Search form

Sir 19

1Baarakɛla dɔrɔminla si tena kɛ nafolotigi ye.

Mɔgɔ min mako te kofitiniw na,

o tigilamɔgɔ be tagara benyɔrɔ le.

2Dɔrɔko ni musoko be hakilitigi caaman tunu pewu!

Mɔgɔ min be to ka taga kakalamusow fɛ,

ale te se a yɛrɛ kɔrɔ tugu.

3A bena kɛ tumuw niyɔrɔ ye.

Kuma caaman tigi kunko

4Mɔgɔ min be la koo la joona joona,

o tigi hakili man bon.

Mɔgɔ min be hakɛ kɛ,

o tigi b'a yɛrɛ hakɛ ta le.

5Kojugu be mɔgɔ min nisɔndiya,

o tigi bena jalaki.e

Ka ban o nisɔndiya ɲɔgɔn na,

o ye i nii kisiko ye.

6Kuma caaman ka go mɔgɔ min ye,

o tigi b'a yɛrɛ tanga kojugu ma.

Mɔgɔ min be segi kuma kan,

o ye hakilitan ye.

7I ye koo min mɛn, kan'o lakali,

o la, a kunko tena se i ma.

8Kana dɔ fɔ i teri,

walima e jugu ka koo la,

fɔɔ n'i jenin bena jalaki bɛn i kan.

N'o tɛ, kana foyi fɔ.

9N'a y'o mɛn, a ben'a yɛrɛ kɔlɔsi i la.

Waati dɔ, a ben'a ka juguya yira i la.

10I ye koo dɔ mɛn wa? A to i kɔnɔ.

Kana siran, a tena i kɔnɔbara ci.

11Kuma be naloman kɔnɔ dimi i ko muso tintɔ.

12Biɲɛ be cogo min mɔgɔ woto la,

koo mara be ten naloman kɔnɔ.

13N'i ye juguman dɔ mɛn i teri ka koo la,

ta'a ɲininga, n'a sɔrɔ a m'a kɛ.

N'o y'a sɔrɔ a nɔɔ lo,

a tena o ɲɔgɔn kɛ tugu.

14N'i ye juguman dɔ mɛn e sigiɲɔgɔn dɔ ka koo la,

a ɲininga, n'a sɔrɔ a m'a fɔ e ka mɛncogo la.

N'o y'a sɔrɔ a y'o fɔ,

a tena segi o kan tugu.

15Mɔgɔtɔgɔcɛn ka ca, o kama,

i teri ɲininga.

16Mɔgɔ be se ka fili kuma na

k'a sɔrɔ ŋaniyajugu tɛ.

Jɔn be yen n'a ma fili ka ye kuma na?

17N'i ye juguman dɔ mɛn e sigiɲɔgɔn dɔ ka koo la,

ta'a ɲininga ka sɔrɔ k'a bagabaga.

A to Fɛɛn bɛɛ kuntigi ka sariya ka kɛ.

18Ka sɔn Matigi ta ma,

o ye a ka hinɛ sɔrɔ daminɛ ye.

Lɔnniya le b'an koo diya a ye.

19Ka Matigi ka fɔtaw lɔn,

o ye i sɔnko ye a ka ladili ma.

N'i be Matigi diyanako kɛ,

yiri min be mɔgɔ kɛ sabali ye,

i bena o deen sɔrɔ.

Lɔnnisɔbɛ n'a kolon

20Lɔnniya bɛɛ ye Matigi ɲasiran ye.

Sariya batoko be sɔrɔ lɔnniya bɛɛ la.

A b'a ka setigiya lɔn fana.

21Jɔɔn min b'a fɔ a masacɛ ma ko:

«N tena e diyanako kɛ,»

hali n'a y'a kɛ kɔfɛ,

a ye dimi don a balobaga la.

22Nga, kojugu lɔn te lɔnniya ye.

Kojugukɛlaw ka ladili batoko te hakilitigiya ye.

23Seko dɔ be yen, min koo ka go haali!

Mɔgɔ min t'a ceku don lɔnniya la,

o tigi ye naloman ye.

24Hakilitan min be siran Matigi ɲa,

o ka fisa ni hakilitigi ye

min be sariyaw cɛn.

25Cekuya dɔ be yen

min be mɔgɔ bila tilenbaliya la.

Dɔw be mɔgɔw namara

waasa ka tiɲɛ sɔrɔ.

26I ko mɔgɔ minw b'u yɛrɛ kuru ka taama, u ɲaa sisinin.

Nga namarako le fanin b'u kɔnɔ.

27A b'a kuun surun ka tulogerenya kɛ.

N'i m'i janto a la, a bena see i kɔrɔ.

28O tigilamɔgɔ be kojugu ye k'a to yen bari see t'a ye.

N'o tɛ, n'a see b'a ye, a b'a kɛ le.

29Adamaden be lɔn a cogo fɛ.

Mɔgɔ hakiliman be lɔn a ɲada cogo fɛ.

30Mɔgɔ ka fanidoncogo,

n'a yɛlɛcogo,

n'a taamacogo b'a cogoya yira.

ALA KA KUMA

© 2008 Alliance Biblique du Burkina Faso

More Info | Version Index