Search form

Sir 11

Kana fɛɛn yeta dɔrɔn jati

1Mɔgɔmajiginin ka lɔnniya be kunkɔrɔta d'a ma.

O b'a to a be sigiyɔrɔ sɔrɔ mɔgɔbabaw cɛma.

2Kana mɔgɔ tanu a ka cɛɲa kosɔn.

Kana mɔgɔ kɔniya a fari cogoya kosɔn.

3Liden ka dɔgɔ pannifɛnw cɛma,

nga a be lii min kɛ, o ka di ni fɛɛn bɛɛ ye.

4Kan'i yɛrɛ boɲa e kannafani kosɔn.

Kan'i yɛrɛ boɲa i tandolon na.

Bari, Matigi ka koo ye dabaribanko ye,

o dogonin be adamadenw ma.

5Masa fariman caaman jigira ka sigi duguma,

mɔgɔw hakili tun te min na,

ale ye masafugulan biri.

6Ɲamɔgɔ caaman fɔnna u ka lɔyɔrɔw la.

Mɔgɔba dɔw kɛra jɔɔnw ye.

7I ka kɔn ka koo mɛn ka ɲa fɔlɔ,

ka sɔrɔ ka jalakili kɛ.

Jatiminɛ kɛ fɔlɔ ka sɔrɔ k'a tigi sɔngɔ.

8Kana jaabili kɛ n'i ma mɛnni kɛ ka ɲa,

kana kuma tigɛ mɔgɔ daa la.

9I niin te kɛlɛ min na,

kan'i niin don a la.

Kan'i niin don mɔgɔkolonw ka kɛlɛ la.

Fɛɛn bɛɛ be bɔ Matigi fɛ

10N deen, kana don koo caaman na.

N'i y'u caya, i tena ɲa sɔrɔ u bɛɛ la.

Boliboli yɔrɔ bɛɛ te foyi di mɔgɔ ma.

Koo ka caya e kun,

o be na ni fuu ye.

11Dɔ be tɔɔrɔ ten,

ka sigɛn, ka firinfirin,

o bɛɛ n'a ta, a jigi te fa.

12Dɔ be yen, see t'a ye,

dɛmɛbaga t'a fɛ,

fanga t'a la.

A makoya ka ca!

Nga Matigi ɲaa be ale kan n'a be ɲan'a ma.

A ben'a wili ka bɔ a ka tɔɔrɔ la.

13A be kunkɔrɔta d'a ma,

o be mɔgɔ caaman kabakoya.

14Hɛrɛ ni tɔɔrɔ, saya ni balo,

fantanya ni faamaya be bɔ Matigi le fɛ.

15Hakilitigiya ni koo jatiminɛ,

ani sariya lɔnko be bɔ Matigi fɛ.

Kanuya ni kɛwaliɲuman sira taamako be bɔ ale lo fɛ.

16Fatɔya ni dibidibiko labɛnna kojugukɛlaw le kama.

Kojugu ka di minw ye,

olu be kɔrɔ kojugukɛ la.

17Matigi ka dita be to a ɲasiranbagaw fɛ kudayi.

A ka ɲumanya bena to u kan tuma bɛɛ.

18Mɔgɔ dɔw be yen,

a be kɛ nafolotigi ye wari marali fɛ.

Nga a ka sara bena kɛ min ye,

o filɛ:

19N'a y'a fɔ tuma min na ko:

«N ye lafiya sɔrɔ sisan,

n bena n ka fɛɛnw diya bɔ,»

waati min tora, a m'o lɔn,

a be sa k'a ka nafolo nin to mɔgɔ wɛrɛ ye.

E jigi la Matigi kan

20Kɛ kantigi ye bɛɛn koo la,

i sɔbɛ don a la,

e ka kɔrɔ a la.

21Kojugukɛla ka baara kana e hakili ɲagami,

e jigi la Matigi kan ka jija kosɔbɛ i ka kɛta la.

Ka fantan kɛ fɛntigi ye yɔrɔnin kelen,

o ye koo nɔgɔman ye Matigi ɲana.

22Alaɲasiranbaga ka sara Matigi fɛ, o ye k'a ta ɲa.

A b'a ta ɲa yɔrɔnin kelen.

23Kan'a fɔ ko:

«Ne mako be mun na tugu?

Makoyafɛn jumɛn le be ne fɛ halibi?»

24Kan'a fɔ ko:

«Ne makoyafɛn bɛɛ be n fɛ.

Bɔnɛ jumɛn le be se ka se ne ma?»

25Hɛrɛ loon na,

bɔnɛ te to mɔgɔ hakili la.

Bɔnɛ loon na,

hɛrɛ te to mɔgɔ hakili la.

26Ka mɔgɔ ka kɛwaliw sar'a ye saya loon na,

o ye koo nɔgɔman ye Matigi fɛ.

27Waatijugu be lafiya koo bɔ mɔgɔ hakili la.

Mɔgɔ ka koow be bɔ kɛnɛma a ka koow labantuma na le.

28Kan'a fɔ ko mɔgɔ si dagamunin lo n'a ma sa fɔlɔ.

Mɔgɔ cogo be lɔn a sii bantuma le.

I yɛrɛ kɔlɔsi mɔgɔjugu la

29Kana don ni mɔgɔ sifa bɛɛ ye i ka soo kɔnɔ dɛ.

Bari, namaramɔgɔw tɛmɛcogow ka ca.

30Yɛrɛboɲala be i ko mɔgɔ be wɔlɔn min don jɔɔ la

waasa ka wɔlɔn dɔw sɔrɔ tugu.

A be waatiɲuman lo ɲini k'i minɛ.

31A b'a ka jaan la ka ɲuman yɛlɛma k'o kɛ juguman ye.

Kɛwali minw gwɛnin lo,

ale be fɔta dɔ sɔrɔ o la.

32Tasuma fitini be kɛ tasumaba ye.

Kojugukɛla ka jaanw be joli bɔn.

33I yɛrɛ kɔlɔsi mɔgɔjugu la,

bari, kojugu labɛnbaga lo.

A be se ka tɔgɔcɛn lase i ma.

34N'i ye lonan ladon i fɛ,

a be se ka ɲagamini don i ka yɔrɔ la.

A be se k'i ka mɔgɔw kɛ u be wili i kama.

ALA KA KUMA

© 2008 Alliance Biblique du Burkina Faso

More Info | Version Index