Search form

Sir 10

Dugu ɲamɔgɔw ka koo

1Dugu ɲamɔgɔ hakilitigi b'a ka jama ladi ka ɲa.

N'a kɛra hakilitigi ye, a ka kuntigiya be ɲa.

2Dugu ɲamɔgɔ be cogo min na,

a baarakɛɲɔgɔnw be ten fana.

Dugu koo ɲanabɔbaga be cogo min na,

dugumɔgɔw fana be ten.

3Masa kolɔnbali be kɛ a ka jama halaki sababu ye.

Dugu be yiriwa dugu ɲamɔgɔ hakilitigiw sababu la.

4Diɲɛ kuntigiyako be Matigi le bolo.

Masa min ka ɲi,

a b'o sigi a diyanawaati la.

5Adamaden ka ɲataga be Matigi le bolo.

Matigi le be kuntigiya di mɔgɔbaba ma.

Yɛrɛboɲa ma ɲi

6Kana i hakɛ tabaga kɔniya abada.

Kana koo si kɛ ni dimi ye.

7Yɛrɛboɲala koo ka go Matigi ni adamadenw ye.

Tilenbaliya ye kojugu ye u fila bɛɛ fɛ.

8Masaya be bɔ jama dɔ fɛ ka se dɔ wɛrɛ ma

tilenbaliya, ni fariya,

ani malobaliya kosɔn.

9Adamaden min ye bɔgɔ ni bugurigwɛ ye,

mun na a b'a yɛrɛ boɲa?

K'a to nii na yɛrɛ,

a fanin be fɛɛn tolinin na.

10Bana kuntagajan b'a ɲaa don furakɛla la.

Mɔgɔ min ye masa ye bii,

sini ale bena sa do.

11Ni mɔgɔ sara, a tora fɛɛn fofotaw,

ni begɛnw ani tumuw le ma.

12Adamaden ka yɛrɛboɲa be

daminɛ ni ban ye Matigi ma,

ka muruti a Danbaga ma.

13Yɛrɛboɲa daminɛ ye hakɛ ye.

Mɔgɔ min be t'o la,

o tigi be goman le la kosɔbɛ.

O le y'a to,

Matigi ye sigɛnba la u kan, k'u halaki.

14Matigi ye fangatigiw jigi ka bɔ u ka masasigilanw kan,

ka mɔgɔɲumanw sigi u nɔɔ na.

15Matigi ye siya kungwɛlɛ ka koo ban,

ka mɔgɔmajigininw bila u nɔɔ na.

16Matigi ye siyaw ka yɔrɔ ɲagami,

a y'u yuguyugu fɔɔ ka se yɔrɔjan dugukolo jukɔrɔ.

17A y'u halaki k'u bɔ yen pewu diɲɛ kɔnɔ.

A y'u tɔgɔ tunu ka bɔ dugukolo kan.

18Danbaga ma adamaden dan yɛrɛboɲa kama.

Muso ye fɛɛn min wolo,

o man kan ni dusu fariman ye.

Jɔn le ka kan ni boɲa ye?

19Danfɛn jumɛn le ka kan ni boɲa ye?

O ye adamaden ye.

Danfɛn jumɛn le ka kan ni boɲa ye?

O ye Matigi ɲasiranbagaw ye.

Danfɛn jumɛn le ka kan ni dɔgoya ye?

O ye adamaden ye.

Danfɛn jumɛn le ka kan ni dɔgoya ye?

O ye Ala ka sariyaw cɛnbagaw ye.

20Boɲa be masacɛ kan a balimaw cɛma.

Mɔgɔ minw be siran Matigi ɲa,

ale fana be olu boɲa.

21Matigi ɲasiran le be kɛ sababu ye

a be sɔn adamaden ma.

Yɛrɛboɲa le be na n'a ka ban ye a ma.

22Alaɲasiranbagakuraw,

ni lonanw, ani fantanw

ka kunkɔrɔta be Matigi ɲasiran le la.

23Ka fantan hakilitigi nɛni,

o te kotilennin ye.

Ka boɲa la kojugukɛla kan, o man kan.

24Mɔgɔba, ni kititigɛla,

ani dugu ɲamɔgɔ be boɲa sɔrɔ.

Nga u si man bon ni Ala ɲasiranbaga ye.

25Hɔrɔndenw bena kɛ jɔɔn hakilitigi ka baaradenw ye.

Kolɔnbaga tena se ka foyi fɔ o la.

Boɲa ni dɔgɔya

26Kan'i yɛrɛ kɛ lɔnnikɛla ye i ka baara kɛtuma na.

I fɛrɛnin te waati min na,

kan'i yɛrɛ wango.

27Ka baara kɛ ka sɔrɔli kɛ ka tɛmɛ,

o ka fisa ni kɔngɔtɔ yɛrɛboɲala ye.

28N deen, kan'i yɛrɛ boɲa kojugu.

I ka kan ni boɲa min ye, sɔn o dɔrɔn ma.

29Mɔgɔ min be kojugu kɛ a yɛrɛ la,

jɔn be se ka tiɲɛ d'o tigi ma?

Jɔn be sɔn ka yɛrɛlɛɛbubaga boɲa?

30Fantan be boɲa sɔrɔ a ka lɔnniya kama.

Nafolotigi be boɲa sɔrɔ a ka nafolo le kosɔn.

31Ni boɲa lara mɔgɔ kan k'a to fantanya la,

n'a kɛra nafolotigi ye,

o bena kɛ cogo di?

Nga ni mɔgɔ ye dɔgɔya sɔrɔ k'a to nafolotigiya la,

n'a kɛra fantan ye,

o bena kɛ cogo di?

ALA KA KUMA

© 2008 Alliance Biblique du Burkina Faso

More Info | Version Index