Search form

Sir 3

Wolobagaw boɲa

1Denmisɛnw, aw ka mɛnni kɛ aw facɛ fɛ,

ka tugu u kɔ janko aw be kisi juguman ma.

2Bari, Matigi be boɲa la faa kan a deenw na,

a be baa tiɲɛtigiya deenw faan fɛ.

3Mɔgɔ min b'a facɛ boɲa,

o tigi ka hakɛ be yafa.

4Min b'a bamuso boɲa,

o tigi be nafolo sɔrɔ.

5Mɔgɔ min b'a facɛ boɲa,

o bena nisɔndiya a yɛrɛ deenw la.

N'a ye dalili kɛ, a bena jaabili sɔrɔ.

6Mɔgɔ min b'a facɛ boɲa,

o tigi bena sijan sɔrɔ.

Matigi boɲabaga b'a yɛrɛ bamuso nisɔn diya.

7A be baara kɛ u ye i ko a kuntigiw.

8I facɛ boɲa e ka kuma n'i ka kɛwaliw la

janko a ka duba be minɛ i ye.

9Faa ka duba be barika don a deen ka soo la.

Baa ka danga be deen ka soo ci.

10Kana i yɛrɛ boɲa i facɛ ka kunsurunko la.

A ka maloya man kan ka kɛ i ka kunkɔrɔta ye.

11Bari, mɔgɔ be kunkɔrɔta sɔrɔ i faa ka boɲa la.

Bamuso mafiɲɛya be maloya bil'a deenw na.

12N deen, i janto i facɛ la a kɔrɔya tuma na.

K'a to nii na, kan'a to a dusu be kasi.

13Hali ni hakili t'a fɛ tugu,

e ka muɲu.

E kan'a nɛni bari fanga b'i la.

14Bari, Ala tena ɲinɛ i ka koɲuman kɔ i facɛ ye.

O bena kɛ e ka hakɛ caaman yafa sababu ye.

15E ka tɔɔrɔ la, Matigi ben'a hakili to i la.

E ka hakɛ bena bɔ i kan,

i ko tile be *sanji siminin yelen cogo min na.

16Ala tɔgɔ cɛnbaga le be ban a facɛ la.

Matigi ye min ta cɛn,

ale lo b'a bamuso dusu dimi.

Yɛrɛmajigi

17N deen, i yɛrɛ majigi e ka kɛtaw bɛɛ la.

O la, mɔgɔw bena i kanu ka tɛmɛ mɔgɔɲuman kan.

18Ni dɔ farala e ka lɔyɔrɔ kan,

e ka dɔ fara e ka yɛrɛmajigi kan.

O la, e koo bena diya Matigi ye.

20Bari, Matigi ka sebagaya ka bon.

Mɔgɔmajigininw le be boɲa l'a kan.

21Koo min ka gwɛlɛ e ma,

kana o ɲini.

Fɛɛn min barika ka bon n'i ye,

kan'o jati minɛ!

22Sariya minw dira i ma,

to ka miiri o la.

E mako kana kɛ gundo koo la.

23Kana e yɛrɛ don baara la min tɛmɛna e barika kan.

I ye min ye diɲɛ kɔnɔ,

o tɛmɛna mɔgɔ ka faamuli danyɔrɔ kan.

24Bari mɔgɔ caaman tununa u ka miiriyajuguw kosɔn.

U ka jati jugumanw le y'u ka miiriya yɛlɛma.

Yɛrɛboɲa

26Mɔgɔ dusugwɛlɛn laban te ɲa.

Farati ka di mɔgɔ min ye,

ale be to farati la fana.

27Mɔgɔ dusugwɛlɛn be dɔ le fara a ka tɔɔrɔ kan.

Kojugukɛla kɔni be hakɛ fara hakɛ kan dɔrɔn.

28Kojugu mana yɛrɛboɲala sɔrɔ, fura t'a la.

Bari, juguya lili b'a dusu la.

29Hakilitigi be to ka miiri lɔnnikɛlaw ka talenw na.

Tulomalɔbaga le koo ka di lɔnnikɛlaw ye.

Koɲuman nafa

30Jii be tasuma faga cogo min na,

koɲuman fana be hakɛ yafa ten.

31Mɔgɔ min be koɲuman kɛ mɔgɔ ye,

o tigi be sini le labɛnna.

Ni gwɛlɛya ser'a ma loon dɔ,

a bena dɛmɛbaga sɔrɔ.

ALA KA KUMA

© 2008 Alliance Biblique du Burkina Faso

More Info | Version Index