Search form

Sir 2

Ala ɲasiran ni gwɛlɛya

1N deen, n'i b'a fɛ ka baara kɛ Matigi ye,

i yɛrɛ labɛn kɔrɔbɔli kosɔn.

2Kɛ mɔgɔtilennin ye,

k'i jaa gwɛlɛya.

Kan'i hakili ɲagami tɔɔrɔ tuma na.

3Nɔrɔ Matigi la, kana fara a la,

i bena e sii bɛɛ kɛ hɛrɛ la.

4Koo o koo mana i sɔrɔ, sɔn o ma.

E dɔgɔyatuma na,

kɛ muɲubaga ye.

5Bari, sanu be sɛgɛsɛgɛ ni tasuma le ye.

Mɔgɔ minw koo ka di Ala ye,

olu ka kan ka tɛmɛ yɛrɛmajigi fɛ.

6E jigi la Ala kan, a bena e dɛmɛ.

Tilenninya sira taama,

e jigi l'a kan.

7Aw minw be siran Matigi ɲa,

aw k'aw jigi l'a ka makari kan.

Aw kana aw mabɔ a la janko aw kana ben.

8Aw minw be siran Matigi ɲa,

aw k'aw jigi l'a kan.

Aw tena fɔn aw ka sara la.

9Aw minw be siran Matigi ɲa,

aw ka la hɛrɛ sɔrɔ la a fɛ,

ni nisɔndiya banbali an'a ka makari.

10Aw ka waati tɛmɛninw

mɔgɔw ka koo jati minɛ.

Jɔn y'a jigi la Matigi kan ka maloya?

Jɔn jijar'a ɲasiran na,

n'a y'o tigi ye k'a to ye?

Jɔn y'a wele n'a m'a tigi jaabi?

11Bari, Matigi be hinɛ,

a be makari.

A be hakɛ yafa,

a be mɔgɔ kisi tɔɔrɔ tuma na.

12Nga bɔnɛ ye siranbagatɔ ni barikatan ta ye,

ani kojugukɛla

sira fila taamabaga.

13Bɔnɛ ye siranbagatɔ ta ye,

minw jigi te Ala kan.

O kama, Ala ten'a tanga.

14Minw fari fagara, bɔnɛ ye olu ta ye.

Matigi bena aw ka koow jati minɛ tuma min na,

aw bena mun kɛ sa?

15Minw be siran Matigi ɲa,

olu te ban a ka kuma ma.

A koo ka di minw ye,

olu b'a ka sira taama.

16Minw be siran Matigi ɲa,

olu b'a diyanakow le ɲini k'u kɛ.

A ka sariya le y'a kanubagaw ka balo ye.

17Minw be siran Matigi ɲa,

olu labɛnnin lo tuma bɛɛ a ɲakɔrɔ.

U b'u yɛrɛ majigi a ɲɔkɔrɔ k'a fɔ ko:

18«An ka to Matigi bolo,

o ka fisa ka to adamaden bolo.

Bari, a ka bon cogo min na,

a ka makari be ten fana.»

ALA KA KUMA

© 2008 Alliance Biblique du Burkina Faso

More Info | Version Index