Search form

Sir 8

Yɛrɛminɛ ni tɔw ye

1Kana kɛlɛ kɛ ni fangatigi ye dɛ!

N'o tɛ, a bena se i kɔrɔ.

2Kana kɛlɛ ni nafolotigi ye dɛ!

N'o tɛ, u ben'a jati ka tɛmɛ i kan.

Bari, sanu ye mɔgɔ caaman kuun cɛn.

A ye masa dɔw yɛrɛ kɔnɔnako yɛlɛma.

3Kana sɔsɔli kɛ ni kuma caaman tigi ye.

Kana lɔgɔ don a ka tasuma na.

4Kana tolon kɛ ni kolobali ye.

N'o tɛ, a bena i bɛmaw nɛni.

5Kojugukɛla min be nimisara, kan'o jalaki.

I hakili to a la ko bɛɛ ye filibaga ye.

6Kana cɛkɔrɔba dɔgɔya.

Bari, an dɔw b'a la ka kɔrɔya.

7Kana nisɔndiya mɔgɔ dɔ ka saya la.

Bari, an kelen kelen bɛɛ bena sa.

8Kana lɔnnikɛlaw ka kalan lɔgɔbɔ,

nga to k'u ka talenw sɛgɛsɛgɛ.

I bena lɔnniya sɔrɔ olu le sababu la.

O la, i bena se ka baara kɛ mɔgɔbabaw ye.

9Kana ban cɛkɔrɔbaw ka koɲafɔta la.

Bari, olu fana y'a mɛn u faaw fɛ.

I bena faamuyali sɔrɔ olu le fɛ.

O la, jaabili bena sɔrɔ i fɛ tuma bɛɛ.

10Kana don kojugukɛla ka koo la,

n'o tɛ, a ka tasuma bena i jɛni.

11Kan'i yɛrɛ kɛɲɛ ni malobali ye,

n'o tɛ, a bena i bila nalomankuma la.

12Kana fɛɛn juru don fangatigi la,

n'i y'o kɛ, i k'o jati fɛɛn tununin ye.

13Koo min see t'i ye, kan'i daa di o la,

n'i y'o kɛ, a lɔn ko i ben'a sara.

14Kiti kana don e ni kititigɛla cɛ,

n'o tɛ, kiti bena diy'a la a ka lɔyɔrɔ kama.

15Kana sira ta ni faratimɔgɔ ye,

n'o tɛ, a bena dɔ fara i ka gwɛlɛya kan.

Bari, a ben'a sagolako kɛ,

o bena kɛ ele nagasiko ye.

16Kɛlɛ kana don e ni mɔgɔ fariman cɛ,

kana kongokolon cɛtigɛ n'a ye,

bari foyi ten'a bali ka mɔgɔ faga,

a bena ben i kan o yɔrɔ la k'i faga.

Dɛmɛbaga tena sɔrɔ i fɛ.

17Kana naloman kɛ i gundoɲɔgɔn ye

n'o tɛ, a tena se k'i ka gundo mara.

18Kana kodogonin kɛ lonan ɲana.

Bari, a bena o koo minɛ cogo min,

e t'o lɔn.

19Kan'i kɔnɔ yɛlɛ bɛɛ ye dɛ,

n'o tɛ, u ten'a lɔn i ye.

ALA KA KUMA

© 2008 Alliance Biblique du Burkina Faso

More Info | Version Index