Search form

Sir 40

Adamaden ka sigɛn

1Ala ye mɔgɔ dan, bɛɛ n'a ka hamijuguw.

A ye doni gwiliman la adamadenw kan,

kabini u bɔlon u bamuso kɔnɔ,

fɔɔ ka ta'a bila u donlon ma kaburu la.

2U be miiri min na,

min b'u lasiran,

n'u b'a kɔnɔ na tigitigi,

o ye u banlon ye.

3U bɛɛ, k'a ta u ka faamaw ma,

minw be u kunna,

fɔɔ ka ta'a bila mɔgɔ gwansanw ma,

minw be kɔfɛ kɔfɛ,

4k'a ta masafani n'a fugulan donbaga ma,

fɔɔ ka ta'a bila fani gwansan donbaga ma,

5u bɛɛ bena dimi ni keliya lɔn,

ani ɲagwan ni hakiliɲagami,

ni saya ɲasiran,

ani ɲɔgɔnkɔniya ni kɛlɛw.

N'u lara ko u be lafiɲɛ,

u ka dusukasi be na sinɔgɔwaati le la.

6U mana lafiɲɛ dɔɔni sɔrɔ dɔrɔn, haya!

O waati dɔɔni kɔnɔ,

o be kɛ i ko i be tilegwangwan fɛ le.

U be to sinɔgɔ la,

u hakili be wili sigo fɛ,

u be kɛ i ko kɛlɛden dɔ le sera ka kisi kɛlɛ la n'a be bolila.

7N'a kɛra i ko a sera ka kisi tuma min na,

a be kunun ka kabakoya a siranya gwansan kama!

8Kojugu kelen le be nimanfɛnw bɛɛ dɛndɛna,

adamaden fara sogo kan.

Nga kojugukɛlaw ta le bena juguya kosɔbɛ.

9O ye saya, walima fagali,

ɲɔgɔnsɔsɔ walima kɛlɛ,

sigɛn, walima kɔngɔ,

halakili, walima bɔnɛ.

10O koo nunu bɛɛ danna Alaɲasiranbali le kama,

jiba nana diɲɛ cɛn olu le kama.

11Fɛɛn o fɛɛn bɔra dugukolo la,

olu be kɔsegi yen.

Minw bɔra jii kɔnɔ,

olu be kɔsegi o yɔrɔ la.

Kojugukɛlaw laban

12Dasan ni tilenbaliya bɛɛ bena ban,

nga tilenninya kɔni be to yen kudayi.

13Kojugukɛlaw ye nafolo min sɔrɔ,

o bena kɛ i ko baji min be jara.

A bena tɛmɛ i ko saan pɛrɛnkan,

min mankan be bɔ sanji waati la.

14Mɔgɔjugu b'a tigɛ yɛlɛ ka mɔgɔ sɔn

ka nisɔndiya cogo min na,

o cogo kelen na fana,

benkannikɛlaw bena tunu.

15Alaɲasiranbaliw kɔmɔgɔw tena barika sɔrɔ.

Mɔgɔkolonw lili tena donyɔrɔ sɔrɔ fara fɛ.

16Buruku min be falen bada la,

olu le be kɔn ka bɔn biin bɛɛ ɲa.

17Nga ɲumanya be i ko nankɔɲuman dɔ.

N'i ye fantan sɔn,

mɔgɔw b'u hakili to o la kudayi.

Alaɲasiran

18Mɔgɔ min b'a yɛrɛ ka baara kɛ,

o tigi ta ka di.

Nga mɔgɔ min ye nafolo sɔrɔ,

o tigi dagamuna kosɔbɛ.

19Mɔgɔ ka deen caaman sɔrɔ,

walima ka dugu dɔ sigi,

o le be tɔgɔ di adamaden ma.

Nga muso dafanin ka fisa n'o bɛɛ ye.

20Fɔlifɛnw mankan ni duvɛn be mɔgɔ nisɔndiya,

nga ka lɔnniya koo diya i yɛrɛ ye,

o nisɔndiya ka bon ka tɛmɛ o kan.

21Filen ni kolonjo kaan ka di,

nga kuma diman ka fisa n'o ye.

22Nɛɛma ni cɛɲa,

olu ka di ɲaden ye,

nga suman wilikoɲuman foro kɔnɔ ka fisa n'o ye.

23Teriw be taga ɲɔgɔn fɛ waati ni waati,

nga muso n'a cɛɛ ka ɲɔgɔnye tɛmɛna o kan.

24Balimaw, walima dɛmɛbagaw be mɔgɔ dɛmɛ

gwɛlɛya waati le la,

nga ka dɛsɛbagatɔ sɔn tɛmɛna o kan.

25Sanu ni warigwɛ be mɔgɔ jigi tugu,

nga ladiliɲuman ka fisa n'o ye.

26Ni nafolo ni fanga b'i fɛ,

i hakili siginin lo,

nga n'i be siran Matigi ɲa,

o hakilisigi ka bon kosɔbɛ.

O tuma na, e te dɛsɛ fewu,

e mako te dɛmɛbaga wɛrɛ la tugu.

27Matigi ɲasiran b'a kɛ

i ko i be nankɔɲuman dɔ le la,

o b'i tanga ka tɛmɛ sebagaya bɛɛ kan.

Dalilikɛbaga

28N deen, kana kɛ dalilikɛbaga ye,

e ka sa, o ka fisa ka dalili kɛ.

29Mɔgɔ min b'a ɲaa bɔ a tɔɲɔgɔn ka dumuni fɛ,

o tigi te se ka wele jogoɲuman tigi.

A b'a yɛrɛ ɲagami n'o dumuni wɛrɛ ye,

k'a sɔrɔ a t'a sɔrɔ.

Mɔgɔ min kalanna ani ka ladi ka ɲa,

o tigi b'a yɛrɛ kɔlɔsi,

k'a yɛrɛ minɛ o la.

30Dalilifɛn ka di dalilikɛbaga malobali daa la,

nga n'a jigira a kɔnɔ na tuma min na,

a be kɛ i ko tasuma.

ALA KA KUMA

© 2008 Alliance Biblique du Burkina Faso

More Info | Version Index