Search form

Sir 39

1A be jija ka fɔlɔ mɔgɔw ka lɔnniya kalan,

a be miiri kiraw ka kirayakuma na.

2A b'a hakili to fɔlɔ mɔgɔbabaw ka kokɛninw na,

a be talenw faamu fana.

3A be talenw kɔrɔ yaala,

a be siirinw taayɔrɔ ye.

4A be se ka baara kɛ mɔgɔbabaw cɛma.

A be sigi kuntigiw cɛma.

U b'o tigilamɔgɔ le bila ka taga jamana wɛrɛ la,

bari min ka ɲi adamaden fɛ,

ani min ma ɲi,

a b'o lɔn.

5Sɔgɔma joona,

a be kɔn ka taga Matigi a Danbaga ɲakɔrɔ,

a be dalili kɛ Fɛɛn bɛɛ kuntigi ɲakɔrɔ.

A be kuma Ala le fɛ,

a b'a ka hakɛ yafa dali.

6A b'a ɲini Matigi Alaba fɛ

ko a ka hakilitigiya d'ale ma,

k'o la, ale b'a ka lɔnniyakuma fɔ,

ani a fana be barika la Matigi ye a ka dalili la.

7Lɔnnikɛla b'a sago n'a lɔnko ɲatilen ten le,

a be Ala ka kodogoninw jati minɛ.

8A ye kalan min sɔrɔ,

a bena o yira.

A bena nisɔndiya sɔrɔ Matigi ka bɛɛn sariya la.

9Mɔgɔ caaman ben'a ka hakilitigiya koo fɔ,

u tena ɲinɛ n'a ye fewu.

A koo bena to u hakili la,

a tɔgɔ bena wele kudayi filankuruw bɛɛ cɛma.

10Mɔgɔw ben'a ka lɔnniya koo fɔ,

jama ben'a tanu.

11N'a ye sijan sɔrɔ,

a bena tɔgɔba sɔrɔ a kɔ,

n'a fana sara, a ta ka ɲi.

Ala ka danfɛnw

12Ne miirila ka ban dɔrɔn,

ne b'a fɛ ka dɔ fɔ tugu.

13Ne denɲumanw,

n'aw ye ne lamɛn,

aw bena wili i ko jii dala buruku.

14Aw ka kɛ i ko wusulan,

ka kasa diman bɔ.

Aw ka kɛ i ko feeren.

Aw ka dɔnkili dɔ la n'aw dusu bɛɛ ye,

aw ka Matigi fo a ka kɛwaliw kama.

15Aw k'a ka boɲa fɔ,

aw k'a tanu.

Aw ka dɔnkili la a ye, ka gɔni fɔ,

aw ben'a tanu ka to k'a fɔ ko:

16«Matigi ka kɛwaliw bɛɛ ka ɲi,

a ka fɔta kelen kelen bɛɛ be kɛ u kɛwaati la.»

17Mɔgɔw ten'a fɔ tugu ko:

«Mun na nin be kɛ?»

Walima, «Nin kuun ye mun ye?»

Bari, koo bɛɛ bena ɲanabɔ o ɲanabɔwaati la.

Ala be dɔ fɔ dɔrɔn,

jii be kɛ ɲɔgɔn kan.

A be dakuru ɲaa kelen fɔ dɔrɔn,

jii be kɛ yɔrɔ kelen na.

18Koo bɛɛ be kɛ a sago la ka kɛɲɛ n'a ka fɔta ye.

N'a ko a be min kisi,

mɔgɔ te yen k'a sɔsɔ.

19Mɔgɔ bɛɛ ka kɛtaw b'a ɲakɔrɔ,

mɔgɔ si te yen min be se k'a yɛrɛ dogo a la.

20A ɲaa be koo daminɛ n'a laban na,

foyi te yen min b'a kabakoya.

21Mɔgɔ ten'a fɔ tugu ko:

«Mun na nin be kɛ?»

Walima, «Nin kuun ye mun ye?»

Bari, fɛɛn bɛɛ danna makoɲa kama.

22Ala ka nɛɛma be i ko baa fanin ka yɛrɛkɛ,

a be i ko jii caaman, min ye dugukolo datugu.

23A ka dimi bena se siya wɛrɛw ma ten,

i ko a tun ye yɔrɔɲuman kɛ lakolon ye cogo min na.

24A ka sira tilennin lo a ka mɔgɔ fɛ,

nga Alaɲasiranbali fɛ, a fanin be gwɛlɛyaw la.

25Ala ye koɲuman labɛn mɔgɔɲumanw ye kabini a daminɛ,

ka kojugu labɛn kojugukɛlaw ye fana.

26Fɛɛn minw be adamaden mako ɲa, o filɛ:

jii, tasuma, nigɛ, ni kɔgɔ,

ani mugu ni nɔnɔ,

ani lii ni duvɛn ni tulu ani faniw.

27O fɛɛn nunu be Alaɲasiranbaga mako ɲa,

nga u be kɛ sababujugu ye kojugukɛla ma.

28Fɔɲɔ dɔw be yen,

Ala ye olu dan kojugukɛla ɲagwan kama.

N'u wilila tuma min na,

u b'u ka cɛnni boɲa.

U b'u ka fariya yira fɔɔ u daan na,

k'u Danbaga dusu suma.

29Tasuma ni sanbɛrɛ,

ani kɔngɔ ni saya,

olu danna ɲagwan kama fana.

30Sogojuguw ni bunteni ni fɔnfɔnni,

ani murujan min be halakili kɛ Alaɲasiranbaliw cɛma,

31olu bɛɛ labɛnnin lo ka Ala ka fɔta bato,

u labɛnnin lo ka to a ka bila la dugukolo kan.

32Ne tun y'o bɛɛ faamu kabini a daminɛ na,

n miirila o la, n y'o kɛ sɔbɛko ye.

33Matigi ka kɛtaw bɛɛ ka ɲi.

Ni mɔgɔ mako b'u la, u b'a mako ɲa.

34Kan'a fɔ ko:

«Nin ka jugu ni nin ye.»

Bari, waati dɔ bena se,

u ben'a lɔn ko fɛɛn bɛɛ tun ka ɲi.

35Sisan aw ka dɔnkili la n'aw dusu bɛɛ ye k'aw kaan kɔrɔta,

aw ka Matigi tanu.

ALA KA KUMA

© 2008 Alliance Biblique du Burkina Faso

More Info | Version Index