Search form

Sir 41

Saya

1Mɔgɔ min be hɛrɛ la ni nafolo b'a fɛ,

n'a te hami ni foyi ye,

gwɛlɛya t'a kan,

n'a ka koow bɛɛ be ɲa,

n'o tigi miirila saya la,

o ka go a ye haali.

2Saya, e ka kɛta ka fisa mɔgɔ ma,

min dɛsɛnin be, ni barika t'a la,

min kɔrɔla kosɔbɛ ni hami b'a kan,

fɔɔ a be muruti yɛrɛ k'ale te se ka muɲu tugu.

3Kana siran saya ɲa,

i hakili to mɔgɔw la minw tagara i ɲa,

ani minw bena tugu i kɔ.

4Matigi ye fɛɛn min latigɛ nimanfɛn bɛɛ ye,

o ye saya ye.

Mun na e be Fɛɛn bɛɛ kuntigi ka kolatigɛnin sɔsɔ?

Hali n'i sii ye saan tan ye,

walima kɛmɛ, walima waa kelen,

o tena jati lahara!

Alaɲasiranbali ka ɲagwan

5Kojugukɛlaw deenw ma ɲi,

u b'u ka waati caaman kɛ Alaɲasiranbaliw fɛ.

6Kojugukɛlaw ka cɛɛn bena cɛn,

u deenw bena to maloya la.

7Alaɲasiranbali deenw ben'a jalaki,

bari ale lo bena kɛ sababu ye u be maloya.

8Aw Alaɲasiranbaliw,

aw minw be Fɛɛn bɛɛ kuntigi ka sariya cɛn,

bɔnɛ ye aw ta ye.

9Aw be wolo danga le kama,

n'aw be sa fana, aw be danga sɔrɔ.

10Fɛɛn min bɔra dugukolo la,

ale be segi yen,

o la, Alaɲasiranbaliw danganin kɔ,

o be halaki.

Tɔgɔɲuman sɔrɔ

11Adamaden farisogo te foyi ye,

nga mɔgɔtilennin tɔgɔ tena tunu.

12Janto i tɔgɔɲuman la,

bari ale be se ka to yen i tɛmɛnin kɔ,

a be mɛn ka tɛmɛ sanu caaman kan.

13Mɔgɔ ka sii sɔrɔ k'a to hɛrɛ la,

o tileda be lɔn,

nga tɔgɔɲuman be to yen kudayi.

Maloyakow

14N deenw, aw ye kalan min sɔrɔ,

aw k'o mara ɲamalɔ la.

Lɔnniya dogonin,

walima nafolo dogonin,

olu fila be mun ɲa?

15Mɔgɔ k'a ka nalomanya dogo,

o ka fisa ni lɔnniya dogo ye.

16Mɔgɔ ka kan ka maloya koo minw na,

ne bena olu le koo fɔ.

Tiɲɛ na,

mɔgɔ man kan ka janto maloyako bɛɛ la.

Ka fara o kan,

mɔgɔ bɛɛ ka koo faamucogo te kelen ye.

17Mɔgɔ ka kan ka maloya ka tilenbaliyako kɛ a wolobagaw ɲana,

ani ka galon tigɛ faamaw ɲana.

18Kana kojugu kɛ kititigɛla ɲana,

kana sariya cɛn Ala ka jama cɛma,

kana i tɔɲɔgɔn,

walima i teri namara.

19Maloya ka soɲani kɛ i sigiɲɔgɔnw cɛma,

maloya k'i kali,

walima ka dadiko cɛn.

Maloya k'i daladumuni dali,

walima ka ban k'i dalibaga sɔn.

20Ni mɔgɔ dɔ y'i fo n'i m'a jaabi,

i ka maloya o la.

K'i ɲaa bɔ kakalamuso fɛ,

o ka kɛ maloya ye i fɛ.

21K'i fasodenɲɔgɔn minɛko juguya,

walima ka mɔgɔ dɔ niyɔrɔ minɛ,

o ka kɛ maloyako ye i fɛ.

K'i ɲaa bɔ mɔgɔ wɛrɛ ka muso fɛ,

o ka kɛ maloyako ye i fɛ.

22Maloya ka i ka baaradenmusoman ɲini,

maloya ka gwɛrɛ a ka ladilan na.

Maloya k'i teriw nɛni,

walima k'u kɔrɔfɔ i ka difɛn kosɔn.

ALA KA KUMA

© 2008 Alliance Biblique du Burkina Faso

More Info | Version Index