Search form

Sir 21

Boli kojugu ɲa

1N deen, i ye hakɛ dɔ kɛ wa?

Kan'a ɲɔgɔn kɛ tugu.

E filila koo minw na ka kɔrɔ, olu yafa dali.

2I be boli saa ɲa cogo min na, boli kojugu ɲa ten.

Bari, n'i gwɛrɛl'a la, a ben'i cin.

A ɲiiw be i ko jara ta, minw be mɔgɔ nii bɔ.

3Filiko kelen kelen bɛɛ be i ko murujan daa fila,

a mana mɔgɔ tigɛ, a nɔɔ te suma.

4Yɛrɛboɲa, ni fariya be nafolo cɛn.

A kɛra ten, yɛrɛboɲala n'a ka soo bena halaki.

5Ala be fantan ka dalikan mɛn.

A fana b'a jaabi joona joona.

6Mɔgɔ min te sɔn ladili ma,

o tigi be kojugu sira kan.

Mɔgɔ min be siran Matigi ɲa,

o tigi b'a dusu yɛlɛma.

7Mɔgɔ min be se kuma na kosɔbɛ,

o tigi lɔnnin be yɔrɔ bɛɛ.

Nga hakilitigi b'a dɛsɛyɔrɔ lɔn.

8Mɔgɔ min b'a ka soo lɔ ni mɔgɔ wɛrɛ ka nafolo ye,

a be i k'o tigi be kabakuruw le lajɛnna

a yɛrɛ kaburu lɔ kama.

9Alaɲasiranbaliw ka jɛnkulu be i ko kala tonnin,

u laban be mana tasuma na le.

10Kojugukɛlaw ka tɛmɛsira dakɛɲɛnin lo,

kabakuruw te yen.

Nga a laban na, lahara dingɛ be yen.

Kolɔnbaga ni naloman

11Mɔgɔ min be sariya bato,

o tigi be kɛ a yɛrɛ ta ye.

Matigi ɲasiran be lɔnniya di.

12Mɔgɔ min te se foyi la, o tigi koloko be gwɛlɛya.

Seko kelen be yen, min be na ni tɔɔrɔ caaman ye.

13Kolɔnbaga ka lɔnta ka ca,

i ko baa fanin.

A ka ladili be i ko jiɲuman bɔyɔrɔ.

14Naloman kɔnɔ be i ko fiyɛ cinin,

a be fɛɛn o fɛɛn kalan,

a te se k'o si mara.

15Mɔgɔkalannin mana hakilitigiyakuma mɛn,

a be sɔn a ma k'a yɛrɛ hakili jagabɔ n'a ye.

Mɔgɔkolon man'a mɛn,

a koo be goy'a ye,

a b'o fili kɔfɛ.

16Naloman ka kuma be i ko doni, taamasira kan.

Nga kuma diman be sɔrɔ hakilitigi daa la tuma bɛɛ.

17Jama ka ɲɔgɔnlajɛnyɔrɔ la,

mɔgɔw b'a fɛ ka mɛnni kɛ hakilitigi le fɛ.

U be to ka miiri a ka kumaw na.

18Bonkolon be cogo min na,

lɔnniya be ten fana naloman fɛ.

Hakilitigi ka koo jatiminɛnin b'a fɛ

i ko kumakolon.

19Kolɔnbali fɛ, kalan be i ko jɔrɔkɔ a seenw na,

u be i ko nigɛjɔrɔkɔ le donna a kinibolo la.

20Naloman be yɛlɛko ni fanga le ye.

Nga hakilitigi be yɛlɛko dɔɔni dɔrɔn.

21Masirifɛn sanulaman be cogo min na,

kalan be ten hakilitigi fɛ.

A be i ko bololanigɛ, a kinibolo la.

22Naloman be girin le ka don soo kɔnɔ.

Nga kolɔnbaga be don yen ni cogoɲuman ye.

23Naloman be to bonda la ka filɛli kɛ a kɔnɔ.

Nga hakilitigi be dan kɛnɛma.

24Mɔgɔkuntan le be dɛn ka mɛnni kɛ daa la,

nga o ye maloyako ye hakilitigi fɛ.

25Kuma caaman tigi be mɔgɔ wɛrɛ ka kuma le ta ka to k'o fɔ.

Hakilitigi b'a ka kuma jati minɛ fɔlɔ.

26Naloman be kuma fɔlɔ ka sɔrɔ ka miiri.

Hakilitigi be miiri fɔlɔ ka sɔrɔ ka kuma.

27Alaɲasiranbali man'a kɛlɛbaga danga,

a y'a yɛrɛ le danga.

28Mɔgɔ tɔgɔ cɛnbaga b'a yɛrɛ le naraka.

A b'a yɛrɛ koo goya a gɛrɛfɛmɔgɔw ye.

ALA KA KUMA

© 2008 Alliance Biblique du Burkina Faso

More Info | Version Index