Search form

Dus 1

1- Solomani ka dɔnkiliw bɛɛ la diman.

Kanuɲɔgɔnmanw ka baro

(Sunguru)

2N mɔmɔ, n fari saalo ka ɲa sa!

I ka mɔmɔni ka di ka tɛmɛ duvɛn kan.

3I ka tulu kasa ka di ka tɛmɛ tulu bɛɛ kan.

I be i ko tulu kasadiman.

O kama, i koo ka di sungurudenw ye.

4Ne minɛ ka tugu i kɔ, an ka boli!

Masa, don ni ne ye i ka soo.

An ka nisɔndiya kosɔbɛ e kosɔn!

An b'i ka koo diya fɔ ko a tɛmɛna duvɛn kan.

Tiɲɛ be sunguruw fɛ n'u b'i kanu!

5Zeruzalɛmu sunguruw, n finnin lo.

N be i ko Kedari bugusow,

nga n cɛɛ ka ɲi.

N be i ko Solomani ka sodalafaniw.

6E kana ne finko filɛ,

tile le ye ne jɛni.

Ne baden cɛmanw le dimina ne kɔrɔ,

u ye ne bila *ɛrɛzɛnforow kɔlɔsili la.

Nga ne ma n ta kɔlɔsi.

7Ee, a fɔ n ye dɛ, e min koo ka di ne ye.

I bena taga i ka begɛnw dɛndɛ min?

I bena taga n'u ye min, waasa u ka lafiɲɛ tilefɛ?

O la, ne kana yaalayaala

e tɔɲɔgɔnw ka begɛnw kɔ gwansan.

(Begɛndɛndɛbagaw)

8Ele min cɛɛ ka ɲi ni musow bɛɛ ye, ni e m'o lɔn,

e ka bɔ ka begɛnw kɔɔ gwɛn,

ka taga i ka badenninw dɛndɛ

begɛndɛndɛbagaw ka togonda gɛrɛfɛ.

(Kanbelen)

9Ne kanubaga, e cɛɛ ka ɲi i ko *Faraŋɔn ka wotoro sama soo.

10I ka tulolanigɛw ye dɔ fara e ɲada ka ɲa kan.

Kɔnɔkisɛ y'i kaan ɲa dɛ!

(Begɛndɛndɛbagaw)

11An bena tulolanigɛ sanulaman lalaga i ye,

ka warigwɛ dondon a la.

(Sunguru)

12Ka ne ka masacɛ to a ka baro kɛyɔrɔ la,

ne ka tulu kasadiman kasa be bɔra.

13Ne kanubaga be i ko kasadiyanan, bɔɔrɔnin kɔnɔ.

A be to ne disi kan.

14Ne kanubaga kasa ka di i ko jabifeeren ne fɛ,

Ɛngɛdi ɛrɛzɛnforo kɔnɔ.

(Kanbelen)

15I cɛɛ ka ɲi, ne kanubaga,

i cɛɛ ka ɲi!

I ɲadenw cɛɛ ka ɲi i ko tuganin ta!

(Sunguru)

16I cɛɛ ka ɲi haali, ne kanubaga,

an be la binkɛnɛ le kan.

17An ka boon birinin be ni yiriw ye,

a kogo ye yiriw ye.

ALA KA KUMA

© 2008 Alliance Biblique du Burkina Faso

More Info | Version Index