Search form

Sir 23

1Matigi, ne Faa, ne nii tigi,

kana ne to n daa bolo,

kan'a to a be ne don koo la.

2Jɔn le bena ne ka miiriyaw kolo?

Jɔn le bena ne dusu kolo lɔnniya ye?

Janko u kan'a kɛ ne be fili,

u kana ne bila kojugukɛ la,

3janko n ka filiw ni n ka hakɛ kana caya kojugu.

Ne kana ben o sababu fɛ n kɛlɛbaga ɲafɛ,

ne jugu kan'a yɛrɛ boɲa o kosɔn.

4Matigi, ne Faa, ne nii tigi,

kan'a to ne nigɛlako be caya.

5Ne kisi nigɛjugu ma.

6Kan'a to farisogo nigɛw ni nugubatɔya

ka fanga sɔrɔ ne kan.

Kan'a to malobaliyako be diya ne ye.

Kana kali

7Ne deenw, aw ka se aw daa minɛcogo la.

Mɔgɔ o mɔgɔ mana ladili nin bato,

o tigi tena jalaki abada.

8Kojugukɛla yɛrɛ daa le b'a di.

Mɔgɔlɔgɔbɔla ni yɛrɛboɲala daa le b'u ben.

9Kali, walima ka Ala tɔgɔ wele,

o kana kɛ i delinanko ye.

10Ayiwa, baaraden min kuntigi ka jugu,

bugɔlinɔ te fɔn ale fari kan cogo min na,

o cogo kelen la, mɔgɔ min be kali

ani ka Ala tɔgɔ wele tuma bɛɛ,

o tigi te to hakɛtan ye fewu.

11Mɔgɔ min be kali tuma caaman,

ale be dɔ le far'a ka fili kan.

Busan yɔrɔ te jaɲa ale ka soo la.

N'a kalil'a kunfɛ,

a ka hakɛ be ben a yɛrɛ kunna.

N'a kalila naganaga la,

a ka hakɛ be caya.

N'a kalila gwansan le,

a kuun te bɔ pewu,

nga a ka soo bena to tɔɔrɔ la.

Kumakolon ma ɲi

12Kumacogo kelen be yen,

min ni saya ye kelen ye.

O te fɔta ye Isirayɛlidenw cɛma.

Bari, Alaɲasiranbaga te sɔn o ɲɔgɔn ma.

U b'u yɛrɛ mabɔ o hakɛ nin ɲɔgɔn na.

13Kan'a to i daa be deli malobalikuma la,

bari, o b'i don hakɛ la.

14E hakili to i faa n'i baa la,

k'i to mɔgɔbabaw cɛma.

N'o tɛ, k'i to yen,

i be se ka ɲinɛ e yɛrɛ kɔ u ɲana.

I delilako b'i bila malobalikuma fɔ la.

O tuma na, i ben'a fɔ ko n'e tun ma wolo,

k'o tun ka fisa,

ani i bena e wololon danga.

15Mɔgɔ min delila kumakolon fɔ la,

o tigi tena se ka ladi a sii bɛɛ la.

Kakalaya

16Mɔgɔ sugu dɔw be yen,

minw be hakɛ kɛ ka fara ɲɔgɔn kan.

Dɔ wɛrɛw be dimi le ɲasin u yɛrɛ ma dɔrɔn.

U ka nigɛla be mana i ko tasuma,

a tena faga n'a ma mana ka ban.

Mɔgɔ min b'a yɛrɛ farisogo bila kakalaya la,

o tigi te tila n'a mako ma sa.

17Muso sugu bɛɛ ta ka ɲi cɛkolon fɛ.

A tena faran la ni saya tɛ.

18Cɛɛ tilenbali a muso ye be to k'a fɔ ko:

«Jɔn le ɲaa b'an na?

Dibi donna ka n lamini.

Kogo kɛra ka n koori.

Mɔgɔ si te n yera,

n bena siran jɔn ɲa?

Fɛɛn bɛɛ kuntigi tena n ka hakɛw jati tugu.»

19A be siran adamadenw ɲa,

nga a m'a lɔn ko Matigi ɲaa be yeli kɛ

ka tɛmɛ tile yeelen kan siɲɛ waa tan.

A ɲaa be adamadenw ka kɛwaliw bɛɛ la.

A ɲaa be yeli kɛ hali logologow la.

20A be fɛɛn bɛɛ lɔn, sanni a k'u dan.

A ɲaa b'u kan fana u tununin kɔ.

21O tigi hakili te waati min la dɛ,

a bena minɛ o tuma le la.

A ɲaa bena gwan dugu forobayɔrɔw la.

Jatɔmuso ka koo

22Jatɔmuso ta be ten fana,

ale min be deen wolo cɛɛ wɛrɛ ye.

23A fɔlɔ, muso nin ye Fɛɛn bɛɛ kuntigi ka sariya cɛn.

O kɔ, a filil'a cɛɛ ma.

A sabanan, a ye ɲamɔgɔya kɛ ka kɛ kakala ye,

a ye cɛɛ wɛrɛ ka deenw wolo a ye.

24U bena bɔ n'a ye jama cɛma k'a kiti.

U bena jatiminɛ kɛ a deenw kosɔn.

25U ben'a deenw gwɛn ka taga.

Deenw nunu tena niyɔrɔ si sɔrɔ.

26Muso nin bena danga le to a kɔ.

Mɔgɔw tena ɲinɛ o malobaliyako nin kɔ abada.

27Minw tora sii la,

olu ben'a lɔn ten

ko fɛɛn si man fisa ni Matigi ɲasiranya ye,

fɛɛn si man di k'a ka sariya batoli bɔ.

ALA KA KUMA

© 2008 Alliance Biblique du Burkina Faso

More Info | Version Index