanako kɛra loon o loon.

Ne tun be tolon na a ɲakɔrɔ tuma bɛɛ,

31ka to ka tolon kɛ a ka dugukolo kan.

Ne be nisɔndiya adamadenw cɛma.

Mɔgɔ min dagamunin lo

32«Sisan, ne deenw, aw ka mɛnni kɛ ne fɛ.

Mɔgɔ min be ne ka fɔta bato,

o tigi dagamunin lo.

33Aw ka ne ka ladili lamɛn ka kɛ hakilitigiw ye,

aw kana ban a la.

34Mɔgɔ min be mɛnni kɛ ne fɛ,

min be to ne ka daa la loon o loon,

o tigi dagamunin lo.

35Bari, ni mɔgɔ min ye ne sɔrɔ,

o tigi ye sii sɔrɔ,

o tigilamɔgɔ fana koo be diya Masaba ye.

36Nga, ni mɔgɔ min filila ne ma,

o tigi b'a yɛrɛ ta cɛnna le.

Ne kɔniyabaga be saya le fɛ.»

ALA KA KUMA

© 2008 Alliance Biblique du Burkina Faso

More Info | Version Index