Search form

Sir 15

Mɔgɔtilennin ka sara

1Matigi ɲasiranbaga be koo kɛ n'a ɲasiran ye.

Sariya karamɔgɔ bena kɛ lɔnnikɛla ye.

2Lɔnniya ben'a kunbɛn i ko bamuso n'a deen.

Lɔnniya ben'a kunbɛn i ko cɛɛ n'a muso.

3A bena balo ni hakilitigiya ye

ka lɔnniya kɛ a ka jii minta ye.

4A ben'a kɛ a tintinyɔrɔ ye, a tena kuru.

A ben'a nɔrɔ a la, a tena maloya.

5A bena kunkɔrɔta d'a ma a ka mɔgɔw cɛma.

A bena fɔta don a daa la jama cɛma.

6A bena nisɔndiya kosɔbɛ.

A bena tɔgɔ sɔrɔ min te ban.

7Nalomanw tena se ka lɔnniya sɔrɔ.

Kojugukɛlaw ten'a ye.

8A b'a yɛrɛ yɔrɔ jaɲa yɛrɛboɲalaw la.

A koo tena to galontigɛlaw hakili la.

9Tanuli ma ɲi kojugukɛla daa la,

bari o ma bɔ Matigi fɛ.

10Lɔnniya le be na ni tanuli ye.

Matigi le b'o don mɔgɔ kɔnɔ.

Adamaden n'a diyanako

11Kan'a fɔ ko:

«Matigi le ye ne bila fili la.»

Bari, koo min man d'a ye, a t'o kɛ.

12Kan'a fɔ ko:

«Ale yɛrɛ le ye ne bila fili la.»

Bari, Matigi mako te kojugukɛla la.

13Juguya sifa bɛɛ ka go Matigi ye.

A ɲasiranbagaw si te se k'o kɛ.

14Ale yɛrɛ le ye mɔgɔ dan fɔlɔfɔlɔ

k'a to a yɛrɛ sago la.

15N'i b'a fɛ, i be se ka sariyaw bato.

E ka tilenninya bena bɔ e ka latigɛ la.

16A ye tasuma ni jii bila i kɔrɔ.

Min y'i diya, i b'o ta.

17Saya ni balo bilara adamaden ɲa.

Ni min ye min diya, o be d'a ma.

18Bari, Matigi ka lɔnniya ka bon.

Fanga b'a la, see b'a ye, a ɲaa be fɛɛn bɛɛ la.

19A ɲaa b'a ɲasiranbagaw kan.

A yɛrɛ be adamadenw ka koow bɛɛ lɔn.

20A ma Alaɲasiranbaliya sira di mɔgɔ si ma.

Kojugukɛ dalilu ma di mɔgɔ si ma.

ALA KA KUMA

© 2008 Alliance Biblique du Burkina Faso

More Info | Version Index