Search form

Dal 148

Ala ka tanu

1Aw ka Masaba tanu.

Aw k'a tanu sankolo kɔnɔ,

aw k'a tanu sanfɛ yɔrɔw la.

2Aw k'a tanu, a ka mɛlɛkɛw bɛɛ,

aw k'a tanu, sanfɛfɛnw bɛɛ.

3Aw k'a tanu, tile ni kalo,

aw k'a tanu, lolow bɛɛ minw be manamana.

4Aw k'a tanu, sankolo yɔrɔ bɛɛ,

aw k'a tanu, sankolo jii bɛɛ.

5U bɛɛ ka Masaba tanu,

bari a kumana dɔrɔn, u bɛɛ danna.

6A y'u sigi u ka to yen kudayi.

A ye sariya dɔ sigi u ye, u man kan ka min cɛn.

7Dugukolo kan fɛɛnw, aw ye Masaba tanu.

Kɔgɔji kɔnɔ fɛɛnw ni jibaw, aw k'a tanu,

8tasuma, ele ni sanbɛrɛ ni *sanji siminin ani bugun,

ni fɔɲɔba, aw minw b'a ka kuma bato.

9Kuluw ni tintinw bɛɛ,

yiri dentaw ni sɛdiriyiribabaw bɛɛ,

10kongosogow ni begɛnw bɛɛ,

fɛɛn fofotaw ni kɔnɔw,

aw ka Masaba tanu.

11Aw k'a tanu, dugukolo kan masaw ni jamanadenw,

ɲamɔgɔw ni dugukolo kan mɔgɔbabaw bɛɛ,

12kanbelenw ni sunguruw,

mɔgɔkɔrɔbaw ani denmisɛnw.

13Aw ka Masaba tanu,

bari ale kelen tɔgɔ le ka bon.

A ka sebagaya be sankolo la ni dugukolo kan.

14A ye barika don a ka jama na.

O ye kunkɔrɔta ye a ɲasiranbagaw bɛɛ fɛ,

a ka jama Isirayɛli fɛ,

min koo ka gwɛlɛ a ma.

Aw ka Masaba tanu.

ALA KA KUMA

© 2008 Alliance Biblique du Burkina Faso

More Info | Version Index