Search form

Sir 49

Zoziyasi ka koo

1Wusulan dilanbaga ye wusulan min dilan ka ɲa,

mɔgɔ hakili be jigi la cogo min na,

masacɛ Zoziyasi fana ka koo be ten.

Zoziyasi tɔgɔ wele ka di bɛɛ daa la i ko lii.

A be i ko dɔnkili,

dumuniba kɛyɔrɔ la.

2A ye siraɲuman ta,

k'a kɛ jama nimisara ka faran u ka kojuguw la.

A ye juguya kɛ daa faga ka bɔ yen.

3A y'a dusu sin Matigi ma.

Waatijugu tuma na,

a jijara Ala ka sira yiriwako la.

Masacɛ labanw ni Zeremi ka koo

4Ka masacɛ Dawuda ni Ezekiyasi,

ani Zoziyasi niin bɔ a la,

tɔw bɛɛ ye kojugu fara kojugu kan.

Bari, u ye Fɛɛn bɛɛ kuntigi ka sariya bila kɔ,

Zuda mara masaw nana tunu.

5Bari, u y'u ka fanga di dɔ wɛrɛw ma.

U y'u ka kunkɔrɔta di siya wɛrɛ ma.

6Juguw ye tasuma don dugu wolomanin nin na,

Ala ka dugu nin na,

k'a kɔnɔ bɔlɔnw kɛ lakolon ye,

7i ko kira Zeremi tun y'a fɔ cogo min na.

Bari, u tun y'a tɔɔrɔ,

Ala tun ye ale min kɛ a ka kira ye kabini a baa kɔnɔ,

waasa ka fɛɛnw juu walaka,

k'u cɛn ani k'u halaki,

nga a bena segi k'u tutu fana.

Ezekiyɛli ka koo

8Ezekiyɛli ye yelifɛn nɔɔrɔman ye.

Ala tun y'o yira a la *serubɛnw ka wotoro kan.

9Bari, a hakili tora juguw benko la i ko sanji,

ka ɲuman kɛ siratilennin minɛbagaw ye.i

Kira tan ni fila ka koo

10Kira tan ni fila nunu ka koo faan fɛ,

u kolow kɔni be kaburu la.

Ala k'u nɔtabagaw di u ma.

Bari, u ye Yakuba ka soo jaa gwɛlɛya,

u ye jama kisi olu yɛrɛ ka jigiɲuman barika la.

Zorobabɛli ni Zozuwe, ani Neemi ka koo

11Ne bena Zorobabɛli makiri cogo di?

Ale kɛra i ko taamasiɲɛ lafɛn mɔgɔ kinibolo la.

12Ani Zozedɛki dencɛ Zozuwe fana.

Minw ye Alabatosoba lɔ kura ye u ka tile la.

U ye sigiyɔrɔ lɔ Matigi ye

k'o kɛ a boɲafɛn ye tuma bɛɛ.

13Neemi fana ye hakilijigiko belebeleba to a kɔ.

Ale lo ye dugu laminikogo bennin nin lɔ.

A ye koon ni sɔgɔlanw don dondaw la,

a y'an ka siyɔrɔw lɔ.

Fɔlɔmɔgɔ dɔw ka koo

14Ala ye minw bɛɛ dan dugukolo kan,

Enɔki bɔɲɔgɔn te yen u cɛma.

Bari, ale tara ka bɔ dugukolo kan.

15Mɔgɔ fana te yen min be Yusufu bɔ,

min kɛr'a balimaw ɲamɔgɔ ye,

ani jama dɛmɛbaga.

A kolow ye boɲaba sɔrɔ haali.

16Sɛmu ni Sɛti ye boɲa sɔrɔ adamadenw cɛma haali.

Nga Ala ka danfɛnw bɛɛ la,

Adama le b'u bɛɛ sanfɛ.

ALA KA KUMA

© 2008 Alliance Biblique du Burkina Faso

More Info | Version Index