Search form

Sir 1

Sɛbɛ fɔlɔ

Lɔnniya bɔyɔrɔ

1Lɔnniya bɛɛ be bɔ Matigi fɛ,

a b'ale fɛ tuma bɛɛ.

2Jɔn be se ka kɔgɔji dala cɛncɛn jati?

Jɔn be se ka saan tɔnitɔni daaw jati?

Jɔn be se ka tilew duɲɛ daaw bɛɛ jati?

3Jɔn be se ka sankolo jaɲa suma?

Jɔn be se ka dugukolo boɲa suma?

Jɔn be se ka kɔgɔji duɲa suma?

4Lɔnniya danna fɛɛn bɛɛ ɲa.

Hakilitigiya be ye kabini tumajan.

5Lɔnniya be bɔ Ala ka kuma na sankolo la.

6Jɔn le ye lɔnniya lili ye ka ye?

Jɔn be lɔnniya ka kɛta lɔn?

7Lɔnnihakilitigiya yirala jɔn le la?

Jɔn be se ka lɔnniya ka kokɛninw bɛɛ lɔn?

8Fɛɛn kelen le ye lɔnnikɛla ye, siranyafɛn lo!

Masaba lo, a siginin b'a ka masasigilan kan.

9Matigi lo,

ale lo y'a dan k'a dan bɛɛ suma k'a ye.

A y'a di a ka danfɛnw bɛɛ ma.

10A ye adamadenw bɛɛ sɔn ka kɛɲɛ.

A y'a tilantilan a kanubagaw cɛ.

Matigi kanu ye lɔnniya ye, kunkɔrɔta be min na.

A man'a yɛrɛ yira minw na,

a be lɔnniya di olu ma u k'a lɔn.

Matigi ɲasiran

11Boɲa ni kunkɔrɔta be Matigi ɲasiran la,

nisɔndiya ni ɲagaliba bɔyɔrɔ lo.

12Matigi ɲasiran be mɔgɔ dusu wasa kosɔbɛ,

a be mɔgɔ dusu diya k'a nisɔndiya ka sijan d'a ma.

Matigi ɲasiran y'ale yɛrɛ ka difɛn ye.

Ale lo be mɔgɔ bila kanuya sira kan.

13Matigi ɲasiranbaga laban be ɲa.

A be kɛ dubaden ye fɔɔ labanlon na.

14Matigi ɲasiran ye lɔnniya daminɛ ye.

A ɲasiranbagaw ka lɔnniya be daminɛ k'u to u baa kɔnɔ.

15Lɔnniya y'a ka sigiyɔrɔ kɛ adamadenw cɛma kudayi.

A bena to n'u deenw ye kantigiya la.

16Ka siran Matigi ɲa, o ye lɔnniya dafanin sɔrɔ ye.

A nafa be adamadenw wasa.

17A b'u ka soow bɛɛ fa n'u nigɛlafɛnw ye,

a b'u ka bondow fa n'a ka sɔrɔfɛnw ye.

18Lɔnniya ka boɲa bɔyɔrɔ ye Matigi ɲasiran ye.

A be hɛrɛ ni kɛnɛya di mɔgɔ ma.

19Lɔnniya be koo jatiminɛ ni faamuli di mɔgɔ ma.

A be boɲaba la a sɔrɔbagaw kan.

20Lɔnniya lili ye Matigi ɲasiran ye.

A ka kɛtaw be na ni sijan ye.

Yɛrɛminɛ

22Mɔgɔ min be dimi gwansan gwansan,

o tigi te tiɲɛ sɔrɔ.

Mɔgɔ ka dusugwan b'a bila a yɛrɛ makosa la.

23Mɔgɔ min be muɲu,

ale be kɔnɔni kɛ

fɔɔ ka waatiɲuman se,

o kɔ, nisɔndiya be se a ma.

24A be se k'a ka miiriya to a kɔnɔ fɔɔ waatijan.

Mɔgɔ caaman ben'a ka hakilitigiya koo fɔ.

Lɔnniya ni kotilennin

25Talenw lɔn be lɔnniya ka nafolo cɛma.

Ala ɲasiran ka go kojugukɛla ye.

26N'i be lɔnniya fɛ,

Ala ka fɔtaw bato,

Matigi ben'a d'i ma.

27Bari Matigi ɲasiran le ye lɔnniya ni kalan ye.

Kantigiya ni yɛrɛmajigi le ka d'a ye.

28Kana kɛ banbagatɔ ye Ala ɲasiranya la.

Kana sɔn Masaba ma ni kɔnɔ fila ye.

29Kana kɛ filakanfɔla ye mɔgɔw ɲana.

Se i daa minɛcogo la.

30Kan'i yɛrɛ boɲa,

dɔgɔya kana se i ma,

mɔgɔw k'i lɛɛbu.

Bari Matigi bena e ka koow walaka kɛnɛ kan

k'i maloya jama ɲana.

Sabu e ma sɔn ka siran Matigi ɲa.

E kɔnɔ fana fanin be namaran la.

ALA KA KUMA

© 2008 Alliance Biblique du Burkina Faso

More Info | Version Index