Search form

Sir 4

1N deen, kana ban ka fantan balofɛn d'a ma.

Kana dɛsɛbagatɔ bila hami na.

2Kana kɔngɔtɔ tɔɔrɔ,

kana makaritɔ dusu gwan.

3Kana dɔ fara mɔgɔ dusu gwannin ka tɔɔrɔ kan.

Mɔgɔ min mako b'i ka dɛmɛ na, kan'a to a b'o kɔnɔ ka dɛsɛ.

4Kana dalilikɛbaga dɛsɛbagatɔ gwɛn.

Kana ban ka fantan filɛ.

5Kana ban ka dɛsɛbagatɔ ɲafilɛ.

Kan'a to a b'i danga sababu sɔrɔ.

6Bari, n'a nii tɔɔrɔnin y'i danga,

a Danbaga b'a ka dalili minɛ.

7A to i koo be diya jama ye.

E k'i yɛrɛ majigi mɔgɔbaba ɲafɛ.

8I tulo malɔ fantan fɛ,

ka jaabiliɲuman d'a ma.

9Sigɛnbagatɔ bɔsi a tɔɔrɔbagaw bolo.

Kɛ kantigi ye kititigɛ waati la.

10Kɛ falatɔw faa ye,

kɛ i ko u bamusow cɛɛ.

I bena kɛ i ko Fɛɛn bɛɛ kuntigi dencɛ.

I koo bena diy'a ye ka tɛmɛ i bamuso kan.

Lɔnniya kanu

11Lɔnniya be kunkɔrɔta di a deenw ma.

Mɔgɔ minw b'a ɲini,

a be janto olu la.

12A kanubagaw b'a fɛ ka sii sɔrɔ.

Minw b'a ɲini sɔgɔma joona,

nisɔndiya bena olu labɔ.

13A sɔrɔbaga bena kunkɔrɔta sɔrɔ cɛɛn ye.

O mana taga yɔrɔ o yɔrɔ,

Matigi b'a ta ɲa.

14Mɔgɔ minw be janto a la,

olu be Ala kelen le bato.

A kanubagaw koo ka di Matigi ye.

15Mɔgɔ minw kolol'a ye,

o tigi bena kiti tilennin tigɛ.

Mɔgɔ min nɔrɔla a la,

o tigi be to hakilisigi la.

16N'a y'a jigi la lɔnniya kan,

a ben'a sɔrɔ cɛɛn ye.

O nisɔndiya bena se a kɔmɔgɔw ma.

17Lɔnniya ben'a bila siragwɛlɛn kan fɔlɔ.

A ben'a ɲaa gwan fɔlɔ.

A ben'a kɛ a be tɛmɛ siragɔngɔrɔninw fɛ fɔlɔ,

fɔɔ a k'a jigi l'a kan.

A b'a sɛgɛsɛgɛ n'a ka ɲinitaw ye.

18O kɔ, a be tilen a ma k'a nisɔndiya,

k'a ka gundow yir'a la.

19Nga n'o tigi banna lɔnniya ma,

a b'a bila, k'a to a ta be cɛn.

Yɛrɛkɔlɔsi

20Koow jati minɛ,

k'i yɛrɛ kɔlɔsi kojugu ma,

kana maloya i yɛrɛ cogo la.

21Bari, maloya dɔ be yen min be mɔgɔ don hakɛ la,

dɔ wɛrɛ be yen min be kunkɔrɔta ni sababuɲuman di.

22Kana kɛ sababujugu ye i yɛrɛ ma.

Kan'a to maloya ka kɛ i ben sababu ye fana.

23I ka kan ka kuma tuma min na,

i kana siga ka kuma.

24Bari e ka kuma ben'i ka lɔnniya yira.

E ka fɔta bena mɔgɔw kalan.

25Kana tiɲɛ sɔsɔ.

E ka sɔn maloya ma e ka kolɔnbaliya kosɔn.

26Kana maloya k'i ka hakɛ fɔ.

Mɔgɔ te se ka baji woyo bali.

27Kan'a to naloman b'a ɲaa don i la.

Kana sɔn fangatigi k'i piripara.

28E jija tiɲɛ fɔ la fɔɔ ka taga se i saya ma.

Matigi Ala bena i dɛmɛ.

29Kana kuma joona joona

ka kɛ salabagatɔ ye kɛwaliw la.

30Kana kɛ jara ye i ka soo kɔnɔ.

Kana kɛ siranbagatɔ ye i ka mɔgɔw cɛma.

31Kan'a to sɔrɔ ka diya i ye dama,

a di ka gwɛlɛya i ma.

ALA KA KUMA

© 2008 Alliance Biblique du Burkina Faso

More Info | Version Index