Search form

Sir 24

SƐBƐ NIN TILAN SABANAN

Lɔnniya makiri

1Lɔnniya b'a yɛrɛ makiri.

A b'a yɛrɛ boɲa a ka jama cɛma.

2A be kuma ta Fɛɛn bɛɛ kuntigi ka mɔgɔw cɛma

k'a yɛrɛ makiri.

3Ko: «Ne bɔra Fɛɛn bɛɛ kuntigi daa la,

i ko bugun, ka se diɲɛ yɔrɔ bɛɛ.

4Ne tun be sankolo sanfɛ.

Ne ka masasigilan bilanin tun be sankaba la.

5Ne ye sankolo yɔrɔ bɛɛ yaala,

ne munumununa jiba jukɔrɔ.

6Ne ka kuntigiya sera kɔgɔji jikuruw ma,

ni dugukolo mumɛ kan.

Ne ka kuntigiya sera siyaw bɛɛ ma,

ni jamanaw bɛɛ ma.

7Ne ye sigiyɔrɔ ɲini u bɛɛ fɛ.

Ne ye yɔrɔ ɲini n be se ka sigi min na.

8O la, fɛɛn bɛɛ Danbaga kumana n fɛ.

Min ye ne dan,

ale ye n sigiyɔrɔ yira n na.

A y'a fɔ n ye ko:

‹Sigi Yakuba ka soo.

Don Isirayɛli ka cɛɛn kɔnɔ.›

9A ye n dan kabini fɔlɔfɔlɔ,

sanni diɲɛ ka dan.

Ne tena tunu abada.

10Ne ye baara kɛ Fɛɛn bɛɛ kuntigi ɲakɔrɔ a ka sigiyɔrɔ la.

A kɛra ten, ne sigira Siyɔn kulu kan.

11A ye lafiɲɛyɔrɔ di ne ma dugu kɔnɔ min koo ka di bɛɛ ye.

Ne be n ka masaya kɛra Zeruzalɛmu kɔnɔ.

12Ne sigira siya barikaman fɛ.

Ne sigiyɔrɔ ye Matigi ka yɔrɔ kɔnɔna ye.

13Ne boɲana i ko Liban yiriba.

Ne boɲana i ko Ɛrɛmɔn kulu kan sipɛrɛyiri.

14Ne boɲana i ko Ɛngɛdi kongokolon tamarosun,

i ko Zeriko sebesun,

i ko olivuyiri, kɛnɛba la kongo kɔnɔ,

i ko pilataniyiri be jaɲa cogo min na.

15Ne ye Ala sigiyɔrɔ kasa diya

i ko kanɛli ni tulu kasa diman.

Ne y'a kɛ i ko wusulanɲuman ta.

Ne kasa yɛrɛkɛra i ko galibanumu ni onisi ani sitakiti ta.f

Ne yɛrɛkɛra i ko wusulan sisi, Ala ka sigiyɔrɔ la.

16Ne ye n bolow bɔ i ko teribɛntiyiri taw.

Nɛɛma ni sebagaya be ne bolow la.

17Ne kɛra i ko *ɛrɛzɛnsun min y'a boloɲumanw bɔ.

Ne feerenw ye deenw kɛ,

kunkɔrɔta ni boɲa sɔrɔ deenw.

18Ne le ye kanuyaɲuman,

ni Alaɲasiran,

ni koo jatiminɛ,

ani jigiɲuman bamuso ye.

Ne min be yen kudayi, ne dinin be n deenw bɛɛ ma,

Ala ye minw woloma.g

19Ne nigɛ be aw minw na,

aw ye na ne fɛ.

Ne deenw bena aw wasa kosɔbɛ.

20Ka miiri ne la,

o ka di ka tɛmɛ lii kan.

Ka ne sɔrɔ, o ka di ka tɛmɛ liɲaga tuluman kan.

21Minw mana ne nɛnɛ,

ne nigɛ b'u minɛ tugu.

Minw mana ne min,

ne minnɔgɔ bena to olu la halibi.

22Min mana mɛnni kɛ ne fɛ,

o tigi tena malo abada.

Minw be baara kɛ ni ne ye,

olu tena hakɛ kɛ fewu.»

Lɔnniya ni sariya

23O bɛɛ bɔra Fɛɛn bɛɛ kuntigi Ala

n'an ka bɛɛn kitabu kɔnɔ,

Musa ye sariya min lase an ma.

O ka kɛ Yakuba ka soo niyɔrɔ ye.

24Aw ka barika ɲini Matigi fɛ tuma bɛɛ.

Aw ye nɔrɔ a la janko a ka fanga d'aw ma.

Setigi Ala le ye Ala kelenpe ye.

K'ale niin bɔ a la,

kisibaga wɛrɛ te yen.

25Ale sariya nin le b'a kɛ lɔnniya be woyo ka bɔ kɛnɛma

i ko Pisɔn baji.

Lɔnniya be kɛ i ko Tigiri baji,

yiri denkura tuma na.

26A be hakilitigiya di

i ko Efarati baji be yɔrɔ minɛ cogo min na,

i ko Zurudɛn baji be cogo min na sumantigɛwaati la.

27A b'a kɛ hakilitigiya be yɛrɛkɛ i ko Nili baji,

i ko Gihɔn baji *ɛrɛzɛn tigɛwaati la.

28K'a ta sariya kalanbaga fɔlɔ la

ka ta'a bila a laban na,

mɔgɔ si ten'a kɔnɔnako lɔn ka ban.

29Bari, a tɛmɛyɔrɔ ka bon ka tɛmɛ kɔgɔji kan,

a ka kolatigɛnin ka dun ka tɛmɛ kɔgɔji duɲa kan.

30Ne kɔni tun kɛra i ko jisira, ka bɔ baa la.

Ne tun be i ko jii tɛmɛsira, ka don nankɔ la.

31N y'a fɔ n yɛrɛ kɔnɔ ko: «N bena n ka nankɔ sɔn.

Ne bena n ka yɔrɔ labɛnnin ɲigi.»

Ayiwa, ne ka jisira nana kɛ baa ye.

Ne ka baa nana kɛ kɔgɔji ye.

32Ne ben'a kalan gwɛya tugu i ko dugugwɛda.

Ne ben'a ka yeelen ko fɔ yɔrɔjan mɔgɔw ye.

33Ne be kalan jɛnsɛn i ko kirayakuma.

N ben'a to filankuru nataw ye.

34Aw k'a filɛ sa!

Ne ma sigɛn ne yɛrɛ dama ye do!

Ne sigɛnna lɔnniya ɲinibagaw bɛɛ le ye.

ALA KA KUMA

© 2008 Alliance Biblique du Burkina Faso

More Info | Version Index