Search form

Dal 65

Ala ka kan ni tanuli ye

1Dɔnkililabagaw kuntigi ka dɔnkili. Dawuda ka dɔnkili dɔ.

2Ala, e ka kan ni tanuli ye *Siyɔn dugu kɔnɔ.

Mɔgɔw ka kan k'u ka dajuruw sara.

3E min be daaliliw mɛn,

adamadenw bɛɛ be na e fɛ,

4n'u ka kojuguw ye.

An ka kojugu kunko ka gwili an ma,

nga, e b'u yafa.

5Ala, e mana sɔn min ma, ko a ka to e ka soo kɔnɔ,

o tigi dagamunin lo.

A ka di an ye k'i ka soo kɔnɔ diya bɔ,

e batoso senuman diya.

6An kisibaga Ala, e ye kantigi ye.

E b'an jaabi ni kɛwali kabakomanw ye,

diɲɛ danyɔrɔ mɔgɔw bɛɛ b'u jigi la ele min kan.

7I be kuluw sigi i ka fanga barika la.

I ye fangatigi ye.

8I b'a kɛ kɔgɔji be mankan dabila,

jikuruw te mankan kɛ tugu,

siyaw ka mankan sumana tɔntɔntɔn.

9Dugukolo daan mɔgɔw kabakoyara i ka kabakow kosɔn.

I be kɔrɔn ni tileben mɔgɔw nisɔndiya.

10I be janto dugukolo la.

I b'a sɔn jii la kosɔbɛ,

i b'a nafa caya kosɔbɛ.

Ala, i ka kɔɔw fanin lo jii la.

Ele le be suman ni dugukolo labɛn.

11I be walanw ɲigi ka ɲa, ka bɔgɔkuruw dakɛɲɛ.

I b'u ɲigi ni sanji ye.

I be barika don sumanw na, u be falen.

12I b'a kɛ saan be yɛlɛma ka ɲa.

I tɛmɛyɔrɔ be ɲa kosɔbɛ.

13Kongokolon biin be ɲa kosɔbɛ.

Nisɔndiyapɛrɛnkan be bɔra tintinw kan.

14Begɛnw fanin be kongo la yɔrɔ bɛɛ,

kɔkɛnɛw yɔrɔ kɛra suman ye.

I tanuli dɔnkili be mɛnna kongo kɔnɔ yɔrɔ bɛɛ.

ALA KA KUMA

© 2008 Alliance Biblique du Burkina Faso

More Info | Version Index