Search form

Sir 30

Mɔgɔ kalan

1Faa min deen koo ka d'a ye,

a b'a kolo ni busan ye,

o deen nin le ben'a nisɔndiya sini.

2Mɔgɔ min y'a deen kolo ka ɲa,

o tigi bena wasa a kosɔn,

a bena kunkɔrɔta sɔrɔ a lɔnbagaw cɛma.

3Mɔgɔ min b'a deen kolo ka ɲa,

o tigi be keliya bila a jugu la.

A ta ye nisɔndiya ye a teriw cɛma.

4Hali n'o faa nin te yen loon min na,

a be kɛ i ko a ma sa.

Bari, a ye mɔgɔ to a kɔ min y'a bɔɲɔgɔnko ye.

5K'o tigi to nii na, a nisɔndiyanin lo k'a deenw ye,

a satuma na fana, a te «tun k'a lɔn» fɔ.

6Bari, a be tagara ka mɔgɔ to a kɔ,

min ben'a mɔnɛ bɔ a juguw la.

O tigi fana bena kɛ ɲumanlɔnbaga ye a teriw faan fɛ.

7Faa min b'a deen cɛn,

ale bena kɛ mandimiyɔrɔ furakɛla le ye.

Deen kasikan mana bɔ dɔrɔn,

ale kɔnɔ bɛɛ be gwan.

8Soo min ma kolo ka ɲa,

ale yɛlɛ ka gwɛlɛ.

Deen min tora a yɛrɛ ma,

ale fana te se ka mara.

9N'i y'i deen ladiya kojugu,

a bena dusukasiko le kɛ i la.

N'i tora ka tolon kɛ n'a ye,

a laban i bena kasi.

10Kana yɛlɛ deen fɛ ten,

janko i kana tɔɔrɔ loon dɔ n'a ye.

A laban, i bena e bolokunnaden cin.

11K'a to a ka denmisɛnya la,

kan'a to a yɛrɛ ma fewu.h

Kan'a ka fili ye k'a to yen,

k'a to denmisɛnya la, a ladi.

12Banba k'a dɛrɛ a denmisɛn tuma na,

janko a kana kɛ tulogwɛlɛn ye ka muruti.

13Jija k'i deen kolo kosɔbɛ

janko i kana i kuun surun.

Kɛnɛya

14E ka kɛ fantan ye n'i ka kɛnɛ ni fanga b'i la,

o ka fisa ka kɛ nafolotigi banabagatɔlaman ye.

15Kɛnɛyasɔbɛ ka fisa ni diɲɛ sanu bɛɛ ye,

yɛrɛminɛ koɲuman ka fisa ni nafoloba ye.

16Nafolo si te se ka suma ni farisogo kɛnɛya ye,

hɛrɛ si te yen min be se dusukun ta ma.

17Mɔgɔ ka saya ka fisa ka to hamikojugu la.

Lafiɲɛ banbali ka fisa ni bana kuntagajan ye.

18Ka dumuni diman bila banabagatɔ kɔrɔ,

dumuni nigɛ te min na,

o be i ko saraka dumuta joo ɲakɔrɔ.

19Saraka bɔkun ye mun ye joo ma?

A te fɛɛn diya lɔn,

a t'a kasa mɛn fana.

Matigi be mɔgɔ min tɔɔrɔla,

ale fana be ten.

20U b'a sɔnna ni fɛɛn min ye,

a b'o filɛ dɔrɔn ka to tɔɔrɔ la,

i ko cɛkɔbɔlen be sunguru filɛ cogo min na a ɲakɔrɔ.

Nisɔndiya

21Kan'a to dusukasi be se i kɔrɔ,

kana hakiliɲagami bila i yɛrɛ la.

22Dusudiya be mɔgɔ to nii na,

nisɔndiya be mɔgɔ sii jaɲa.

23To k'i hakili falenfalen,

ka to k'i jaa gwɛlɛya,

dusukasi yɔrɔ jaɲa i la.

Mɔgɔ caaman cɛnko sababu lo,

a te foyi ɲa mɔgɔ ye.

24Keliya ni dusubɔ be dɔ bɔ mɔgɔ sii la,

hami be mɔgɔ kɔrɔbaya joona.

25N'i dusu ka di,

o tuma lo dumuni nigɛ b'i minɛ,

o la, i be fɛɛn min dumuna,

i be janto o la kosɔbɛ.

ALA KA KUMA

© 2008 Alliance Biblique du Burkina Faso

More Info | Version Index