Search form

Sir 20

Mɔgɔ ladi

1Ni ladili min m'a waati sɔrɔ,

a be kɛ juguman ye.

Ka je tuma dɔ, o be mɔgɔ ka hakilitigiya yira.

2Ka mɔgɔ jalaki, o ka fisa k'i ka dimi mara i kɔnɔ.

3Mɔgɔ min be sɔn a ka fili ma,

ale b'a yɛrɛ tanga tɔɔrɔ ma.

4Mɔgɔ min b'a fɛ tilenninya ka kɛ fanga la,

ale ni cɛɛ kɔbɔnin ye kelen ye,

min b'a fɛ ka sunguru ka sunguruya cɛn.

5Mɔgɔ dɔ b'a ka lɔnniya yira ni kumabaliya ye,

dɔ b'a yɛrɛ koo goya ni kuma caaman ye.

6Mɔgɔ dɔ be je bari jaabi t'a fɛ,

dɔ be je ka waatiɲuman kɔnɔ.

7Hakilitigi be je ka waatiɲuman kɔnɔ.

Nga tɔgɔɲinila ni naloman kɔni be kuma dɔrɔn le.

8Mɔgɔ min ka kuma ka ca,

ale b'a yɛrɛ nigɛ bɔ.

Min be je ka dama tɛmɛ,

o tigi ka koo be goya.

Mɔgɔ sɔn

9Mɔgɔ ka bɔnɛ be kɛ a ma hɛrɛ ye tuma dɔ.

Hɛrɛ dɔ fana be se ka yɛlɛma ka kɛ juguman ye.

10Waati dɔ n'i ye mɔgɔ sɔn, o te nafa lase i ma.

Nga dɔ be nafa caaman d'i ma.

11Kunkɔrɔta dɔ be laban ni dɔgɔya ye.

Dɔgɔya dɔ fana be boɲa lase mɔgɔ ma.

12Mɔgɔ dɔ be se ka fɛɛn caaman san ni wari dɔɔni ye.

Nga a b'u sɔngɔ ɲɔgɔn wolonwula sara.

13Hakilitigi b'a yɛrɛ koo diya ni kuma damani dɔrɔn ye.

Nga naloman b'a ka kuma diman kɛ fu.

14Naloman ka boɲafɛn tena e mako ɲa fewu.

Bari, a b'a juru sarata kɔnɔna min ka ca kosɔbɛ.

Wasabali min bolomako tɛ n'a be sɔnni kɛ,

ale fana be ten.

15A be fɛɛn fitini di,

ka tila ka jalakili caaman kɛ,

a b'a daa waga i ko wangolabaga.

A mana i dɔndɔ bii, sini,

a b'o ɲini i fɛ.

O tigilamɔgɔ ka koo man di.

16Naloman ko: «Teri te ne fɛ.

Mɔgɔ si te ne ka ɲuman kɛnin lɔnna.

Ne ka dumuni kɛbagaw ye ɲumanlɔnbaliw le ye.»

17Nga, mɔgɔw be yɛlɛ o mɔgɔ ɲɔgɔn na.

Se i daa kɔrɔ

18Ka tɛrɛndɛ yɔrɔ dakɛɲɛnin na,

o ka fisa ka fili kuma na.

Mɔgɔjugu bena bari ka ben ten.

19Mɔgɔ kolɔnbali ka koo be i ko

ɲamalɔbali ka koo lakalita tuma bɛɛ.

20Talen mɛn man di naloman daa la

bari, a ten'a fɔ a fɔwaati la.

21Fantanya be dɔw bali hakɛ ma.

U be la ni hakilisigi ye.

22Dɔ be bɔnɛ a nii na adamadenya kama.

A be bɔnɛ a la naloman dɔ kama.

23Dɔ b'a daa di a teri ma adamadenya kosɔn,

o kɔ, u be kɛ ɲɔgɔn juguw ye.

Galontigɛ

24Galon be i ko nɔgɔ,

adamaden kan.

A be sɔrɔ kolɔnbaliw le kan.

25Soon ka fisa ni galontigɛlawara ye.

Nga u fila bɛɛ be tagara halakiyɔrɔ le.

26Galontigɛla ka koo be na ni maloya le ye.

A ka maloya b'a kunna tuma bɛɛ.

Hakilitigiya

27Hakilitigi mako be kuma dɔɔni dama la a ka koo be ɲa.

Kolɔnbaga koo ka di mɔgɔbabaw ye.

28Mɔgɔ min be dugukolo sɛnɛ,

ale bena suman ton.

Mɔgɔ min koo ka di mɔgɔbabaw ye,

ale ben'a ka tilenbaliyakow yafa sɔrɔ.

29Bonyafɛn ni fɛnditaw be lɔnnikɛla bali ka yeli kɛ.

O be kɛ a daa sanfɛn ye min b'a bali ka jalakili kɛ.

30Lɔnniya dogonin,

ani nafolo dogonin,

o fila bɛɛ be mun le ɲa sa?

31Mɔgɔ min b'a ka nalomanya dogo,

o ka fisa ni lɔnniya dogobaga ye.f

Mɔgɔ ka to Matigi yɔrɔ ɲini la kudayi,

o ka fisa k'i ka diɲɛlatigɛ kɛ ten, ni kuntigi t'i la.

ALA KA KUMA

© 2008 Alliance Biblique du Burkina Faso

More Info | Version Index