Search form

Sir 42

1Kana i ka mɛnta kɛ i dalakuma ye.

Kana gundo walaka.

O la, i bena maloyasɔbɛ lɔn,

e fana bena tɔgɔɲuman sɔrɔ.

Minw te maloyako ye, o filɛ:

2N'i be Fɛɛn bɛɛ kuntigi ka sariya bato,

o man kan ka kɛ maloyako ye i fɛ.

Fɛɛn bɛɛ kuntigi ka bɛɛn koo man kan ka kɛ maloyako ye i fɛ,

walima k'a yira ko Alaɲasiranbali dɔ jalakinin te koo dɔ la,

e man kan ka maloya n'o ye.

3Ka koo ɲanabɔ n'i teri,

walima i taamaɲɔgɔn ye sira kan,

walima k'i cɛɛn tilan ni mɔgɔ wɛrɛ ye,

o te maloyako ye.

4N'i be fɛɛn suman ka ɲa kilo kan,

kana maloya n'o ye.

N'i ye tɔnɔ caaman,

walima fitini sɔrɔ,

o te maloyako ye.

5N'i ye tɔnɔ fana sɔrɔ i ka feerefɛn na,

o te maloyako ye.

E kana maloya k'i ka denmisɛnw ladi koo caaman na.

K'i ka baaradenjugu bugɔ fɔɔ k'a fari kɛ joli ye,

o te maloyako ye.

6N'i ka muso te lanamɔgɔ ye,

a ka fisa ka taamasiɲɛ la i ka fɛɛnw kan.

Ni mɔgɔw b'i fɛ minw bolo ka fiɲɛ,

i ka sɔgɔnan dilan i ka fɛɛnw na.

7N'i be fɛɛn dɔ dira kalifayɔrɔ la,

i k'o jati, walima k'o suma.

N'i be fɛɛnw di mɔgɔ wɛrɛ ma,

walima i be minw sɔrɔ,

kana maloya k'o sɛbɛn.

8Kana maloya ka mɔgɔkolon ni naloman kolo,

kana maloya ka mɔgɔkɔrɔba jalaki a ka kakalayako la.

O la, e ben'a yira ko e kalanna tigitigi,

mɔgɔ bɛɛ bena i tɔgɔɲuman fɔ fana.

Denfa ka hami a denmuso kosɔn

9Denmuso ka koo ye hami ye a facɛ fɛ

fɔɔ a te sinɔgɔ.

K'a to sunguruya la,

facɛman be siran ko

a furuwaati kana tɛmɛ.

N'a fana furula, a be siran ko

a koo kana goya a cɛɛ ye.

10K'a sunguruman to,

facɛman be siran ko

u kan'a nigɛ ka kɔnɔ la a la.

N'a fana tagara cɛso la,

a be se ka kɛ tilenbali ye a cɛɛ faan fɛ.

K'a to o yɔrɔ la fana,

a be se ka kɛ deen sɔrɔbali ye.

11Ni denmuso te se k'a yɛrɛ minɛ,

a ka fisa k'a kɔlɔsi kosɔbɛ,

n'o tɛ, a bena i di e juguw ma u b'i lɔgɔbɔ,

i ka dugumɔgɔw bena to ka talenw la n'i tɔgɔ ye,

a bena kɛ sababu ye ka jama lajɛn,

a bena kɛ sababu ye k'i maloya i ka mɔgɔw cɛma.

12E denmuso man kan k'a yɛrɛ yira cɛɛ si la,

a fana man kan ka to muso furuninw cɛma.

13Bari, muso furuninw b'u ka juguya yira,

i ko fani min be bɔn.

14Cɛɛ ka juguya ka fisa ni muso ka ɲumanya ye,

muso malobali b'a facɛ kuun surun.

KALAN DUURUNAN

Danbaga ka boɲa

15Matigi ye koo minw bɛɛ kɛ,

ne bena olu le fɔ sisan.

Ne ye min ye, ne bena o le lakali.

Ala ye fɛɛn bɛɛ dan a ka kuma le barika la,

a ye koo min latigɛ,

o kɛra ka kɛɲɛ n'a sago ye.

16O la, tile be jɛni ka se fɛɛn bɛɛ ma,

Matigi ka sebagaya be ye a ka danfɛnw bɛɛ la.

17Matigi ka mɛlɛkɛw yɛrɛ ma se k'a ka kabakow bɛɛ ɲafɔ,

Matigi, Setigi ye minw sigi ka ɲa diɲɛ na,

janko u ka lɔ ka ɲa a ka sebagaya la.

18Ala be kɔgɔji ni mɔgɔ kɔnɔnako lɔn.

Fɛɛn bɛɛ kuntigi be se ka koo bɛɛ lɔn,

a be waati taamasiɲɛw lɔn.

19A be kotɛmɛninw ni koo nataw fɔ,

a be koo dogoninw yira.

20A be adamaden ka miiriya bɛɛ kala ma,

kuma si dogonin te a ma.

21A ye kobabaw sigi,

a ka lɔnniya tun ye min sɔrɔ.

A b'a cogo la tuma bɛɛ.

A ye min dan, foyi te bɔ o la,

foyi te fara o kan.

A mako te ladili la fana.

22Ala ka kɛta bɛɛ ka ɲi haali,

fɔɔ ka taga se tasumakisɛfitini ma.

23O fɛɛn nunu be yen,

u fana bena to yen kudayi.

U labɛnnin lo k'a sago kɛ dɔrɔn.

24Fɛɛn bɛɛ ye fila fila ye,

kelen bɔnin be a tɔɲɔgɔn ma,

a ma foyi dan min ma dafa.

25O fɛɛn nunu be ɲɔgɔn dafa,

a ka sebagaya la,

o fɛɛn nunu filɛ nigɛ

bena bɔ jɔn le la?

ALA KA KUMA

© 2008 Alliance Biblique du Burkina Faso

More Info | Version Index