Search form

Sir 25

Min ka ɲi ani min ma ɲi

1Fɛɛn saba be yen minw koo ka di ne ye kosɔbɛ.

O fana ka ɲi Matigi ni mɔgɔw ɲana.

O ye: balima fila ka bɛɛn ye,

ni sigiɲɔgɔnmaw ka kɛ teriw ye,

ani cɛɛ ni muso ka bɛɛn.

2Mɔgɔ sifa saba be yen,

minw koo ka go ne ye,

minw ka kɛwaliw be ne dimi haali!

O ye fantan yɛrɛboɲala ye,

ni nafolotigi galontigɛla,

ani cɛkɔrɔba hakilitan ɲamɔgɔyakɛla.

3I ma fɛɛn min sɔrɔ i kanbelentuma,

i cɛkɔrɔbalaman be se k'o sɔrɔ wa?

4Kiti ka ɲi kunsigigwɛtigiw bolo,

ladili fana ka ɲi cɛkɔrɔbaw bolo cogo min na,

5o cogo kelen na,

lɔnniya fana ka ɲi mɔgɔkɔrobaw fɛ,

ani koo jatiminɛ ni ladili mɔgɔbaba fɛ.

6Mɔgɔkɔrɔbaw ka kunnawolofugulan ye u ka yeta tɛmɛninw ye.

U ka kunkɔrɔtafɛn ye Matigi ɲasiran le ye.

7Koo kɔnɔntɔ be yen,

ne yɛrɛ be minw jati dagamu ye.

Ne be se ka tannan fara u kan.

O ye denfa ye min ye nisɔndiya sɔrɔ

a deenw barika la,

ani mɔgo min juguw halakira a ɲana.

8Mɔgɔ min be ni muso hakilitigi ye,

o fana dagamunin lo,

min daa ma deli k'a don koo la,

ani min ma deli ka baara kɛ kuntigikolon ye.

9Yɛrɛminɛbaga fana dagamunin lo,

ani min be kuma ni mɔgɔw ye minw be mɛnni kɛr'a fɛ.

10Mɔgɔ min ka fisa n'o bɛɛ ye,

o ye lɔnniya tigi ye.

Nga, mɔgɔ si te yen min ka fisa

ni Matigi ɲasiranbaga ye.

11Matigi ɲasiran le tɛmɛna fɛɛn bɛɛ kan.

A ɲasiranbaga be se ka suma ni jɔn ye sa?

12Matigi ɲasiran ye a kanu daminɛyɔrɔ le ye.

Nga, mɔgɔ be nɔrɔ a la lanaya le sababu la.

13Mandiminɔ te digi mɔgɔ la ka dusukun ta bɔ.

Juguya si ma se muso ka juguya ma.

14Dusukasi si man jugu ka se i kɔniyabaga ta ma.

Mɔgɔ si ka mɔnɛbɔ te digi i la k'i jugu ta bɔ.

15Baga si man jugu ka saa ta bɔ.

Dusudimi si man jugu ka muso ta bɔ.

16Ne ka to ni jara ye,

walima ni sogojugu ye yɔrɔ kelen,

o ka fisa ne ma ka to ni musojugu ye.

17Muso ka juguya b'a ɲada cogo yɛlɛma.

A ɲaa sisinin cogo b'a kɛ i ko wara.

18A cɛɛ be bɔ ka taga dumuni kɛ sigiɲɔgɔnw fɛ,

a b'a ka makaritɔkan fɔ,

a bolomako tɛ.

19Muso ka mɔgɔtɔɔrɔ ka jugu ni fɛɛn bɛɛ ta ye.

Kojugukɛla ta fana be ten.

20Cɛncɛnmugu be tintin min kan,

ale yɛlɛ be cogo min na cɛkɔrɔba kɔrɔ,

muso kuma caaman tigi be ten cɛɛ ɲamalɔnin bolo.

21Kana tugu muso kɔ a ka cɛɲa kama,

kana burun muso la a ka nafolo kama.

22Cɛɛ min muso b'a fɛɛrɛ bɔ,

o tigi ta ye dusudimi, ni dɔgɔya,

ani maloya ye.

23Lɛbu, ni ɲasisi, ani dusucɛn,

o ye musojugu ka kɛwali nɔɔ ye.

Fangatanya ni farifaga,

ale ye cɛɛ ta ye,

min muso t'a nisɔndiya!

24Muso sababu la, hakɛ daminɛna,

ale kosɔn, mɔgɔ bɛɛ be sa.

25Kan'a to e ka jii be taga gwansan,

ani musojugu ka kumayɔrɔ sɔrɔ a sago la.

26Ni muso nin te mɛnni kɛ e fɛ,

faran a la k'a gwɛn.

ALA KA KUMA

© 2008 Alliance Biblique du Burkina Faso

More Info | Version Index