Search form

Sir 17

Mɔgɔ danko

1Matigi ye bɔgɔ kɛ ka mɔgɔ dan.

A b'a kɛ a be kɔsegi yen fana.

2A ye mɔgɔ sii daan latigɛ,

a bena tileda min kɛ, o lɔnnin lo.

A y'a kɛ dugukolo kan fɛɛnw kuntigi ye.

3A ye setigiya d'a ma i ko a yɛrɛ.

A y'a dan ka kɛ a bɔɲɔgɔnko ye.

4A y'a kɛ siranyafɛn ye nimanfɛn tɔw bɛɛ fɛ,

janko a ka kɛ kongosogow ni kɔnɔw kuntigi ye.

5Matigia y'a ka koo duuru ɲɔgɔn d'a ma,

a wɔɔrɔnan kɛra hakilitigiya tilanko ye,

a wolonwulanan kɛra kuma ye,

waasa k'o koo ɲafɔ.

6A ye nɛɛn d'a ma,

ni ɲadenw, ni tulow.

A ye hakili d'a ma janko a ka miiri.

7A ye lɔnniya ni hakilitigiya d'a ma kosɔbɛ.

A ye koɲuman ni kojugu faranfasiko lɔnniya d'a ma.

8A y'a yɛrɛ ɲasiranya don a dusu la

waasa k'a ka kɛwaliɲumanw yira a la.

10Mɔgɔw bena Matigi tɔgɔɲuman fɔ

k'a ka kobabaw lakali.

Sariya ni bɛɛn

11Matigi ma lɔnniya dama di mɔgɔw ma,

a ye sariya d'u ma min b'a to u be to nii na.

12A ye bɛɛn kɛ n'u ye,

min ye tuma bɛɛ koo ye.

A y'a ka latigɛtaw fɔ u ye.

13U y'a ka nɔɔrɔ kabakoman ye.

U tulow donn'a kaan kabakoman na.

14A y'a fɔ u ye ko:

«Aw k'aw yɛrɛ kɔlɔsi tilenbaliya sifa bɛɛ ma.»

Mɔgɔ ka kan ka min kɛ a mɔgɔɲɔgɔn ye,

a y'o cii don u bolo.

Matigi be koow bɛɛ kala ma

15Matigi ɲaa be mɔgɔw ka tɛmɛsiraw la tuma bɛɛ,

u si dogonin te a ɲakɔrɔ.

16Kabin'u denmisɛnman,

u taamacogo b'u bila kojugu la.

U te se k'u ka dusugwɛlɛn nin yɛlɛma k'a kɛ dusuɲuman ye.

Tiɲɛ na, tuma min na Ala ye dugukolo tilan siyaw cɛ,

17a ye ɲamamɔgɔ bila u kelen kelen bɛɛ kunna.

Nga Isirayɛli kɔni ye Matigi le ta ye.

18A b'a balo k'a kolo i ko a deen fɔlɔ,

k'a ka yeelen bɔ a ye k'a kanu,

a t'a bila fewu.

19U ka kɛwaliw bɛɛ b'a ɲakɔrɔ i ko tile.

A ɲaa be u ka tɛmɛsiraw la tuma bɛɛ.

20U ka tilenbaliyako si te dogo a ma.

U ka hakɛ bɛɛ b'a ɲakɔrɔ.

21Nga Matigi ka ɲi,

a b'a ka danfɛnw lɔn.

A t'u bila, a t'u fili, a b'u tanga le.

22Mɔgɔ k'a mɔgɔɲɔgɔn sɔn fɛɛn na,

o ye koba ye Matigi ɲana.

O b'u jati ka tɛmɛ koo bɛɛ kan.

23A laban na, a bena wili k'u sara,

bɛɛ n'a ka kɛta sara.

24Nga minw mana u sɔɔn yɛlɛma,

a be see di olu ma ka kɔsegi.

Minw jigi tigɛnin lo,

a be olu jigi tugu.

Sɔn Matigi ma

25Bɔ e ka hakɛ la,

ka kɔsegi Matigi ma.

Lɔ a ɲakɔrɔ k'a dali ka dɔ bɔ e ka kojuguw la.

26E ka tilenbaliyakow dabila ka kɔsegi Fɛɛn bɛɛ kuntigi ma.

Kojugu koo goya i yɛrɛ ye kosɔbɛ.

Bari, Matigi bena bɔ n'i ye dibi la

ka taga n'i ye kɛnɛ kan kisiyɔrɔ la.

27Jɔn le bena Fɛɛn bɛɛ kuntigi tanu lahara?

Jɔn le bena barika l'a ye nimanw nɔɔ na?

28Ni mɔgɔ sara, a ka kokɛta banna,

a ka mɔgɔ tanu be dabila.

Ni mɔgɔ be nii, na n'a ka kɛnɛ,

a be se ka Matigi tanu.

29Matigi be makari haali.

Minw be kɔsegi a ma,

a be yafa olu ma.

30Bari, ka se koo bɛɛ la,

o fanga te adamadenw bolo,

bari adamaden ye sata le ye.

31Mun le be manamana ka tɛmɛ tile kan,

k'a sɔrɔ a be tunu tuma dɔ?

Kaan te adamaden kɔni ma.

A be kojugu le miiri dɔrɔn.

32Ala be sankolo kɔnɔ fɛɛnw kɔlɔsi,

adamadenw kɔni ye bɔgɔ ni buguri le ye.

ALA KA KUMA

© 2008 Alliance Biblique du Burkina Faso

More Info | Version Index