Search form

Sir 14

Hɛrɛsɔbɛ

1Mɔgɔ min ma deli ka fili a ka kuma na,

o tigi dagamunin lo.

Mɔgɔ min nii tɔɔrɔnin te a ka fili jalaki bolo,

o tigi dagamunin lo.

2Mɔgɔ min kɔnɔnako t'a yɛrɛ jalaki,

n'a ma tigɛ a yɛrɛ la ka ye,

o tigi dagamunin lo.

Nigɛjuguya ni tigɛgwɛlɛya

3Nafolo tɔnɔ ye mun ye tigɛgwɛlɛn fɛ?

Nafa jumɛn b'a la ka kɛ nafolotigi ye n'i te wasa?

4Tigɛgwɛlɛn be nafolo lajɛn mɔgɔ wɛrɛ le ye.

Mɔgɔ wɛrɛ bena sigi lafiya la,

a ka nafolo kosɔn.

5Mɔgɔ min b'a yɛrɛ ka koo gwɛlɛya,

o tigi be se k'a nɔgoya mɔgɔ wɛrɛ ye wa?

A ten'a ka nafolo tɔnɔ dumu.

6Mɔgɔ min b'a yɛrɛ tɔɔrɔ,

mɔgɔ si te yen min ka jugu n'ale ye.

O le y'a ka juguya tɔnɔ ye.

7Hali n'a ye koɲuman kɛ, o be kɛ barinako le ye.

Nga a laban na, a ka juguya bena bɔ kɛnɛ kan.

8Nigɛjugutigi ye mɔgɔjugu ye,

ale min b'a ɲaa bɔ mɔgɔ kan k'a lɔgɔbɔ.

9Wasabali niyɔrɔ t'a ɲaa fa.

Nigɛjugu b'a nii tɔɔrɔ.

10Dumuni man di tigɛgwɛlɛn ye.

Dumuni yɛrɛ te sɔrɔ a fɛ.

Nafolo minɛkoɲuman

11N deen, ni see b'i ye,

janto i yɛrɛ la ka ɲa.

Matigi niyɔrɔ d'a ma.

12E hakili to a la ko saya yɔrɔ man jan,

e fana t'a nalon lɔn.

13Koɲuman kɛ i teri ye sanni e ka sa.

Ɲuman kɛ a ye ka kɛɲɛ n'i seko ye.

14Kana i yɛrɛ bali hɛrɛ la min ye tɛmɛta ye.

Kana ban k'i nigɛlakosɔbɛ dɔ kɛ.

15Yala, e ka nafolo tena kɛ mɔgɔ wɛrɛ ta ye wa?

Kala tena bon k'i bololafɛnw tilan wa?

16Sɔnni kɛ, ka sɔrɔli kɛ k'i nisɔn diya,

bari, nisɔndiya te jahanama na.

17Nimanfɛnw bɛɛ be kɔrɔ i ko fani.

«I ka kan ka sa,» o ye sariya ye kudayi.

18Yiri furaburu b'a kɛ cogo min na

dɔ be benna dɔ be bɔra,

adamaden ta be ten fana

filankuru dɔ be tɛmɛ dɔ be na.

19Kɛwali bɛɛ ye tunuta ye.

A kɛbaga be tunu n'a ye.

Lɔnniya ɲini

20Mɔgɔ min b'a sɔbɛ don lɔnniya ɲini la,

min b'a hakili jakabɔ,

o tigi dagamuna.

21Mɔgɔ min be lɔnniya koo jati minɛ a dusu la,

ka miiri a ka koo dogoninw na,

o tigi dagamuna.

22A be tugu a kɔ i ko donso.

A be taga dɛn k'a kɔnɔ a ka tɛmɛyɔrɔ la.

23A be filɛli kɛ a ka fenɛtiri la.

A b'a tulo malɔ a ka daa la.

24A be sigi a ka soo kɔrɔ,

a b'a ka sigiyɔrɔ labɛn a ka kogo kɔrɔ.

25A y'a ka fanibugu lɔ a ka yɔrɔ gɛrɛfɛ.

A sigira hɛrɛyɔrɔ kɔrɔ.

26A y'a deenw bila a suma kɔrɔ.

A sigira o yiri suma kɔrɔ.

27Ale b'a tanga tile funteni ma.

A sigir'a ka nɔɔrɔ kɔrɔ.

ALA KA KUMA

© 2008 Alliance Biblique du Burkina Faso

More Info | Version Index