Search form

Sir 16

Alaɲasiranbaliw ka kiti

1Kan'i ɲaa bɔ deenw caya fɛ

k'a sɔrɔ u te foyi ɲa.

Kana nisɔndiya deen Alaɲasiranbali kosɔn.

2Deenw mana caya cogo o cogo,

kana nisɔndiya u kosɔn n'u te siran Matigi ɲa.

3Kan'i jigi la u ka sii sɔrɔ kan,

kan'i bolo la u caya kan.

Deen kelen barikaman ka fisa ni waa kelen ye.

Ka sa deen tanya la,

o ka fisa ni deen Alaɲasiranbaliw ye.

4Dugu be boɲa hakilitigi kelen sababu la.

Nga Alaɲasiranbaliw ka dugu be nagasi le.

5Ne y'o koow bɔɲɔgɔnko ye ni n ɲaa ye.

Min tɛmɛna o kan,

ne y'o kibaru mɛn.

6Ala ka tasuma be wili kojugukɛlaw ka ɲɔgɔnlajɛnyɔrɔ la.

A ka dimi be wili murutibagaw kama.

7A ma yafa fɔlɔfɔlɔ mɔgɔjanw ma do,

minw tun murutira u ka fanga kosɔn.

8A ma Lɔti ka dugu jalakibali to,

ale mɔgɔ minw ka yɛrɛboɲakojugu tun goyar'a ye.

9A ma makari siya la min tun ka kan ka tunu,

minw halakira u ka hakɛ kosɔn.

10Ani kɛlɛden sennatigi waa kɛmɛ wɔɔrɔ (600 000),

minw tun tora u ka dusu gwɛlɛya kosɔn.

11Hali n'u dɔ tun ye kungwɛlɛya kɛ,

k'a fɔ a tora ɲagwanbali,

o be kɛ kabakoko ye.

Bari, ale lo ye makaritigi ni dusubatigi ye.

Yafa see b'a ye kosɔbɛ,

nga a b'a ka dimi fana yɛrɛkɛ.

12A ka makari ka bon cogo min na,

a ka koo gwɛlɛya fana ka bon ten.

A be adamadenw kiti ka kɛɲɛ n'u ka kɛwaliw le ye.

13Kojugukɛla tena se k'a yɛrɛ bɔsi

n'a ka benkannifɛnw ye.

Alaɲasiranbaga ka muɲu bena jati.

14A be ɲuman kɛ tuma bɛɛ,

Nga mɔgɔ kelen kelen bɛɛ bena kiti ka kɛɲɛ n'a ka kɛtaw ye.

15Matigi ye *Faraŋɔn dusu gwɛlɛya

janko a kana sɔn a ta ma.

O la, mɔgɔw ben'a ka kɛtaw lɔn diɲɛ na.

16A ka makari ɲasinna danfɛnw bɛɛ ma.

A y'a ka yeelen ni dibi dɔ di adamaden ma.

Nalomanw ko Ala t'u ye

17Kan'a fɔ ko:

«N bena n yɛrɛ dogo Matigi la.

Jɔn le hakili bena to ne la sanfɛ?

Jama cɛma, ne lɔnnin tɛ.

Danfɛn caaman nunu cɛma,

ne ye mun ye?»

18A filɛ: sankolo kuncɛlaban ni jii jukɔrɔla,

ani dugukolo yɛrɛyɛrɛl'a nako kama.

19A mana kuluw ni dugukolo jusigilan filɛ,

olu be yɛrɛyɛrɛ.

20Nga nin bɛɛ la,

a hakili te n na,

a te ne ka kɛta jati minɛ.

21Ni n ye kojugu kɛ,

mɔgɔ si te n ye.

Hali n ye galon tigɛ dogo la,

si tena bɔ a kala ma.

22Ne ye koɲuman minw kɛ,

jɔn bena o fɔ a ye?

Ne bena mun le sɔrɔ a ka sariya bato la?

23Mɔgɔ min kuun te yen,

ale lo be miiri ten.

Naloman, mɔgɔtununin,

ale lo be miiri nalomanyako la.

SƐBƐ NIN YƆRƆ FILANAN

Ala bulonɔ diɲɛ kɔnɔ

24I tulo malɔ n deen, ka lɔnniya sɔrɔ.

I sɔbɛ don n ka kuma lamɛn la.

25Ne bena i kalan cogoɲuman na.

Ne bena lɔnniya fɔ i ye tigitigi.

26Fɔlɔfɔlɔ, Matigi ye fɛɛnw dan tuma min na,

a y'u bɔbɔ ɲɔgɔn na,

bɛɛ n'a ka yɔrɔ.

27A y'u ka kɛta yira u la kudayi

k'a ta u daminɛ ma,

fɔɔ ka taga se u laban ma waatijan kɔnɔ.

Kɔngɔ t'u minɛ, u te sigɛn.

U t'u ka kɛta dabila fana.

28U si te gosi u tɔɲɔgɔn na.

U te ban a ka fɔta ma.

29O kɔ, Matigi ye filɛli kɛ dugukolo faan fɛ.

A y'a fa n'a ka ɲumanya ye.

30A ye sogo sifa bɛɛ yɛrɛkɛ dugukolo kan.

U bena segi dugukolo la u sanin kɔ.

ALA KA KUMA

© 2008 Alliance Biblique du Burkina Faso

More Info | Version Index