Search form

Dal 138

Ka Masaba tanu ni kɔnɔgwɛ ye

1Dawuda ka dɔnkili dɔ.

Ne b'i bato ni n dusu bɛɛ ye.

Ne b'i tanu sankololafɛnw ɲakɔrɔ.

2Ne be n kunbiri gwan i ka soo kɔnɔ k'i bato

i ka ɲumanya n'i ka tiɲɛ kama,

bari e y'i ka layidu dafa

fɔɔ ka tɛmɛ an ka laɲinitaw kan.

3Tuma min na ne y'i daali, i ye ne jaabi.

I ye ne jigi tugu, barika sɔrɔla.

4Masaba, ni dugukolo kan masaw y'i ka kuma mɛn,

u bɛɛ bena i tanu.

5U bena dɔnkili la Masaba sago la,

bari a ka sebagaya ka bon.

6Masaba, i be sanfɛ, nga i ɲaa be yɛrɛmajigilenw na.

I be yɛrɛboɲalaw lɔn yɔrɔjan.

7Hali ni ne be dusukasi la,

e b'a kɛ n be to nii na,

e ka fanga be ne kisi.

E b'a kɛ n juguw ka dimi be to u la.

8Masaba ben'a kɛ ne ka koow bɛɛ be laban ka ɲa.

E ka ɲumanya te ban abada.

E ye fɛɛn minw dan, Masaba, kana o to.

ALA KA KUMA

© 2008 Alliance Biblique du Burkina Faso

More Info | Version Index