Search form

Sir 6

1Kana kɛ i teri jugu ye dɛ,

bari, tɔgɔjugu be na ni maloya ni mafiɲɛyali ye.

O ɲɔgɔn le bena kojugukɛla filakanfɔla sɔrɔ.

2Kana e yɛrɛ cɛn nigɛlakow bolo,

n'o tɛ, e fanga bena bari ka nagasi,

3ka kɛ i ko yiri janin

min bɔnɔna a furaburu n'a deenw na.

4Ŋaniyajugu be mɔgɔ halaki,

k'a kɛ a juguw be yɛlɛ a ma.

Teriya

5Kuma diman be mɔgɔ teriw caya,

kumaɲuman be na ni bɛɛn ye.

6I k'a to i fobagaw ka caya.

E ladibagaw mana caya cogo o cogo,

mɛnni kɛ kelen fɛ.

7N'i ye teri sɔrɔ, a sɛgɛsɛgɛ fɔlɔ,

kana kɔrɔtɔ k'i jigi l'a kan.

8Bari, dɔw be teriya kɛ lonɲuman kama,

ni gwɛlɛya ser'i ma, teriya banna.

9Teri dɔ be yɛlɛma ka kɛ e jugu ye.

Bɛnbaliya min b'aw cɛ,

a ben'o gundo walaka k'i maloya.

10Dɔ be teriya kɛ dumuni kama,

gwɛlɛya mana se i ma,

teriya banna.

11I ka lɔnɲumanw na,

a be kɛ i balima ye

fɔɔ a be kuntigiya kɛ e ka baaradenw kan.

12Nga, e majigilon mana se,

ale be yɛlɛma ka kɛ e jugu ye,

a be dogo i la.

13I yɛrɛ mabɔ e juguw la.

I yɛrɛ kɔlɔsi i teriw la.

14Terisɔbɛ be i ko tangayɔrɔɲuman.

Ni mɔgɔ min y'o sɔrɔ,

o tigi ye nafolo sɔrɔ.

15Terisɔbɛ te sanfɛn ye,

a sɔngɔ te se ka fɔ.

16Terisɔbɛ be i ko furaɲuman.

Minw be siran Matigi ɲa,

olu le b'a sɔrɔ.

17Mɔgɔ min be siran Matigi ɲa,

ale be teriyasɔbɛ kɛ.

Bari, ale yɛrɛ be cogo min na,

a teri fana bena kɛ ten.

Lɔnniya degi

18N deen, kabini e kanbelentuma,

sɔn kalan ma

fɔɔ ka taga se i kunsigi gwɛwaati ma,

i bena kɛ lɔnnikɛla ye.

19I ko sɛnɛkɛla ni dannikɛla,

i sɔbɛ don a la k'a nafa makɔnɔ.

Bari, ale sɛnɛko bena i sigɛn dɔɔni dɔrɔn,

nga, dɔɔni i ben'a nafa dumu.

20Lɔnniya sɔrɔ ka gwɛlɛ kolɔnbali fɛ.

Mɔgɔ hakilitan te se ka muɲu a kɔ,

21lɔnniya be i ko kabakuru,

fɛɛn gwiliman lo min b'a fanga suma.

A tena mɛn k'a fili do.

22Lɔnniya tɔgɔ ka kan n'a yɛrɛ tɔgɔ ye.

Bari, mɔgɔ caaman t'a sɔrɔ.

23N deen, mɛnni kɛ.

Sɔn ne ka hakililata ma.

Kana ban n ka ladili la.

24I seen don a ka jɔrɔkɔ la,

i kaan don a ka lɔgɔ kɔrɔ.

25A ɲun i gaman kan,

kana sigɛn a kɔrɔ.

26Tag'a fɛ ni dusuɲuman ye.

Fanga don i yɛrɛ la,

a ka sira taama la.

27Sira ta ka tugu a kɔ,

k'a yɔrɔ ɲini,

a ben'a yɛrɛ yira i la.

N'i ya sɔrɔ, kan'a bila fewu.

28Bari, a laban na,

i bena lafiɲɛ sɔrɔ a fɛ.

A bena yɛlɛma ka kɛ i ka nisɔndiya ye.

29O tuma na, a ka jɔrɔkɔ bena kɛ e tangafɛn barikaman ye.

A ka lɔgɔ bena kɛ kunkɔrɔtadeleke ye i fɛ.

30A ka kanlalɔgɔ ye masirifɛn sanulaman le ye.

A ka jɔrɔkɔw ye kunnasirifaniɲuman le ye.

31I ben'a don i ko kunkɔrɔtaduloki.

I bena i yɛrɛ masiri n'a ye i ko nisɔndiyafugulan.

32N'i sɔnna n deen, i bena lɔnni sɔrɔ.

N'e y'i sɔbɛ don a la, i bena se.

33N'i be to ka mɛnni kɛ kosɔbɛ,

i bena lɔnni sɔrɔ.

N'i ye mɛnni kɛ ka ɲa,

i bena kɛ lɔnnikɛla ye.

34To ka taga mɔgɔkɔrɔbaw cɛma.

Nɔrɔ u ka lɔnniya la.

35Kuma o kuma bɔra Ala fɛ,

mɛnni kɛ o la ka ɲa.

Kan'a to talenɲumanw be bɔsi i la.

36N'i ye hakilitigi dɔ ye,

teliya ka se a fɛ kabini sɔgɔma.

Kɛ a ka soda la tuma bɛɛ.

37Miiri Matigi ka fɔtaw la.

I sɔbɛ don a ka ciiw batoko la.

Ale yɛrɛ bena barika don i la

I be lɔnniya min fɛ, i ben'o sɔrɔ.

ALA KA KUMA

© 2008 Alliance Biblique du Burkina Faso

More Info | Version Index