Search form

Sir 22

Salabagatɔ ka koo

1Salabagatɔ be i ko kabakuru,

boo be min kan.

A koo ka go mɔgɔ bɛɛ ye.

2Salabagatɔ be i ko bokuru.

Mɔgɔ min magar'a la,

ale b'a tigɛ ko.

Denkolonw ka koo

3Ka kɛ denkolon facɛ ye,

o ye maloya ye.

Ni denmuso lo, o ta ka jugu.

4Denmuso hakilitigi be cɛɛ sɔrɔ.

Denmusokolon kɔni b'a wolobaga dusu kasi.

5Denmuso malobali be maloya bil'a facɛ n'a furucɛ la.

U fila bɛɛ le ben'a dɔgɔya.

6Kumakolon be i ko fɔlikɛminanw mankan, sangayɔrɔ la.

Busan ni ladili ye hakilitigifɛn ye tuma bɛɛ.

7Deen minw b'u ka balo sɔrɔ,

ani ka taama hɔrɔnya la,

olu b'a kɛ mɔgɔw be ɲinɛ

k'u wolobagaw tun te nafolotigiw ye.

8Deen malobali minw be mɔgɔ dɔgɔya,

ani ka kumakolonw fɔ,

olu b'u wolobagaw ka boɲa nagasi.

Naloman te ladita ye

9Naloman ladiko ni daga cinin nɔrɔko bɛɛ ka kan,

walima sinɔgɔbaga kununko,

min ka sinɔgɔ digir'a la.

10Ka baro kɛ ni naloman ye,

ani ka baro kɛ ni sinɔgɔbaga ye,

o bɛɛ ka kan.

A laban, a ben'a fɔ i ye ko:

«E ko dii?»

11Kasi mɔgɔ ka sayako la,

bari a ye yeelen to.

Kasi naloman kosɔn,

bari hakili t'a fɛ.

Kana kasi kojugu mɔgɔ ka saya la,

bari ale ye lafiɲɛ sɔrɔ.

Nga naloman ka koo ka jugu ni saya ye.

12Sanga mɛnni ye tile wolonwula ye.

Nga naloman ni Alaɲasiranbali ka dusukasi ye

u sii bɛɛ ta ye.

13Kana kuma caaman kɛ ni naloman ye dɛ!

Kana sira kelen ta ni hakilitan ye!

N'o tɛ, a bena i hakɛ ta n'a ma bɔ a kala ma.

I yɛrɛ kɔlɔsi koo kan'i sɔrɔ.

A kana i nɔgɔ a firinfirintɔ.

E mabɔ a la n'i b'a fɛ ka hɛrɛ sɔrɔ,

a ka nalomanya kana i tɔɔrɔ.

14Fɛɛn jumɛn le ka gwili ni nigɛkuru ye ni naloman tɛ?

15Kɔgɔbɔɔrɔ, ni cɛncɛn,

ani nigɛbere ta

ka nɔgɔ ni naloman ta ye.

16Ni boon kuun birila ka ɲa, sanfɔɲɔ t'a cɛn,

o cogo kelen na, mɔgɔ min ye koo miiri ka ɲa,

ale ka ŋaniyasɔbɛ te cɛn ka ye.

17Mɔgɔ min ka ŋaniya tintinnin be miiriɲuman kan,

o tigi be i ko kogo min mɔna ka ɲa kosɔbɛ.

18Kabakurumisɛn minw be la kogo sanfɛ,

sanfɔɲɔ be olu ta cogo min na,

o cogo kelen na, naloman siranbagatɔ ka ŋaniya tanin

te se ka ɲa jatigɛko dɔ ɲafɛ.

Terisɔbɛ

19N'i ye mɔgɔ ɲaden bugɔ,

a ɲaji be bɔ.

N'i ye mɔgɔ dusu dimi,

o tuma na a kɔnɔnakow be ye.

20N'i ye kɔnɔw bon ni kabakuru ye, u be van.

N'i y'i teri kɔrɔfɔ, teriya be cɛn.

21N'i ye murujan bɔ i teri kama,

kan'i jigi tigɛ, aw be se ka kɔsegi ka bɛn.

22N'i daa sera i teri ma,

kana siran, bɛɛn bena se ka sɔrɔ.

Nga nɛnili, ni dɔgɔya, ni gundo walakako,

ani ka dibidibiko kɛ a la,

olu le be teriya cɛn pewu.

23Jija e tɔɲɔgɔn ka la e la,

k'a to fantanya la,

janko, n'a kɛra fɛntigi ye,

e fana ka dɔ sɔrɔ a fɛ.

A ka sigɛn tuma na,

kɛ a fɛ kantigi ye,

janko, a mana cɛɛn ta,

ele ka niyɔrɔ sɔrɔ a fɛ.

Bari, mɔgɔw be mɔgɔ min filɛ fantan ye,

mɔgɔ man kan k'ale mafiɲɛya,

walima k'i ɲaa bɔ fɛntigi naloman fɛ.

24Daga funteni, walima sisi yetɔ b'a yira

ko tasuma be yen cogo min na,

o cogo kelen na,

sanni joli be bɔn, nɛnili be kɔn.

25N tena maloya ka n teri tanga.

N tena boli k'a to fewu.

26Ni koo ye n sɔrɔ a kosɔn,

minw bɛɛ mana o mɛn,

u bɛɛ bena u yɛrɛ kɔlɔsi a la.

Yɛrɛminɛ

27Ne bena kɛ di ka n daa minɛ sa?

N bena kɛ di ka n daa tugu,

n ka kuma kana n mako sa,

ani a kana n don kunko la?

ALA KA KUMA

© 2008 Alliance Biblique du Burkina Faso

More Info | Version Index